- 2019-05-02 03:36:38
- ព័ត៌មាន
ជារឿងកម្រណាស់! ថ្មីនេះ ល្បីបរទេសតាមសុំទិញភាពយន្តភាគ "កូនពស់កេងកង" ទៅបញ្ចាំងលើទូរទស្សន៍ប្រទេសគេ
- 2019-05-02 03:36:38
- ចំនួនមតិ 0 | ចំនួនចែករំលែក 0
ជារឿងកម្រណាស់! ថ្មីនេះ ល្បីបរទេសតាមសុំទិញភាពយន្តភាគ "កូនពស់កេងកង" ទៅបញ្ចាំងលើទូរទស្សន៍ប្រទេសគេ
ចន្លោះមិនឃើញ
សម្រាប់ភាពយន្ត(រឿងដុំ)ខ្មែរ ដែលត្រូវបានយកទៅចាក់បញ្ចាំងនៅបរទេសមួយៗ គឺជារឿងកម្រ ហើយសម្រាប់វីដេអូភាគរឹតតែកម្រទៅទៀត ខណៈថ្មីៗនេះមានព័ត៌មានថា ភាពយន្តភាគ(Film Serei) សម្រាប់ចាក់លើទូរទស្សន៍ គឺរឿង "កូនពស់កេងកង" ត្រូវក្រុមហ៊ុនបរទេសជាច្រើនបានល្បួងសុំទិញសិទ្ធិទៅចាក់នៅលើកញ្ចក់ទូរទស្សន៍របស់គេ។
ព័ត៌មាននេះ បានធ្លាយចេញក្នុងចង្កោមតារាសម្ដែងដែលបានចូលរួមសម្ដែងក្នុងវីដេអូភាគទូរទស្សន៍ខាងលើ។ ប្រភពពីតារាសម្ដែងមួយរូបបានឲ្យដឹងថា រឿងភាគ "កូនពស់កេងកង" ដែលកំពុងចាក់ផ្សាយលើកញ្ចក់ទូរទស្សន៍ហង្សមាសនោះ បានទទួលការចាប់អារម្មណ៍យ៉ាងខ្លាំង ក្នុងនោះសូម្បីតែផលិតករបរទេស ក៏ចាប់អារម្មណ៍ដែរ។ ដូច្នេះហើយ ល្បីថា ពួកគេ(ក្រុមហ៊ុនបរទេស) ដែលនៅជិតខាងកម្ពុជា បានចូលមកចែចូវវីដេអូភាគរបស់ខ្មែរមួយនេះ។
“នេះ...ខ្ញុំលឺពីគេមកដែរទេ...គេថាមានថៃ និងក្រុមហ៊ុនធំប៉ុន្មានឯណោះ ចង់ទិញរឿងយើង(កូនពស់កេងកង) ទៅបញ្ចាំងនៅលើកញ្ចក់ទូរទស្សន៍របស់គេ បើមែន...ឡូយហ្មង...កន្លងមកធ្លាប់ឃើញរឿងដុំទៅមួយៗដែរ តែដល់វីដេអូភាគ ដូចជាមិនធ្លាប់ទេអ្ហី!”។ ប្រភពថ្លែង។
តែយ៉ាងណា ប្រភព មិនហ៊ានអះអាងពីដំណឹងខាងលើ ថាអាចយកជាការបានប៉ុណ្ណានោះទេ ប៉ុន្តែរូបគេ គ្រាន់តែសង្ឃឹមថា វាជាការពិត ដើម្បីមោទកភាពនៃវិស័យសិល្បៈភាពយន្តរបស់ខ្មែរ ប្រសិនបើភាពយន្តស៊េរីសម្រាប់ទូរទស្សន៍មួយនេះ ពិតជាត្រូវបានបរទេសទិញយកទៅមែន។ ជុំវិញបញ្ហានេះ ភាគីខាងទូរទស្សន៍ហង្សមាស ជាទីដែលរឿង "កូនពស់កេងកង" បាន និងកំពុងចាក់បញ្ចាំងនោះ មិនទាន់អាចសុំការបញ្ជាក់បានទេនៅព្រឹកនេះ។
