- 2019-05-21 03:14:08
- ព័ត៌មាន
ស្ងាត់ៗមានដំណឹង ស៊ិន ឧត្ដមផល្លា ដើរចេញកណ្ដាលទី ពីការងារច្រៀងនៅភោជនីយដ្ឋានមួយ
- 2019-05-21 03:14:08
- ចំនួនមតិ 0 | ចំនួនចែករំលែក 0
ស្ងាត់ៗមានដំណឹង ស៊ិន ឧត្ដមផល្លា ដើរចេញកណ្ដាលទី ពីការងារច្រៀងនៅភោជនីយដ្ឋានមួយ
ចន្លោះមិនឃើញ
ស៊ិន ឧត្តមផល្លា ត្រូវបានអ្នកនិយមទៅពិសាអាហារពេលយប់នៅភោជនីយដ្ឋាន "ពិភពរាត្រី" កត់សម្គាល់ឃើញថា បានបាត់វត្តមានឆាកតន្ត្រីនៅភោជនីយដ្ឋានខាងលើមួយរយៈធំមកហើយដោយមិនដឹងមូលហេតុច្បាស់លាស់នៅឡើយ។
តាមព័ត៌មានកន្លងមក ស៊ិន ឧត្តមផល្លា ត្រូវបានថៅកែភោជនីយដ្ឋាន "ពិភពរាត្រី" កោះហៅទៅធ្វើជាតារាចម្រៀងប្រចាំភោជនីយដ្ឋានរបស់ខ្លួន។ បើទោះជាសាមីខ្លួនមិនដែលគិតថាអាចទទួលឱកាសនោះជាថ្មី ដោយសារវ័យជ្រេបន្តិច ប៉ុន្តែអ្វីៗបានក្លាយជា ដោយផ្អែកលើសមត្ថភាពអាចច្រៀងច្រើនភាសារបស់ខ្លួន។
ប៉ុន្តែក្រោយពីអ្វីៗបានព្រមព្រៀង និងបានធ្វើការជាមួយគ្នាមួយរយៈ ស្រាប់តែអ្នកមេម៉ាយរូបស្រស់រូបនេះ បានបាត់ខ្លួនឈឹងជាថ្មីពីការងារជាតារាចម្រៀងតាមភោជនីយដ្ឋាន ដែលជាអាជីពចាស់កាលពី២០ឆ្នាំមុនទៅវិញ។ ប្រិយមិត្តរូបដែលអះអាងថា ជាម៉ូយប្រចាំមួយរបស់ភោជនីយដ្ឋានខាងលើ និងជាអ្នកនិយមស្ដាប់សំនៀងជាភាសាបរទេសរបស់តារាចម្រៀងស្រី បញ្ជាក់ថា ផល្លា បានបាត់មុខប្រមាណជាង ១ខែមកហើយ។
“គាត់ដូចជាបាត់មុខ ជាង១ខែហើយ ហើយខ្ញុំសួរគេ(បុគ្គលិក) ខ្លះថា អត់ដឹង ខ្លះថា គាត់ឈប់ហើយ ប៉ុន្តែមិនដឹងថា មានរឿងអី ទើបគាត់ឈប់នោះទេ!”។ ប្រភពថ្លែង។
ជុំវិញបញ្ហានេះ សាមីខ្លួន បានអះអាងថា អ្នកនាង ពិតជាបានឈប់សម្រាកពីការងារច្រៀងនៅភោជនីយដ្ឋានខាងលើនោះមែន។ ចំពោះមូលហេតុ ដោយសារថា នាងមានកាលវិភាគជាន់គ្នាច្រើនពេក ធ្វើឲ្យនាងមិនអាចរ៉ាប់រងរួច ទើបសុំថៅកែឈប់តែម្ដង។ "ឈប់ហើយ ខ្ញុំឈប់ជិត២ខែហើយ ព្រោះរត់មិនរួច...ច្រៀងចប់ម៉ោង ១២ កន្លះរាល់យប់ ម៉ោង ៦ត្រូវបើកហាងលក់ និងជួនត្រូវច្រៀង Affair ទៀត អីចឹង ខ្ញុំរត់អត់រួចទេ"។
ផល្លា បញ្ជាក់ថា ថៅកែបានព្រមព្រៀងឲ្យឈប់ ដោយមើលឃើញថា អ្នកមេម៉ាយមានកិច្ចការមមាញឹកច្រើនពិតមែន។ "គាត់ព្រមឲ្យឈប់ តែគាត់ថា ឲ្យទៅជួយមួយអាទិត្យ៣ថ្ងៃអីទៅ កុំឈប់ដាច់ ប៉ុន្តែជាក់ស្ដែងខ្ញុំនៅតែញែកខ្លួនមិនកើតពិតមែន អីចឹង៣ថ្ងៃហ្នឹង ក៏អត់បានទៅជួយគាត់ទៀត"។
ស៊ិន ឧត្តមផល្លា គឺជាតារាចម្រៀងយ៉េយ៉េ ដែលអាចច្រៀងច្រើនភាសាដូចជា ខ្មែរ ចិន អង់គ្លេស និងឥណ្ឌាជាដើម។ កាលជាង២០ឆ្នាំ នាង ធ្លាប់បានសាងកេរ្តិ៍ឈ្មោះជាមួយសមត្ថភាពកម្រនេះ ក្នុងអាជីពជាតារាចម្រៀងតាមភោជនីយដ្ឋានរាត្រី និងរង្គសាលជាច្រើនមានដូចជា ឈូកទិព្វ បុប្ផាទិព្វ លី ឡាយ និងប៉ាស៊ីហ្វិកឃីស ជាដើម។ ក្រោយបោះបង់ជាង ២០ឆ្នាំ នាងក៏វិលទៅអាជីពនេះជាថ្មី ក្រោយថៅកែហាងខាងលើបានកោះហៅ។
ច្រៀងនៅភោជនីយដ្ឋាន "ពិភពរាត្រី" បានប្រមាណជាង ១ខែ នាងក៏ត្រូវលោក យ៉ែម សំអូន កោះហៅចូលក្រុម Dara Entertainment ថែមទៀត។ បន្ទាប់ពីនោះមក អ្នកមេម៉ាយ ក៏កាន់តែរវល់ឡើងៗ ដោយគេឃើញឧស្សាហ៍ចេញច្រៀងតាមកម្មវិធីមង្គលការ ខួបកំណើត ពិធីជប់លៀងផ្សេងៗ។ ដោយសារតែកាលវិភាគសិល្បៈកាន់តែញឹកស្អេក ផ្សំនឹងមុខជំនួញលក់ គ្រឿងបុណ្យ យីហោ "ឧត្តម្ភ ឧត្តម្ភ" ក៏រវល់ក្នុងរដូវកាលបុណ្យចូលឆ្នាំកន្លងមកផង នាងក៏សម្រេចសុំថៅកែឈប់តែម្ដង ព្រោះកម្លាំងទ្រាំទ្រលែងបាន៕
អាន៖ លក់ជើងមាន់គេមើលងាយ ថាជាមុខរបរតូចតាច តែអ្នកលក់ ទើបទិញឡាន ៧ម៉ឺនដុល្លារក្ដៅៗ
អាន៖ ក្រឡេកមើល Fashion ស្អាតៗសម្រាប់មង្គលការពីតារាស្រីល្បីៗ
