- 2020-06-26 04:25:04
- ព័ត៌មាន
ទន្ទឹមផ្ទុះបទថ្មីប្រភេទ 18+ ខ្លាំង មានដំណឹង យូរី និងសាន់ដេ ជិតដាច់កុងត្រាជាមួយគ្នា!!
- 2020-06-26 04:25:04
- ចំនួនមតិ 0 | ចំនួនចែករំលែក 0
ទន្ទឹមផ្ទុះបទថ្មីប្រភេទ 18+ ខ្លាំង មានដំណឹង យូរី និងសាន់ដេ ជិតដាច់កុងត្រាជាមួយគ្នា!!
ចន្លោះមិនឃើញ
ក្រោយពីបានបញ្ចេញបទថ្មីរសជាតិប្លែកកាលពី២ថ្ងៃមុន ធ្វើឲ្យកក្រើកលើបណ្ដាញសង្គមនោះ ឥឡូវមានតម្រុយថា តារាចម្រៀង យូរី ជិតដាច់កុងត្រាជាមួយសាន់ដេ ដែលជាទ្រនំបច្ចុប្បន្នរបស់នាងហើយ។
មានការសង្ស័យមួយចំនួន ចាប់តាំងពី យូរី បានបញ្ចេញបទចម្រៀងថ្មីរបស់ខ្លួនប្រភេទសម្រាប់ប្រិយមិត្តដែលមានអាយុចាប់ពី ១៨ឆ្នាំឡើងកាលពី២ថ្ងៃមុន។ ការសង្ស័យនោះ ក៏ព្រោះថា បទថ្មីដែលបង្កប់ភាពសិចស៊ីដែលជាពិសោធន៍ដំបូងរបស់តារាស្រី គឺមិនបានចេញនៅក្រោមផលិតកម្មសាន់ដេដែលនាងបានជ្រកកោនជាច្រើនឆ្នាំនោះទេ។ ប៉ុន្តែគឺបានចេញនៅក្រោមផលិតកម្មថ្មីមួយផ្សេង។
ចំណុចនេះ នាំឲ្យមានការងឿងឆ្ងល់ថាតើហេតុអ្វី បានតារាស្រី ហ៊ានធ្វើបែបនេះ ខណៈនាងនៅជ្រកក្រោមផលិតកម្មនៅឡើយ។ ជុំវិញបញ្ហានេះ ក៏មានដំណឹងថា តាមពិត យូរី និង សាន់ដេ កាន់តែកៀកដល់ថ្ងៃចប់កុងត្រានឹងគ្នាទៅហើយ ក្រោយពីបានរួមរស់ជាមួយគ្នាអស់រយៈពេលប្រមាណជិត ១០ឆ្នាំ។
កញ្ញា យូរី ដ៏ស្រស់ប្រិមប្រិយ បានឆ្លើយប្រាប់តាមសារអេឡិចត្រូនិកថា ជាការពិតនាង ជិតចប់កុងត្រាជាមួយផលិតកម្មបច្ចុប្បន្ននាងហើយ។ យ៉ាងណាក៏ដោយនាងថា មិនមែនដោយសារបញ្ហានេះ ទើបនាងហ៊ានចេញបទ "Bae” ជាប្រភេទបទសម្រាប់មនុស្សអាយុចាប់ពី ១៨ឆ្នាំឡើង ដ៏កក្រើកកាលពីថ្ងៃទី ២៤ មិថុនា ទើបកន្លងផុតទៅក្ដៅៗនោះទេ។ នាងថា ដើមឡើយបទចម្រៀងខាងលើនេះ នាងគ្រាន់តែថតលេងប៉ុណ្ណោះ។
ប៉ុន្តែក្រោយមក មិត្តភ័ក្ដិរបស់នាង ក៏បានយកទៅកាត់តចេញជាវីដេអូចម្រៀងពេញលេញមួយ ហើយបង្ហោះលើបណ្ដាញសង្គមហ្វេសប៊ុក តែម្ដង។
យូរី បានចូលរួមជាមួយសាន់ដេ តាំងពីឆ្នាំ ២០១៣ ដែលគិតមកទល់បច្ចុប្បន្នមានរយៈពេល ៧ឆ្នាំហើយ ដែលនាងបានជ្រកក្រោមផលិតកម្មចំណាស់មួយនេះ។ ក្នុងរយៈពេលជិត១ទសវត្សនេះ យូរី ក៏ត្រូវបានផលិតកម្មលើកស្ទួយ ជួយឲ្យមានបទល្បីៗជាច្រើនដែរ។ បទរបស់នាងដែលល្បីដំបូងនៅផលិតកម្មនេះ គឺបទ “សង្សារមួយថ្ងៃសង្សារមួយជីវិត” និង បទ “honey សំណព្វចិត្ត” ក្រោយមកទៀត នាងចាក់ផ្ដើមល្បីខ្លាំងជាមួយប្រភេទបទ ញាក់ បែកស្លុយ ក្នុងនោះមានបទ "ចាក់ទឹកដូង" និងបទ "នំប៉័ងប៉ាតេ" ជាដើម។
តាមការបញ្ជាក់របស់តារាចម្រៀងស្រី នាង និងផលិតកម្មសាន់ដេ នឹងផុតកុងត្រាការងារជាមួយគ្នានៅខែក្រោយនេះហើយ។ យ៉ាងណា នាងមិនច្បាស់នៅឡើយថា បន្ទាប់ពីនោះ នឹងធ្វើអ្វីទៀត ឬបន្តកុងត្រាជាមួយគ្នាទៀត។ យូរី ថា អំឡុងពេលនេះ នាងកំពុងពិចារណាលើបញ្ហានេះ មុនសម្រេចចិត្តចុងក្រោយ៕
