- 2020-09-02 03:59:24
- ជីវិតតារា
វង្ស ថាណាន់ មានប្រវត្តិកម្សត់ស្ទើរមិនគួរឲ្យជឿ ព្រាត់ម្ដាយ-ឪពុកមករស់នៅមណ្ឌលតាំងអាយុ៣ឆ្នាំ
- 2020-09-02 03:59:24
- ចំនួនមតិ 0 | ចំនួនចែករំលែក 0
វង្ស ថាណាន់ មានប្រវត្តិកម្សត់ស្ទើរមិនគួរឲ្យជឿ ព្រាត់ម្ដាយ-ឪពុកមករស់នៅមណ្ឌលតាំងអាយុ៣ឆ្នាំ
ចន្លោះមិនឃើញ
លោក វង្ស ថាណាន់ បច្ចុប្បន្នបានក្លាយជាតារាចម្រៀងអាជីពក្នុងផលិតកម្ម Galaxy Navatra ដែលកំពុងពេញនិយម ប៉ុន្តែនៅពីក្រោយភាពជោគជ័យលើអាជីពនេះ លោកមានប្រវត្តិកម្សត់ និងតស៊ូខ្លាំងដោយត្រូវបង្ខំចិត្តមករស់នៅក្នុងមណ្ឌលតាំងពីខ្លួនទើបមានអាយុ ៣ឆ្នាំ ក្រោយឪពុកម្ដាយបានបែកបាក់គ្នា។
តាមប្រវត្តិត្រួសៗ វង្ស ថាណាន់ មានស្រុកកំណើតនៅខេត្តកំពង់ចាម និងមានបងចំនួន ៣នាក់ ស្រី២ ប្រុស១ លោកជាកូនពៅ នៅក្នុងគ្រួសារដែលមានម្ដាយឪពុកធ្វើជាទាហានព្រំដែនទាំងពីរនាក់។មានភ័ព្វបានកើតជាកូនពៅក៏ពិតមែន ប៉ុន្តែ ថាណាន់ មិនបានទទួលភាពកក់ក្ដៅពីគ្រួសារឡើយ ដោយសារតែ ម្ដាយឪពុករបស់លោក បានលែងលះគ្នាតាំងពីលោកនៅតូចៗ ពោលគឺតាំងពីលោកមានអាយុប្រមាណ ៣ឆ្នាំម្ល៉េះ។
“ខ្ញុំចាំមិនសូវច្បាស់ទេ តែបើតាមបងស្រីខ្ញុំប្រាប់ គឺគាត់ដូចជាបានយកខ្ញុំមកដាក់នៅមណ្ឌលតាំងពីអាយុ ៣ឆ្នាំ ក្រោយម៉ែ និងពុកបានបែកគ្នា!”។ ថាណាន់ បានរស់នៅក្នុងមណ្ឌលមួយស្ថិតក្នុងខេត្តកំពង់ស្ពឺ រហូតដល់ធំពេញរូបពេញរាង ទើបសម្រេចចិត្តសុំមណ្ឌលចាកចេញ ហើយមកផ្សងព្រេងរកអនាគតនៅលើដីក្រុង ទាំងមិនដឹងកោះត្រើយ។
មកដល់ដីក្រុងដំបូង ដោយសារមិនមានសមត្ថភាពអ្វីពិសេស ឬចំណេះជំនាញអ្វីពិតប្រាកដ ការងារដំបូងដែល ថាណាន់ ទទួលបាននោះ គឺធ្វើជាកម្មករសំណង់។ ការងារនេះ គឺពិតជាលំបាក ដែលត្រូវធ្វើការច្រើនម៉ោង ក្រោមកំដៅថ្ងៃ ហើយបានកម្រៃតិចថែមទៀត។ ដូច្នេះហើយ តារាចម្រៀងមានប្រវត្តិកម្សត់រូបនេះ ក៏បានប្ដូរមកធ្វើជាសន្តិសុខក្រុមហ៊ុនឯកជនម្ដង។
