- 2020-03-13 00:11:00
- ព័ត៌មាន
កសិករខ្មែរមានសង្ឃឹមហើយ! ខេម ៖ "ខ្ញុំចង់ឃើញស្នាមញញឹមកសិករខ្មែរ"
- 2020-03-13 00:11:00
- ចំនួនមតិ 0 | ចំនួនចែករំលែក 0
កសិករខ្មែរមានសង្ឃឹមហើយ! ខេម ៖ "ខ្ញុំចង់ឃើញស្នាមញញឹមកសិករខ្មែរ"
ចន្លោះមិនឃើញ
តារាចម្រៀងផលិតកម្ម ថោន លោក ខេម បាន និងកំពុងមានសកម្មភាពខ្លាំងក្នុងការលើកកម្ពស់បន្លែធម្មជាតិរបស់កសិករខ្មែរ ដោយក្នុងនោះ លោកមានគំនិតមួយ គឺចង់ឃើញស្នាមញញឹមរបស់បងប្អូនប្រជាកសិករខ្មែរចេញពីកសិផលរបស់ខ្លួន។
សកម្មភាពរបស់ ខេម បានកើតមាន ចាប់តាំងពីឧកញ៉ា ឡេង ណាវ៉ាត្រា បានប្រកាសពីគម្រោង "ផ្សារកសិផលធម្មជាតិ" កាលពីខែមុន ដែលពេលនោះ ភ្លាមៗ តារាចម្រៀងមកពីខេត្តកំពង់ឆ្នាំង បានប្រកាសគាំទ្រ និងចូលរួមយ៉ាងសកម្មក្នុងការលើកកម្ពស់ទីផ្សារកសិផលរបស់បងប្អូនប្រជាកសិករតាមរយៈគម្រោងនេះ។ ខេម បានឲ្យដឹងថា លោកនឹងចូលរួមផ្សព្វផ្សាយដោយឥតគិតថ្លៃរាល់សកម្មភាពគម្រោងដើម្បីប្រជាកសិករ។
ធ្វើបែបនេះ ម្ចាស់បទ "ស្រឡាញ់ស្រីកម្ពស់ ១,៧៣" ប្រាប់ថា មិនមែនជាការគាំទ្រគម្រោងរបស់ឧកញ៉ាវ័យក្មេងតែម្យ៉ាងនោះទេ តែធាតុពិត គឺលោកចង់ជួយ និងលើកកម្ពស់ទីផ្សាររបស់បងប្អូនប្រជាកសិករ។ "ខ្ញុំចង់ឃើញស្នាមញញឹមរបស់បងប្អូនប្រជាកសិករយើង ព្រោះឃើញកន្លងមក ពួកគាត់ខំដាំដុះ បានផលហើយ បែរជាអត់សូវមានទីផ្សារ អីចឹងហើយខ្ញុំចង់ជួយពួកគាត់ ហើយជាមួយគ្នា ខ្ញុំក៏សុំសំណូមពរដល់រដ្ឋាភិបាល និងក្រសួងពាក់ព័ន្ធ គួរកាត់បន្ថយការនាំចូលបន្លែ ត្រី សាច់ពីបរទេស ដើម្បីទុកលទ្ធភាពទីផ្សារឲ្យបងប្អូនកសិករយើងក្នុងស្រុកវិញ"។
មានការគិតធ្វើបែបនេះ លោក ខេម ថ្មីៗនេះ ត្រូវបានគេឃើញចុះទៅជួប និងផ្សព្វផ្សាយបង្ហាញពីទីផ្សារដល់បងប្អូនប្រជាកសិករដាំបន្លែធម្មជាតិនៅខេត្តកំពង់ឆ្នាំង ដែលជាទឹកដីកំណើតរបស់លោក។ លោក បញ្ជាក់ថា លោកនឹងមានសកម្មភាពដូចគ្នានេះទៀតនាពេលខាង នៅតាមទីកន្លែងនានារបស់បងប្អូនកសិករដាំដុះបន្លែធម្មជាតិ។ ជាមួយគ្នា តារាចម្រៀងដដែល បានសំណូមពរប្រជាពលរដ្ឋខ្មែរ ចូលរួមគាំទ្រផលិតផលកសិកម្មរបស់បងប្អូនកសិករខ្មែរ ក៏ដូចជាគាំទ្រផ្សារកសិផលធម្មជាតិ ព្រោះទាំងពីរមានទំនាក់ទំនងជិតស្និទ្ធនឹងគ្នា ពោលគឺពឹងគ្នាទៅវិញទៅមក។
នេះគឺជាការចេញមុខជួយប្រជាពលរដ្ឋយ៉ាងកម្ររបស់លោក ខេម ក្នុងរូបភាពមួយធំដុំបែបនេះ។ សាមីខ្លួន បានបញ្ជាក់ថា ក្រៅពីធ្វើតាមបេះដូង ចង់ជួយកសិករខ្មែរ ជួយលើកកម្ពស់ទីផ្សារបន្លែធម្មជាតិក្នុងស្រុកហើយ កាយវិការនេះ លោកក៏ចង់តបស្នងទៅដល់បងប្អូនប្រជាពលរដ្ឋ ពិសេសអ្នកគាំទ្រទាំងអស់ ដែលតែងតែស្រឡាញ់រាប់អាន និងគាំទ្រចំពោះរូបលោកតាំងពីដើមរហូតមក។
“ខ្ញុំចង់តបស្នងចំពោះការគាំទ្រដល់បងប្អូនប្រជាពលរដ្ឋពិសេសអ្នកគាំទ្រខ្ញុំ ដែលបានស្រឡាញ់ និងគាំទ្ររហូតមក។ មួយវិញទៀត ខ្ញុំចង់ផ្ញើសារទៅបងប្អូនកុំអោយអស់សង្ឃឹម ទោះអត់ធ្វើការងាររោងចក្រ ប៉ុន្តែបងប្អូនក៏អាចងាកគិតពីការងារកសិកម្មផងដែរ"។
លោក ខេម មិនមែនជាតារាតែម្នាក់នោះទេ ដែលបានប្រកាសចូលផ្សព្វផ្សាយ "គម្រោងផ្សារកសិផលធម្មជាតិ" ដើម្បីប្រជាកសិករនោះទេ ប៉ុន្តែជាមួយគ្នាមាន តារាចម្រៀង តន់ ច័ន្ទសីម៉ា និងលោក ខេមរៈ សិរីមន្តជាដើម ក៏អះអាងថា នឹងចូលកិច្ចការនេះ ដើម្បីប្រជាកសិករខ្មែរដោយមិនគិតថ្លៃដែរ
ចាប់ពីថ្ងៃទី១៥ មីនា ២០២០ តទៅ លោកអ្នកអាចរកទិញបន្លែ ផ្លែឈើ និង សាច់សុវត្ថិភាព ពីផ្សារកសិផលធម្មជាតិដោយផ្ទាល់៖
