- 2020-01-03 04:57:47
- ព័ត៌មាន
សិល្បករវ័យក្មេង ថាការឲ្យតម្លៃលើអធិរាជសំឡេងមាស មានតែលើបបូរមាត់ តែគ្រួសារអភ័ព្វខ្វះការយកចិត្តដាក់៣ជំនាន់ហើយ!
- 2020-01-03 04:57:47
- ចំនួនមតិ 0 | ចំនួនចែករំលែក 0
សិល្បករវ័យក្មេង ថាការឲ្យតម្លៃលើអធិរាជសំឡេងមាស មានតែលើបបូរមាត់ តែគ្រួសារអភ័ព្វខ្វះការយកចិត្តដាក់៣ជំនាន់ហើយ!
ចន្លោះមិនឃើញ
ដ្បិតថាកេរ្តិ៍ឈ្មោះរបស់ អធិរាជសំឡេងមាស ស៊ីន ស៊ីសាមុត ល្បីសុះសាយជាច្រើនទសវត្សទាំងក្នុង និងក្រៅស្រុក ប៉ុន្តែគ្រួសារលោកហាក់ជួបរឿងអភ័ព្វច្រើន និងថា ការឲ្យតម្លៃមានតែលើបបូរមាត់ ប៉ុន្តែជាក់ស្ដែងមរណភាពរបស់ ស៊ីន សេដ្ឋកុល ជាចៅប្រុសអធិរាជសំឡេងមាស ពិធីសាសនាប្រព្រឹត្តទៅទាំងខ្វះការជួយជ្រោមជ្រែង។
លោក ម៉ា ច័ន្ទបញ្ញា ជាអតីតសិស្សរបស់ លោក ស៊ីន ច័ន្ទឆាយ៉ា ឪពុកបង្កើតរបស់ ស៊ីន សេដ្ឋកុល បានសរសេរយ៉ាងអន្លាយលើហ្វេសប៊ុករបស់លោក ហើយស្នើឲ្យប្រិយមិត្តអានឲ្យចប់ ព្រោះលោកចង់ឲ្យប្រិយមិត្តដឹងរឿងពិតខ្លះកើតមានចំពោះគ្រួសារអភ័ព្វរបស់លោក ស៊ីន ស៊ីសាមុត។
សិល្បករវ័យក្មេង បានឲ្យដឹងថា គ្រួសារអធិរាជសំឡេងមាស ដែលល្បីខ្ទរខ្ទារហើយមើលពីខាងក្រៅ មានមនុស្សជាច្រើនគោរព ឲ្យតម្លៃដោយសារតែភាពល្បីល្បាញរបស់លោក ស៊ីន ស៊ីសាមុត ក្នុងបុគ្គលខ្លះក៏មានបានដោយសារមរតកចម្រៀងរបស់លោកផង។ ប៉ុន្តែជាក់ស្ដែងក្រុមគ្រួសារមួយនេះ ហាក់ខ្វះការយកចិត្តទុកដាក់ ៣ជំនាន់មកហើយ។
ហេតុផលនេះ ទើបលោកគ្រូរបស់លោក ស៊ីន ច័ន្ទឆាយ៉ា ធ្លាប់ដាស់តឿនលោកថា៖ "បើថ្ងៃណាមួយបញ្ញា បានជោគជ័យហើយ ធ្វើជាគំរូ កុំភ្លេចគ្រួសារ បងប្អូន ខ្លួនឯង ពិសេសលោកគ្រូធំ ព្រោះពួកគេ នេះហើយ ដែលជនជាតិខ្មែរយើងមួយចំនួន តែងតែនិយាយតែមាត់ តែមិនសូវឲ្យតម្លៃ"។
លោកថា អ្វីៗបានឆ្លុះបញ្ចាំងតាមរយៈការទៅដល់ដោយខ្លួនឯងក្នុងពិធី ក្រោយពីឆ្លៀតពីការងារមមាញឹករបស់លោក និងចង់បង្ហាញជំហរខ្លះៗផង។ លោក ម៉ា ច័ន្ទបញ្ញា បញ្ជាក់ថា តាមការកត់សម្គាល់របស់លោក គឺមិនសូវឃើញមានសិល្បករទៅចូលរួមច្រើនទេ ពោលគឺមានតិចតួច ដែលមិនសមនឹងភាពល្បីល្បាញរបស់អធិរាជសំឡេងមាសឡើយ។ បញ្ញា ប្រាប់ទៀតថា លោកឃើញតែ សាច់ញាតិនៃគ្រួសារដ៏សោកសៅប៉ុណ្ណោះ។