ថាណាន់ ត្រូវថ្នាក់លើចាត់ឲ្យទៅយាមប្រចាំការនៅតាមរោងចក្រ សណ្ឋាគារ និងមន្ទីរពេទ្យជាដើម។ ត្បិតថា មិនពិបាកខ្លាំង តែក៏មិនស្រួលដែរ ដោយសារតែត្រូវយាមច្រើនម៉ោង មិនសូវមានពេលសម្រាក ហើយកម្រៃក៏តិច ដូច្នេះហើយក៏សម្រេចឈប់ទៀត ប្ដូរទៅធ្វើជាកម្មកររោងចក្រវិញ។ ធ្វើបានមួយរយៈ ក៏បានប្ដូរម្ដងទៀត ទៅធ្វើជាអ្នករត់តុក្នុងភោជនីយដ្ឋានមួយនៅម្ដុំភ្នំពេញថ្មី។
ការងារចុងក្រោយមួយនេះ បានចាប់ផ្ដើមហុចឱកាសថ្មីឲ្យលោក ដោយពេលកំពុងធ្វើជាអ្នករត់តុ ដោយមាននិស្ស័យចូលចិត្តខាងចម្រៀង លោកក៏ចេះតែស៊ើបៗរកការងារផ្នែកចម្រៀង ហើយក្រោយមកក៏ដឹងថា មានគេរើសតារាចម្រៀងប្រចាំផ្សាររាត្រី លោកក៏សម្រេចចិត្តទៅដាក់ពាក្យ។
“ខ្ញុំក៏បានទៅដាក់ពាក្យ ហើយពេលនោះ គឺមនុស្សច្រើនណាស់បងអើយ ចេះតែដាក់ៗទៅ តែគ្មានសង្ឃឹមទេ...តែសំណាងល្អ ខ្ញុំក៏បានជាប់ជាតារាចម្រៀងប្រចាំផ្សាររាត្រីហ្នុងទៅ!”។ ថាណាន់ បានធ្វើជាតារាចម្រៀងប្រចាំផ្សាររាត្រីប្រមាណ១ឆ្នាំ ហើយក្រោយមកក៏បានធ្វើទៅធ្វើជាតារាចម្រៀងប្រចាំភោជនីយដ្ឋានមួយ ដោយទទួលបានប្រាក់កម្រៃគួរសមដែលលោកអះអាងថា ជីវភាពរបស់លោកបានប្រសើរជាងមុនបន្តិច។
ត្បិតយ៉ាងនេះក្ដី នេះមិនមែនជាក្ដីស្រមៃចុងក្រោយរបស់លោកថា វង្ស ថាណាន់ ប្រាប់ថា លោកតែងមានគោលបំណងក្លាយខ្លួនជាតារាចម្រៀងអាជីព។ ដូច្នេះហើយ លោកក៏តែងតែបានដាក់ពាក្យចូលប្រឡងក្នុងកម្មវិធីចម្រៀងជាច្រើន ក្នុងនោះបើទោះជាលោកមិនបានជាប់ជយលាភីអ្វី ប៉ុន្តែអ្វីដែលរាប់ថាជោគជ័យរបស់លោក នោះ គឺមានទស្សនិកជនកាន់តែច្រើនបានស្គាល់លោក។
ក្រោយចាប់មានគេស្គាល់ វង្ស ថាណាន់ តែងតែផលិតបទចម្រៀងខ្លួនឯង និងច្រៀង Cover របស់រៀមច្បងខ្លះបង្ហោះលើបណ្ដាញសង្គម ដើម្បីថែរក្សាកេរ្តិ៍ឈ្មោះរបស់លោក។ ដូចសុភាសិតខ្មែរមួយពោលថា "ព្យាយាមគង់បានសម្រេច" ទីបំផុត ថាណាន់ បានសម្រេចក្ដីស្រមៃរបស់លោក ក្រោយត្រូវ Galaxy Navatra បានជ្រើសរើសយកធ្វើជាតារាចម្រៀងអាជីពប្រចាំផលិតកម្មរបស់ខ្លួន ក្នុងតាមចចាមអារ៉ាម តារាប្រុសរូបនេះ បានចុះកុងត្រាដល់ទៅ ១០ឆ្នាំឯណោះ៕
