- 2020-07-14 04:46:38
- ជីវិតតារា
ជោគជ័យណាស់តើ ស៊ីន យូប៊ីន ក្ដាប់តំណែងទូតសុច្ឆន្ទៈ៧ផលិតផល?
- 2020-07-14 04:46:38
- ចំនួនមតិ 0 | ចំនួនចែករំលែក 0
ជោគជ័យណាស់តើ ស៊ីន យូប៊ីន ក្ដាប់តំណែងទូតសុច្ឆន្ទៈ៧ផលិតផល?
ចន្លោះមិនឃើញ
ភាពជោគជ័យក្នុងអាជីពសិល្បៈរបស់តារាសម្ដែង ស៊ីន យូប៊ីន បានលើកនាងឲ្យកាន់តែខ្ពស់ និងមានមុខមាត់ក្នុងសង្គម រហូតដល់នាងក្ដាប់បានគម្រោងរកស៊ីខ្នាតអន្តរជាតិចំនួន៤ និងតំណែងជាទូតសុច្ឆន្ទៈរបស់ផលិតផលនាំចូល និងចែកចាយផ្ដាច់មុខនៅកម្ពុជាចំនួន៧ផ្សេងទៀត។
យូប៊ីន និយាយថាបច្ចុប្បន្ននាងមិនអាចបំពេញការងារពេញដៃពេញជើងនៅឡើយទេ ដោយសារបញ្ហាជំងឺកូវីដ-១៩។ ជាក់ស្ដែងដូចជាគម្រោងរកស៊ីនៅក្រៅប្រទេសចំនួន៤ ដែលបានចុះកិច្ចព្រមព្រៀងគ្នារួចហើយនោះ ក៏នាងនៅមិនទាន់អាចចេញទៅបំពេញការងារបាននៅឡើយ។
និយាយពីទំហំប្រាក់ចំណូលពីការសម្ដែង និងឈរឈ្មោះជាទូតសុច្ឆន្ទៈរបស់ផលិតផលទាំងនោះវិញ មិនត្រូវបាននាងបញ្ចេញឲ្យដឹងឡើយ។ ប៉ុន្តែប្រភពខ្លះបង្ហើបថា តួនាទីជាទូតសុច្ឆន្ទៈប្រចាំផលិតផលមួយ អាចទទួលប្រាក់៣ម៉ឺនដុល្លារក្នុង១ឆ្នាំ។ ដូច្នេះគេជឿថា ចំណូលប្រចាំខែរបស់ ស៊ីន យូប៊ីន ក៏មិនណយដែរ ព្រោះនាងបានក្លាយជាទូតសុច្ឆន្ទៈរបស់ផលិតផលល្បីៗចំនួន៧ផ្សេងគ្នា ហើយការងារសិល្បៈរបស់នាងក៏មមាញឹកណាស់ដែរ។
ផលិតផលទាំង ៧នោះ នាងសុំសិទ្ធិមិនបញ្ចេញ ដោយសំអាងថា កុំអោយមានការប៉ះពាល់ឈ្មោះផលិតផល និងឈ្មោះផលិតផល។
ឈរនៅលើភាពជោគជ័យនេះ យូប៊ីន ក៏មិនភ្លេចគុណសិល្បៈ និងអ្នកគាំទ្រដែរ ដោយនាងប្ដេជ្ញាថា នឹងមិនចោលអាជីពសិល្បៈឡើយ បើមហាជនមិនចោលរូបនាងទេ។ នៅថ្ងៃនេះ យូប៊ីន បានបង្ហាញគន្លឹះមួយក្នុងការទទួលបានជោគជ័យក្នុងអាជីពសិល្បៈ មុននឹងឈោងចាប់បានមុខជំនួញធំៗ ឬចាប់ដៃរកស៊ីជាមួយអ្នកមាននៅក្នុងស្រុក។
យូប៊ីន និយាយថា កត្ដាដែលនាំឲ្យនាងលេចធ្លោក្នុងវិស័យសិល្បៈផ្នែកការសម្ដែង គឺដោយសារតែនាងមានសំណាង ហើយទទួលបានឱកាសល្អៗក្នុងការសម្ដែង គួបផ្សំនឹងការខិតខំរបស់នាងផងដែរ។
ស៊ីន យូប៊ីន៖" យូប៊ីន មិនដែលគិតថាការសម្ដែងណាមួយ ថាយូប៊ីនធ្វើបានល្អហើយនោះទេ តែយូប៊ីននៅតែមើលគំរូសិល្បៈនៅក្រៅប្រទេសដែលល្អៗ ហើយយូប៊ីនបានហាត់រៀនវាឲ្យបានកាន់តែល្អថែមទៀតសម្រាប់ខ្លួនឯង"។
តារាសម្ដែងស្រីរាងតូចច្រឡឹង ស៊ីន យូប៊ីន ទទួលបានការគាំទ្រពីមហាជន ជាពិសេសស្រទាប់យុវវ័យលើការសម្ដែងរបស់នាងតាំងពីឆ្នាំ២០១៤ មក។ នាង កាន់តែមានឈ្មោះបោះសំឡេងក្នុងសិល្បៈ ក្រោយពីនាងបានចូលរួមសកម្មភាពមនុស្សធម៌មួយចំនួន និងថតរឿងភាគជិត២០រឿង៕