បញ្ហានេះ សិល្បករវ័យក្មេង លើកឡើងថា ដោយសារតែគ្រួសារអធិរាជសំឡេងមាស គ្មានខ្នងបង្អែក និងមិនចេះ Protocol ទើបជួបរឿងអភ័ព្វយ៉ាងនេះ។ យ៉ាងណា តាមប្រិយមិត្តខ្លះបាន អះអាងថា សិល្បករច្រើននាក់ដែរបានទៅចូលរួមថ្ងៃទីដំបូងនៃពិធីបុណ្យ ក្នុងមានទាំងវត្តមានរបស់ថ្នាក់នាំខ្លះផង។
គ្រួសារ ស៊ីន ស៊ីសាមុត ក្រោយពីអធិរាជសំឡេងមាសរូបនេះចាកចេញទៅតាំងឆ្នាំ ១៩៧៦ បន្ទុកគ្រួសារ ត្រូវធ្លាក់លើលោក ស៊ីន ច័ន្ទឆាយ៉ា ប៉ុន្តែលោកគ្រូរបស់លោក បញ្ញា រូបនេះ ក៏បានស្លាប់ទៀត ហើយអ្វីក៏ត្រូវធ្លាក់លើកូនប្រុស ស៊ីន សេដ្ឋកុល។ ប៉ុន្តែបង្គោលគ្រួសារ ធំចុងក្រោយក៏ត្រូវបាក់ទៀត កាលពីថ្ងៃទី ៣១ ដោយលោកបានស្លាប់ដោយសារជំងឺបេះដូង អ្នកខ្លះថា ដាច់សរសៃឈាមក្នុងខួរក្បាល។ ការបាត់បង់របស់លោក សេដ្ឋកុល ធ្វើគ្រួសារទាំងមូលទ្រុឌទ្រោមទៅៗ ហើយកូនស្រីពៅដែលនៅសេសសល់ ជាអ្នករាប់រងបន្ទុកគ្រួសារដ៏ធ្ងន់មួយនេះ។
ទុកជាការដឹងគុណ និងចូលរួមរំលែកទុក្ខលំបាកដល់គ្រួសារសំឡេងមាស សិល្បករ ម៉ា ច័ន្ទបញ្ញា បានបញ្ជាក់ថា ចាប់ពីពេលនេះ លោកនឹងទទួលការហៅឲ្យច្រៀងបទមរតកឡើងវិញ ក្រោយពីកន្លងមកលោកបានបដិសេធ ព្រោះមិនចង់ប្រើមរតកដើមមកធ្វើអាជីវកម្ម។ ក្រៅពិនេះលោកនឹងកាត់ចំណែកខ្លះពីការច្រៀងនោះ ជូនគ្រួសារអភ័ព្វនេះផង។
លោកថា "ខ្ញុំនឹងព្យាយាមធ្វើ ការបរិច្ចាគ រាល់ការអញ្ជើញទាំងឡាយណា ពីអ្នកគាំទ្រខ្ញុំអោយច្រៀងបទពីសង្គម 30% ទៅ 40%ទុកជាគំរូ ជូនគ្រួសារលោកគ្រូខ្ញុំ ដែលពីមុន ខ្ញុំបាទមិនងាយទទួលការសម្ដែងចម្រៀងបទពីសង្គមបែបនេះទេ ព្រោះ មិនចង់យកបទមរតកដើមមករកកម្រៃ"។ ក្រៅពីនេះលោកថា នឹងព្យាយាមជួយរៀបចំ ការិយាល័យ ស៊ីន ស៊ីសាមុតឡើងវិញទៀត តាមលទ្ធភាពដែលលោកមាន និងស្វាគមន៍ការឧបត្ថម្ភទាំងឡាយ៕
