- 2020-08-11 03:30:12
- ព័ត៌មាន
ស្ងាត់មួយរយៈធំហើយ ស្ថានភាពជំងឺស្រីស្អាត សុដាលីកា យ៉ាងណាហើយ!
- 2020-08-11 03:30:12
- ចំនួនមតិ 0 | ចំនួនចែករំលែក 0
ស្ងាត់មួយរយៈធំហើយ ស្ថានភាពជំងឺស្រីស្អាត សុដាលីកា យ៉ាងណាហើយ!
ចន្លោះមិនឃើញ
ដំណឹងពីស្ថានភាពជំងឺរបស់ស្រីស្អាតពូកែរាំចង្វាក់ Kpop តែ ស៊ុនសុដាលីកា បានស្ងប់ស្ងាត់មួយរយៈ ឥឡូវនេះមានដំណឹងថា ស្ថានភាពរបស់នាងបានវិវត្តមកល្អប្រសើរមួយកម្រិតទៀត គិតត្រឹមថ្ងៃទី ១០ ខែសីហា ២០២០ម្សិលមិញនេះ។
លោក តែ ស៊ុនណាង ជាឪពុកបង្កើតបានបង្ហោះរូបមួយសន្លឹកកាលពីថ្ងៃម្សិលមិញ និងបានសរសេរថា "ជូនកូនស្រីមកជួប Fan"។ ដំណឹងនេះបានធ្វើឲ្យមានការចាប់អារម្មណ៍ក្នុងចំណោមអ្នកគាំទ្ររបស់តារាស្រី នៅពេលឃើញ លីកា បង្ហាញខ្លួននៅទីសាធារណៈ។
ចំពោះបញ្ហានេះ លោក ស៊ុនណាង បង្ហើបឲ្យដឹងថា តាមពិតកូនស្រីរបស់លោកបានចេញពីមន្ទីរពេទ្យប្រមាណជិត២ខែហើយ ក្រោយពីនាងទទួលបានជោគជ័យក្នុងការវះកាត់នៅផ្នែកឆ្អឹងខ្នងរបស់នាងដែលមានបញ្ហា។ មកដល់បច្ចុប្បន្ន លីកា ស្ថិតក្នុងការមើលថែរបស់ក្រុមគ្រួសារដោយផ្ទាល់។ ចំពោះការវិវត្តន៍នៃសភាពជំងឺរបស់យុវតីដ៏ស្រស់ស្អាត គឺនាងអាចងើបដើរខ្លួនឯងបានហើយ ហើយស្ថានភាពល្អប្រសើរនេះបានកើតឡើង១សប្ដាហ៍មុន។
នេះជាការវិវត្តន៍មួយដំណាក់កាលទៀត ក្រោយពីនាងអាចប្រឹងងើបអង្គុយដោយខ្លួនឯងបាន បន្ទាប់ពីនាងទទួលការវះកាត់រួច ខណៈមុននោះ គឺនាងមិនអាចកម្រើកខ្លួនបានទាល់តែសោះ។ យ៉ាងណាក៏ដោយ លោក ឪពុកដដែល បញ្ជាក់ថា កូនស្រីរបស់លោកនៅតែត្រូវការជំនួយក្នុងការដើរនៅឡើយទេ។ "បាទគាត់អាចងើបដើរខ្លួនឯងបានតិចហើយ តែគាត់នៅមិនទាន់រឹងប៉ឹងនៅឡើយ បច្ចុប្បន្ននៅគ្រានៅឡើយ។”
បច្ចុប្បន្នកញ្ញា តែ ស៊ុនសុដាលីកា ហៅ លីកា នៅទទួលការព្យាបាលដោយថ្នាំពេទ្យ និងការធ្វើចលនាដែលជាចំណុចសំខាន់។ ដូច្នេះហើយ ថ្នាំពេទ្យតាមការបញ្ជាក់របស់លោកឪពុក ប្រើតែក្នុងរង្វង់១សប្ដាហ៍ទៀតប៉ុណ្ណោះនឹងលែងឲ្យប្រើហើយ។ លោក ស៊ុនណាង បានបញ្ជាក់ថា គ្រូពេទ្យបានណែនាំឲ្យព្យាយាមធ្វើចលនាឲ្យនាងឲ្យបានច្រើន។ ដូច្នេះហើយតាមការវិវត្តន៍ចុងក្រោយនៃស្ថានភាពជំងឺរបស់កូនស្រី លោកថា កូនស្រីទំនងអាចវិលមកប្រក្រតីវិញឆាប់ៗ។
តែ ស៊ុនសុដាលីកា ត្រូវបានប្រិយមិត្តស្គាល់ថាជាយុវតីមានទេពកោសល្យខាងផ្នែករាំចង្វាក់ Kpop ក្នុងក្រុម OMG។ មិនត្រឹមតែមានទេពកោសល្យ ប៉ុន្តែ លីកា ក៏ទាក់ទាញតាមរយៈរូបសម្ផស្សស្រស់ស្អាតលេចធ្លោនៅក្នុងក្រុមទៀតផង។ យ៉ាងណា នាងបានមានបញ្ហាសុខភាពធ្ងន់ធ្ងររហូតដល់ត្រូវចូលទៅរកការព្យាបាលដោយការវះកាត់នៅមន្ទីរពេទ្យមួយក្នុងស្រុកកាលពីដើមខែឧសភា។
អាការនោះលោក តែ ស៊ុនណាង ជាឪពុក ប្រាប់ថា លីកា មានបញ្ហាកើតនៅលើឆ្អឹងខ្នង។ បញ្ហានេះតាមពិត កូនស្រីរបស់លោកកើតមានយូរហើយ ប៉ុន្តែនាងបានព្យាយាមលាក់ លុះចុងក្រោយបំផុតនាងបានជួបឧបទ្ទវហេតុដួលក្នុងការរាំសមមួយ ទើបធ្វើឲ្យជំងឺនៅត្រង់ឆ្អឹងខ្នងនោះ ធ្វើទុក្ខខ្លាំងតែម្ដង។ តាមសាមីខ្លួនបញ្ជាក់នៅថ្ងៃដំបូងដែលនាងប្រកាសប្រាប់អ្នកគាំទ្ររបស់នាង គឺនាងមិនអាចកម្រើកខ្លួនបានឡើយនាពេលនោះ៕