ប៉ុន្តែលោក ហ្វៃ សំអាង ដែលគេដឹងថា ជាអ្នកដឹកនាំរឿងខាងលើ និងជាសហអ្នកនិពន្ធជាមួយអ្នកនិពន្ធ ប៉ុល ពិសី បានទទួលស្គាល់ថា ដំណឹងខាងលើ គឺជាការពិត ក្នុងនោះលោកបានបញ្ចេញឲ្យដឹងថា ក្រុមហ៊ុនបរទេសជាច្រើន ពិសេសពីប្រទេសថៃ បានទាក់ទងមកខាងទូរទស្សន៍ហង្សមាស តាំងតែពីខ្សែភាពយន្តខាងលើ ទើបចាក់បញ្ចាំងដំបូងៗមកម្ល៉េះ។ ប៉ុន្តែភាគីខាងកម្ពុជា មិនទាន់បានឆ្លើយតបណាមួយនៅឡើយ ត្បិតថា ក្រុមហ៊ុនបរទេសដែលចង់បានមានច្រើន។
ភាពយន្តភាគ "កូនពស់កេងកង" ត្រូវបានគេប៉ាន់ប្រមាណថា បានចំណាយទុនមហាសាល ព្រោះតែក្នុងនោះបានចេញទៅថតនៅទីកន្លែងមានទេសភាពស្អាតៗ និងល្បីៗរបស់កម្ពុជា។ ក្រៅពីនេះ ការរៀបចំសំលៀកបំពាក់ និងទីកន្លែងសម្រាប់ថតឲ្យស៊ីទៅនឹងសម័យកាល ឧត្ដុង្គ លង្វែក ជាដើម ក៏ត្រូវការចំណាយច្រើនផងដែរ។ ក្រៅពីនេះតួសម្ដែង សុទ្ធជាតួល្បីៗ ហើយសាច់រឿងទៀតសោត ក៏មានច្រើនភាគទៅទៀត ពោលគឺដល់ទៅជាង ១០០ភាគឯណោះ។
ក្រោយពីចំណាយពេលថតដល់ទៅជិត៣ឆ្នាំ និងសម្រិតសម្រាំងបំផុត រឿងនេះ បានចេញចាក់បញ្ចាំងជូនប្រិយមិត្តបានទស្សនាកាលពីចុងឆ្នាំ ២០១៨ នៅលើកញ្ចក់ទូរទស្សន៍ហង្សមាស និងរស្មីហង្សមាស។ ជុំវិញចំណាប់អារម្មណ៍របស់ក្រុមហ៊ុនបរទេសនោះ លោក ហ្វៃ សំអាង អះអាងថា នេះជាមោទកភាពមួយរបស់លោក ដែលជាបានសហនិពន្ធ និងដឹកនាំរឿងផ្ទាល់។
"អ្វីដែលខំក្នុងភាពយន្តហ្នឹង គឺខ្ញុំមានបំណងយករឿងនេះ ទៅបញ្ចាំងនៅបរទេស ពិសេសគឺប្រទេសថៃ អីចឹងហើយ គ្រប់ឈុត គ្រប់ឆាកទាំងអស់ គឺខ្ញុំសម្រាំងបំផុត ឥលូវវាដូចអ្វីដែលខ្ញុំចង់បានមែន គឺមានទាំងថៃ និងក្រុមហ៊ុនបរទេសមួយចំនួនទៀតចង់បាន ដោយពួកគេបានទាក់ទងមកតាំងពីបញ្ចាំងដំបូងម្ល៉េះ!"។
អ្នកនិពន្ធ និងដឹកនាំរឿងមានស្នាដៃរូបនេះ បញ្ជាក់ថា បើទោះជាបែបនេះក្ដី ការចរចាទិញលក់ ទំនងជាមិនអាន់អាចធ្វើក្នុងវេលានេះនោះទេ។ បញ្ហាត្រង់ថា "កូនពស់កេងកង" បាន និងកំពុងតែចាក់បញ្ចាំងនៅឡើយ។ លោកលើកឡើងថា "ខាងគេចង់ទិញទៅបញ្ចាំងនៅលើកញ្ចក់ទូរទស្សន៍គេដែរ ឥឡូវខាងហង្សមាស អត់ទាន់ឆ្លើយជាមួយគេថាម៉េចទេ ព្រោះកំពុងបញ្ចាំងនៅលើទូរទស្សន៍ដែរ អីចឹងខ្លាចបែកសាច់រឿង ទាល់តែចប់ ទើបទំនងអាចចរចាគ្នាបាន!”។
តាមអ្នកនិពន្ធ និងដឹកនាំដដែល រឿង "កូនពស់កេងកង" ដែលមានជាង ១០០ភាគ អាចនឹងបញ្ចាំងចប់នៅចុងឆ្នាំ ២០១៩នេះ៕
អាន៖ ធ្វើបែបនេះ វីជេ រតនា ឲ្យតម្លៃភរិយាខ្ពស់ណាស់!
អាន៖ សារ៉ាយ សក្ខណា ធ្វើអីចឹង ធ្វើបាបចិត្តអ្នកដេកផ្ទះឲ្យច្បាស់ក្រឡែត
