- 2019-04-10 09:03:10
- ព័ត៌មាន
អត់បានសប្បាយក្នុងស្រុកទេ រដូវចូលឆ្នាំខ្មែរនេះ បញ្ញា សិទ្ឋិ ជាប់ទៅអូស្ត្រាលី រកថវិកាកសាងវត្ត
- 2019-04-10 09:03:10
- ចំនួនមតិ 0 | ចំនួនចែករំលែក 0
អត់បានសប្បាយក្នុងស្រុកទេ រដូវចូលឆ្នាំខ្មែរនេះ បញ្ញា សិទ្ឋិ ជាប់ទៅអូស្ត្រាលី រកថវិកាកសាងវត្ត
ចន្លោះមិនឃើញ
តារាចម្រៀង និងសម្ដែងវ័យក្មេង បញ្ញា សិទ្ឋិ បានចាកចេញពីប្រទេសកម្ពុជាទៅហើយ កាលពីប៉ុន្មានថ្ងៃមុនសំដៅទៅប្រទេសអូស្ត្រាលី ជាទីដែលលោកត្រូវធ្វើបេសកកម្មសិល្បៈ រកថវិកាទៅជួយកសាងវត្តខ្មែរមួយនៅស្ថិតនៅលើទឹកដីសត្វកង់ហ្គូរូនេះ។
នេះមិនមែនជាលើកទី១នោះទេ ប៉ុន្តែជាដំណើរបេសកកម្មថ្មីមួយទៀត បន្ទាប់លោកធ្លាប់បានសម្ដែងច្រើនដងរួចមកតាមការបញ្ជាក់របស់សាមីខ្លួន លោកជាប់កុងត្រាសម្ដែងនៅលើទឹកដីអូស្ត្រាលីហើយឱកាសនេះរយៈពេល៣ខែឯណោះ ដោយនៅក្នុងរដូវបុណ្យចូលឆ្នាំប្រពៃណីជាតិខ្មែរដែលនឹងមកដល់នៅចុងសប្ដាហ៍នេះនោះ លោកនឹងមិនមានវត្តមានបម្រើអារម្មណ៍ទស្សនិកជនក្នុងស្រុកនោះទេ។
លោកអះអាងថា មានចិត្តអាឡោះអាល័យប្រទេសកំណើតណាស់ ពេលត្រូវចាកចេញក្នុងកាលៈទេសៈបែបនេះ។ បេសកកម្មសិល្បៈធំបំផុតរបស់តារាប្រុសសាច់សរូបនេះ គឺដើម្បីកៀរគរ ប្រមូលបច្ច័យសម្រាប់ទុកកសាងព្រះវិហារខ្មែរមួយនៅអូស្ត្រាលីនេះ ដោយវត្តនោះមានឈ្មោះថា វត្ត "សិរីជុំ" ស្ថិតក្នុងទីក្រុងម៉ែលប៊ន។
"ថវិកាដែលរកបានពីការសម្ដែងពួកយើង គឺនឹងប្រើប្រាស់ដើម្បីផ្សព្វផ្សាយពីវប្បធម៌ ដូចជាព្រះពុទ្ធសាសនាយើង ក្នុងនោះ មានទាំងជួយកសាងវត្តមួយផង គឺវត្ត "សិរីជុំ" នៅក្នុងប្រទេសអូស្ត្រាលីក្រុងមែលប៊នហ្នឹងតែម្ដង"។ បញ្ញា សិទ្ធិ ថ្លែង។
បញ្ញា សិទ្ឋិ បានចូលរួមបម្រើអារម្មណ៍បងប្អូនខ្មែររស់នៅប្រទេសអូស្រ្តាលី ក្រុងម៉ែលប៊ន បានមួយ Show រួចមកហើយ ដោយក្នុងនោះ ត្រូវបានគេកត់សម្គាល់ថា សន្ទុះគាំទ្ររបស់បងប្អូនខ្មែរនៅទីនោះ មានចំនួនច្រើនតែម្ដង ពោលគឺ ពួកគេបានចូលរួមទស្សនារាំកម្សាន្តពេញសាល ជាមួយនឹងការស្វាគមន៍យ៉ាងរាក់ទាក់។
តាមការអះអាងរបស់សាមីខ្លួន ក្នុងរយៈពេល ៣ខែក្នុងបេសកកម្មសិល្បៈលើកនេះ លោកមិនសម្ដែងតែនៅក្នុងប្រទេសអូស្ត្រាលីនោះទេ ប៉ុន្តែលោកក៏នឹងឈានទៅដល់ប្រទេសជិតខាងខ្លះទៀត ដូចជាប្រទេសនូវែលហ្សេឡង់ ជាដើម។ លោកថា ធ្វើយ៉ាងនេះ ដើម្បីប្រមូលថវិកាឲ្យបានច្រើនតាមតែអាចធ្វើបាន ដើម្បីទុកបម្រើរាល់សេចក្ដីត្រូវការ លើការកសាងវត្ត និងផ្សព្វផ្សាយវប្បធម៌ រួមទាំងវិស័យព្រះពុទ្ធសាសនា ជាសាសនារបស់រដ្ឋ៕
