រដូវចូលឆ្នាំ បងប្អូនសប្បាយជួបជុំ សិល្បករខ្មែរជាច្រើន ចេញឆ្ងាយរាប់ម៉ឺនគីឡូពីសាច់ញាតិ

2019-04-11 06:33:45
ព័ត៌មាន

2019-04-11 06:33:45
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការបរិច្ឆេទ បុណ្យចូលឆ្នាំប្រពៃណីជាតិខ្មែរ ឆ្នាំកុរ ឯកស័ក ព.ស ២៥៦៣ មហាសករាជ ១៩៤១ ចុល្លសករាជ ១៣៦១ នឹងមកដល់នៅថ្ងៃអាទិត្យ ១០កើត ខែចេត្រ ត្រូវនឹង ថ្ងៃទី១៤ ខែមេសា គ.ស ២០១៩ ម៉ោង១៥:១២នាទី។ នៅវេលាដ៏ពិសេសនេះ ពិតណាស់ បងប្អូនប្រជាពលរដ្ឋខ្មែរ មិនថានៅទីណា កន្លែងណា ក្នុងចិត្តកំពុងរំពឹងទៅដល់ទិដ្ឋភាពជួបជុំជាមួយសាច់ញាតិ និងប្រាថ្នាវេលាជួបជុំនោះ ឲ្យរំកិលមកកាន់តែលឿន ឆាប់បានទៅភូមិ ទៅស្រុក ជួបម៉ែ ជួបពុក សប្បាយបំភ្លេចទុក្ខជាមួយមិត្តភ័ក្ដិ បងប្អូន។

ប៉ុន្តែទន្ទឹមគ្នានេះ សិល្បករយើងមួយចំនួន បានខកខានឱកាសជួបជុំក្នុងឱកាសដ៏ពិសេសនេះ ត្បិតថា ពួកគេមានបេសកកម្មជាប់ខ្លួន មិនអាចនៅជួបជុំសាច់ញាតិបានឡើយ។ ត្បិតថា នោះមួយផ្នែកជាសកម្មភាពរកប្រាក់ចំណេញផ្ទាល់ខ្លួន ប៉ុន្តែមួយផ្នែកទៀត ក៏ជាសកម្មភាពផ្សព្វផ្សាយសិល្បៈ និងវប្បធម៌ដែលពួកគេបានធ្វើដែរ បូករួមទាំងការបម្រើអារម្មណ៍បងប្អូនខ្មែរនៅបរទេសផង។

គិតមកត្រឹមថ្ងៃទី ១១ មេសា នេះ សិល្បករយើង ៦ ក្រុម ស្មើនឹងប្រមាណ ៣០នាក់ កំពុងជាប់បេសកកម្មខាងលើនៅតាមប្រទេសមួយចំនួន។ ពួកគេទាំងនោះមាន៖

១.យ៉ឹង យន និង ស៊ូ ស៊ីរីកា៖ លោក យ៉ឹង យន និងកញ្ញា ស៊ូ ស៊ីរីកា បានចាកចេញពីប្រទេសកំណើតកាលពីថ្ងៃទី ២៤ កុម្ភៈ ក្រោមការឧបត្ថម្ភរបស់អង្គការ IKARE។ ពួកគេមានបេសកកម្មនៅលើទឹកដីអាមេរិក រយៈពេល ២ខែនៅលើទឹកដីលោកប្រធានាធិបតី ដូណាល់ ត្រាំ។

២.ព្រាប សុវត្ថិ និងកូនៗ ៖ លោក ព្រាប សុវត្ថិ បានលើកទាំងគ្រួសារ រួមទាំងក្រុមចម្រៀងលោកផង សរុបទាំងអស់ ៩នាក់ ទៅសហរដ្ឋអាមេរិកកាលពីថ្ងៃទី ២១ មីនា។ ក្រោមការសហការឧបត្ថម្ភរបស់ លោក ហង្ស ឈា ជាមួយអតីតតារាភាពយន្ត សុភា ដេវីដ និង Rising Star Entertainment ក្រុមរបស់លោក ព្រាប សុវត្ថិ មានបេសកកម្មរយៈពេល ១ ខែកន្លះ នៅទីនោះ។

៣.បញ្ញា សិទ្ធិ៖ ខុសពីសិល្បករ២ក្រុមខាងលើ លោក បញ្ញា សិទ្ធិ ជាប់បេសកកម្មទៅបម្រើអារម្មណ៍បងប្អូនខ្មែរនៅអូស្ត្រាលីវិញ។ លោកបានចាកចេញពីកម្ពុជា កាលពីថ្ងៃ ១៣ មីនា ហើយលោកនឹងស្នាក់នៅប្រទេសអូស្ត្រាលីរយៈពេល ១ខែ កន្លះ ដើម្បីបេសកកម្មសិល្បៈ និងសប្បុរសធម៌។

៤.អ៊ីណូ តារារ៉េប Deeo ៖ ពួកគេទាំងពីរ បានចាកចេញពីកម្ពុជាកាលពីថ្ងៃទី ៨មេសា ឆ្ពោះទៅប្រទេសកូរ៉េ។ ពួកគេនឹងចូលរួមជាមួយ នាយ ក្រឹម កញ្ញា ចាន់ ស្រីនាថ និងខៀវ ដាឡិច ជាដើម ក្នុងព្រឹត្តិការណ៍ "សង្ក្រាន្តខ្មែរលើកទី៣នៅកូរ៉េ"។

៥.ខេម ឡូរ៉ា ម៉ម ចាន់ សម័យ ប៉ែន ចំរុង លោក អូន ដូចគ្នានឹងក្រុម អ៊ីណូ ក្រុមរបស់លោក ខេម ក៏ទៅបំពេញបេសកកម្មសិល្បៈនៅលើទឹកដីប្រទេសកូរ៉េដែរ។ ប៉ុន្តែនៅកម្មវិធីផ្សេងគ្នា ហើយអ្នកឧបត្ថម្ភក៏ផ្សេងគ្នាដែរ។

៦.យ៉ែម សំអូន និង សូដា នីតា៖ តារាប្រុស ស្រី ១គូនេះ ទើបចាកចេញចុងក្រោយគេ ពោលគឺនៅថ្ងៃទី ១០ មេសា ម្សិលមិញនេះ។ លោក យ៉ែម សំអូន និង សូដា នីតា នឹងទៅបំពេញបេសកកម្មសិល្បៈនៅលើទឹកដីសហរដ្ឋអាមេរិក ដូចក្រុមលោក ព្រាប សុវត្ថិ និង យឹង យន ដែរ។

សរុបមក បើទោះដំណើរផ្សេងគ្នា កម្មវិធីផ្សេងគ្នា ប៉ុន្តែសិល្បករខ្មែរទាំងអស់ខាងលើ មិនបាននៅជួបជុំក្រុមគ្រួសារ សាច់ញាតិនៅក្នុងស្រុក នាឱកាសបុណ្យចូលឆ្នាំខ្មែរ ឆ្នាំកុរនេះទេ៕

អត្ថបទ៖ ទារិកា