- 2020-03-16 08:56:04
- ជីវិតតារា
អ៊ុន សិទ្ធា កំពុងលាក់រឿងស្នេហាជាមួយអាណិកជននៅញូហ្សែលែន?
- 2020-03-16 08:56:04
- ចំនួនមតិ 0 | ចំនួនចែករំលែក 0
អ៊ុន សិទ្ធា កំពុងលាក់រឿងស្នេហាជាមួយអាណិកជននៅញូហ្សែលែន?
ចន្លោះមិនឃើញ
ប្រភពពីអ្នកសិល្បៈដែលស្និតជាមួយតារាសម្ដែង និងដើរម៉ូតប្រុស អ៊ុន សិទ្ធា បានបង្ហើបថា សិទ្ធា នឹងចូលរោងការជាមួយអាណិកជនខ្មែររស់នៅប្រទេសញូហ្សែលែននៅឆ្នាំក្រោយ ប៉ុន្តែសាមីខ្លួនព្យាយាមលាក់មិនទាន់ហ៊ានបញ្ចេញនៅឡើយ គឺរង់ចាំដល់ថ្ងៃចែកធៀបការតែម្ដង។
ប្រភពដដែលបញ្ជាក់ថា សិទ្ធា និងនារីស្រស់សោភាម្នាក់នោះ ត្រូវបានចាស់ទុំណែនាំឲ្យស្គាល់គ្នាអស់រយៈពេលជាង១ឆ្នាំហើយ ហើយអ្នកទាំងពីរក៏បានយល់ចិត្ដថ្លើមគ្នាច្រើនហើយដែរ។ គូរអនាគតរបស់សិទ្ធា គឺជាអ្នកជំនួញដែលធ្លាប់ឡើងចុះកម្ពុជាញឹកញាប់ដើម្បីជួបមុខគ្នា។
ប៉ុន្តែ អ៊ុន សិទ្ធា មិនទាន់ចង់បញ្ចេញព័ត៌មានពិតពីទំនាក់ទំនងស្នេហារបស់ខ្លួននៅឡើយ ព្រោះខ្លាចបាត់ប្រជាប្រិយភាព ខណៈដែលលោកកំពុងឡើងកូដខាងសម្ដែងភាពយន្តឲ្យផលិតកម្មក្នុងស្រុកជាច្រើន។
ជុំវិញព័ត៌មានលេចឡើងនេះ។ Sabay បានព្យាយាមសាកសួរ តារាសម្ដែងសម្បុរស្រអែម រាងខ្ពស់ស្រឡះ អ៊ុន សិទ្ធា ផ្ទាល់ក្នុងឱកាសដែលលោកចូលរួមក្នុងពិធីបើកមហោស្រពភាពយន្តអន្តរជាតិលើកទី១០ នៅសាលមហោស្រពចតុម្មុខ កាលពីថ្ងៃទី១៣ ខែមីនា។ ប៉ុន្តែលោកឆ្លើយតបយ៉ាងខ្លីថា " បងអាចដឹងវាពីខ្ញុំនៅឆ្នាំក្រោយ ឥឡូវអត់ទាន់ចង់និយាយអីច្រើនទេ"។
តាមរយៈចម្លើយយ៉ាងខ្លីរបស់ អ៊ុន សិទ្ធា គេអាចយល់បានថា តារាសម្ដែងរូបនេះពិតជាមានគម្រោងរៀបការនៅឆ្នាំក្រោយពិតមែន ខណៈដែលអ្នកទម្លាយរឿងនេះបន្ថែមថា ចាស់ទុំមានការត្រូវរ៉ូវគ្នាអស់ហើយ គឺរង់ចាំឲ្យតែខាងស្រីរៀបចំការងាររួចរាល់នៅប្រទេសញូហ្សែលែនប៉ុណ្ណោះ នឹងហោះមកកម្ពុជា ដើម្បីរៀបចំពិធីមង្គលការតាមប្រពៃណីខ្មែរ។
លោក អ៊ុន សិទ្ធា បានប្រឡូកក្នុងវិស័យសិល្បៈតាមរយៈដើរម៉ូត សម្ដែងរឿង និងធ្វើជាពិធីករតាមកម្មវិធីផ្សេងៗ តាំងពីឆ្នាំ២០០៦។ កិត្តិនាមរបស់លោកចាប់ផ្ដើមល្បីសុះសាយ និងទទួលបានការគាំទ្រច្រើនពីទស្សនិកជន បន្ទាប់ពីលោកបានដើរជាតួអង្គសំខាន់ម្នាក់ក្នុងរឿង"ស្បែកគង់" ព្រមទាំងរឿងខ្នាតធំ និងរឿងភាគដែលបញ្ចាំងលើកញ្ចក់ទូរទស្សន៍ជាច្រើនទៀត៕
