ទីបំផុត Shawn ទទួលស្គាល់ថា ពិតជាបានទាក់ទង Hailey មែន មុននាងភ្ជាប់ពាក្យជាមួយ Justin

2018-11-28 02:13:11
ព័ត៌មាន

2018-11-28 02:13:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុត តារាចម្រៀង Shawn Mendes បានសារភាពថា លោកពិតជាបានទាក់ទងគ្នាជាមួយតារាម៉ូដែល Hailey Baldwin ត្រឹមរយៈពេលខ្លី មុនពេលនាងភ្ជាប់ចំណងស្នេហ៍ជាមួយ Justin Bieber សាជាថ្មី ខណៈ ទទួលស្គាល់ថា លោកគួរតែទាក់ទងនារីណាម្នាក់ជាសាធារណៈ ដើម្បីកុំឲ្យមានអ្នកនិយាយថាលោកជាខ្ទើយតទៅទៀត។

ក្នុងកិច្ចសម្ភាសមួយជាមួយទស្សនាវដ្ដី Rolling Stone តារាចម្រៀងវ័យ ២០ ឆ្នាំរូបនេះ បានបើកបង្ហាញពីផលលំបាករបស់លោក ជាមួយនឹងពាក្យចចាមអារ៉ាមថាលោកជាខ្ទើយនោះ។ ដោយសារតែពាក្យចចាមអារ៉ាមទាំងនេះ Shawn បានបញ្ជាក់ថា លោកបានចំណាយពេលធ្វើការវាយតម្លៃលើការនិយាយស្ដី និងកាយវិការរបស់លោកអំឡុងពេលធ្វើបទសម្ភាស រួមទាំងអានសារមតិអ្នកគាំទ្រដើម្បីធ្វើយ៉ាងម៉េចឲ្យលោកផ្លាស់ប្ដូរបានខ្លះ។ ក្នុងកិច្ចសម្ភាសនេះដែរ លោកបាននិយាយថា៖

“ក្នុងចិត្តរបស់ខ្ញុំ ខ្ញុំពិតជាមានអារម្មណ៍ថាចង់ទាក់ទងនារីណាម្នាក់ជាសាធារណៈ ដើម្បីបញ្ជាក់ប្រាប់គ្រប់គ្នាថាខ្ញុំមិនមែនខ្ទើយទេ។ ទោះបីខ្ញុំដឹងថា ជាខ្ទើយគឺគ្មានអីមិនល្អនោះទេ ប៉ុន្តែផ្នែកមួយនៃចិត្តរបស់ខ្ញុំនៅតែគិតទៅផ្លូវហ្នឹងដដែល។ ខ្ញុំពិតជាស្អប់ខ្លួនឯង ពេលដែលគិតបែបនេះ"។

តារាចម្រៀង Shawn Mendes បាននិយាយដែរថា ជីវិតស្នេហារបស់លោក បានស្ថិតក្រោមការវិនិច្ឆ័យច្រើននៅក្នុងខែ ឧសភា ខណៈពេលដែលលោកអញ្ជើញចូលរួមកម្មវិធី Met Gala ជាមួយ Hailey Baldwin នោះ។ ពួកគេមើលទៅបង្ហាញភាពស្និទ្ធស្នាលនឹងគ្នាខ្លាំង រហូតដល់លេចពាក្យចចាមអារ៉ាមថាទាក់ទងគ្នានោះ។ ទោះជាយ៉ាងណាក៏ដោយ តារាទាំង២រូបនេះ បានបដិសេធមិនព្រមទទួលស្គាល់ទំនាក់ទំនងស្នេហារបស់ពួកគេឡើយ ហើយនៅពេលនោះដែរ Hailey ក៏បានចាប់ផ្ដើមទាក់ទងគ្នាជាមួយJustin Bieber សាជាថ្មី រហូតដល់ភ្ជាប់ពាក្យជាមួយគ្នា។

ទោះបីជា ឥឡូវ Shawn បានសារភាពថា លោកនិង Hailey គឺមានទំនាក់ទំនងលើសពីមិត្តពិតមែន ប៉ុន្តែវាជាទំនាក់ទំនងត្រឹមរយៈពេលខ្លីប៉ុណ្ណោះ ហើយលោកក៏បានហៅទំនាក់ទំនងលោកថាជា "Zone of limbo” (ទំនាក់ទំនងដែលអាចជាមិត្តផង និងលើសពីមិត្តផង)។ ម្ចាស់បទ "In My Blood” រូបនេះ ក៏បាននិយាយបន្ថែមដែរថា លោកនិង Hailey គឺគ្មានរឿងរ៉ាវរកាំរកូសជាមួយគ្នាឡើយ ហើយលោកក៏ជូនពរឲ្យនាងជួបតែសំណាងល្អជាមួយជីវិតថ្មី ក្នុងនាមជាស្ត្រីដែលរៀបការហើយនេះ៕

ប្រភព៖ Dailymail ប្រែសម្រួល៖ អន សុភក្ត្រា