- 2019-11-25 08:25:59
- ព័ត៌មាន
ឪពុកម្ដាយដឹងតែសប្បាយចិត្ត! កុមារកម្ពុជា ១០រូប មានទេពកោសល្យខ្ពស់តន្ត្រី ត្រៀមចេញទៅប្រកួតនៅបរទេស
- 2019-11-25 08:25:59
- ចំនួនមតិ 0 | ចំនួនចែករំលែក 0
ឪពុកម្ដាយដឹងតែសប្បាយចិត្ត! កុមារកម្ពុជា ១០រូប មានទេពកោសល្យខ្ពស់តន្ត្រី ត្រៀមចេញទៅប្រកួតនៅបរទេស
ចន្លោះមិនឃើញ
បេក្ខភាពតំណាងកម្ពុជា១០រូប ដែលក្នុងនោះភាគច្រើនជាកុមារនៅឡើយ ត្រៀមនឹងចូលរួមប្រឡងសមត្ថភាពផ្នែកតន្ត្រីជាលក្ខណៈអន្តរជាតិ ដោយគ្រោងនឹងចាកចេញពីកម្ពុជានៅដើមឆ្នាំក្រោយនេះ ឆ្ពោះទៅប្រទេសម៉ាឡេស៊ី។
លោក សូ ស្រណោះ នាយកសាលាបង្រៀនតន្ត្រី "ស្រណោះតន្ត្រី" បានធ្វើពិធីប្រកាសពីបេក្ខភាពពួកគេពីចុងសប្ដាហ៍មុននេះ។ តាមបណ្ឌិតប៉្យាណូមកពីជប៉ុនរូបនេះ ឲ្យដឹងថា ពួកគេទាំង ១០ គឺជ្រើសចេញពីការប្រឡងសមត្ថភាពផ្នែកតន្ត្រីដ៏ធំមួយក្នុងក្របខណ្ឌក្នុងស្រុកកាលពីពេលកន្លងមក។ យ៉ាងណា ផែនការរបស់លោក បេក្ខភាពសរុប គឺមានដល់ទៅ ៩០នាក់។ ប៉ុន្តែបេក្ខភាព ១០រូបនេះ លោកមានទំនុកចិត្តខ្ពស់ថា នឹងអាចបានលទ្ធផលល្អពីការប្រឡង។
លោក បន្តថា ក្នុងចំណោមពួកគេទាំង ១០នាក់ មានអ្នកខ្លះជាម្ចាស់មេដាយមាសផង លើសមត្ថភាពផ្សេងៗគ្នា។ បេក្ខភាពទាំង ១០រូបរបស់កម្ពុជា ត្រូវបានបែកចែកជា២ផ្នែក គឺផ្នែកចម្រៀង និងផ្នែកប៉្យាណូ ត្រៀមនឹងទៅប្រកួតក្នុងកម្មវិធីប្រកួតសមត្ថភាពផ្នែកតន្ត្រីដ៏ធំមួយនៅប្រទេសម៉ាឡេស៊ី ចាប់ពីថ្ងៃទី ២១-២៤ កុម្ភៈ ២០២០ខាងមុខ។ កម្មវិធីនឹងមានបេក្ខភាពមកពីប្រទេសចំនួន ១០ផ្សេងទៀតបូករួមនឹងកម្ពុជាបានចូលរួម។
លោក សូ ស្រណោះ លើកឡើងថា បេក្ខភាពតំណាងប្រទេសមួយៗ សុទ្ធតែល្អ ពោលគឺមានសមត្ថភាពខ្ពស់ដូចគ្នា។ ប៉ុន្តែសម្រាប់លោក នៅតែមានក្ដីសង្ឃឹមចំពោះបេក្ខភាពទៅពីកម្ពុជា ថានឹងបានជយលាភីត្រឡប់មកពីប្រទេសកំណើតវិញ។ លោកថា ជាមួយសមត្ថភាពដ៏ល្អស្រាប់ ពួកគេនឹងត្រូវបំពាក់បំប៉នបន្ថែមទៀត មុនចេញទៅប្រកួត។
"គិតពីឥឡូវ ពួកគាត់មានកម្មវិធី Master Class ដែលមានគ្រូជំនាញជាច្រើនទៀតមកបំប៉នពួកគេ...ជារួមយើងបានត្រៀមច្រើនមែនទែនសម្រាប់ពួកគាត់...ព្រោះពួកយើងចង់ឲ្យពួកគាត់ឈ្នះ និងសង្ឃឹមថា គាត់នឹងឈ្នះជយលាភីត្រឡប់មកប្រទេសយើងវិញ"។ អតីតគណៈកម្មការក្នុងកម្មវិធី "សំនៀងចែងចាំង" ថ្លែង។
លោក សូ ស្រណោះ បន្ថែមថា អ្វីដែលលោកពុះពារ គឺចង់ឲ្យកុមារកម្ពុជា មានមុខមានមាត់ និងមានកិត្តិយសនៅលើឆាកអន្តរជាតិតាមរយៈតន្ត្រី ព្រោះលោកយល់ថា កុមារកម្ពុជាមានសមត្ថភាពខ្ពស់ដូចនឹងបេក្ខភាពតំណាងប្រទេសផ្សេងដែរ អ្វីដែលពួកគេខ្វះ គឺឱកាសបញ្ចេញសមត្ថភាពប៉ុណ្ណោះ។ ដូច្នេះលោកនៅតែសង្ឃឹមថា ពួកគេនឹងធ្វើបានសម្រាប់ព្រឹត្តិការណ៍ដ៏ធំជាអន្តរជាតិមួយនេះ។
ងាកទៅបេក្ខភាពតំណាងកម្ពុជាវិញ ក៏បានឲ្យដឹងថា ពួកគេក៏រីករាយចំពោះឱកាសដ៏ល្អ សម្រាប់ការបង្ហាញសមត្ថភាពរបស់ពួកគេ។ កញ្ញា មរកត ដែលជាជយលាភីផ្នែកចម្រៀងក្នុងកម្មវិធីប្រឡងរបស់សាលា "ស្រណោះតន្ត្រី" កាលពីពេលមុននោះ បានឲ្យដឹងថា ការប្រឡងនាពេលខាងមុខ គឺជាវេទិកាដ៏អស្ចារ្យ ដែលរូបកញ្ញាផ្ទាល់ ក៏ដូចជាបេក្ខភាពផ្សេងទៀត នឹងអាចរៀនសូត្រ ព្រមទាំងដោះដូរបទពិសោធន៍ជាមួយបេក្ខភាពមកពីប្រទេសផ្សេងៗទៀត។ ដូច្នេះ បន្ទាប់ពីឆ្លងកាត់រួចនោះ កញ្ញា ជឿថា សមត្ថភាពរបស់ពួកគេ នឹងកាន់តែប្រសើរ៕