ម្សិលមិញនេះ លេចរឿង ជា វិបុល បង្ខំចិត្តចាកផ្នួសមុនកំណត់ ក្រោយបានបួសបានតែ ១០ថ្ងៃ

2020-10-12 04:23:43
ព័ត៌មាន

2020-10-12 04:23:43
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ជា វិបុល ស្វាមីរបស់អ្នកនាង គង់ សុជាតិ បានប្រាប់ថា លោកបានបង្ខំចិត្តចាកផ្នួសមុនកាលកំណត់ ក្រោយបួសបានតែ ១០ ថ្ងៃប៉ុណ្ណោះ នោះក៏តែនៅក្នុងនោះមានរឿងខ្លះៗ ដែលលោកមិនអាចបន្តនៅតាមការគ្រោងទុកបាន។

ជា វិបុល ត្រូវបានគេឃើញទុកចោលកិច្ចការងារ របររកស៊ីទាំងអស់របស់ខ្លួន ទៅសាងផ្នួសមួយរយៈក្រោយពីបញ្ចប់វេលាបុណ្យភ្ជុំបិណ្ឌប្រពៃណីជាតិរួច។ បន្ទាប់ពីបួសមួយរយៈនោះមក គេស្រាប់តែឃើញពិធីករទូរទស្សន៍រូបនេះ បានលាចាកសិក្ខាបទវិញ។ ចំពោះបញ្ហានេះ សាមីខ្លួនបានប្រាប់ថា តាមពិតលោកបានបង្ខំចិត្តសឹកវិញទេ ព្រោះមិនទាល់ដល់កាលកំណើតដែលបានគ្រោងទុកនោះឡើយ។

ស្វាមីអ្នកនាង គង់ សុជាតិ ប្រាប់ថា ដើមឡើយលោកគ្រោងបួសរយៈពេល ៣សប្ដាហ៍ ក្នុងនោះមានហេតុផល២សម្រាប់ការបួសនេះទី១ដើម្បីលាបំណន់ចំពោះអ្វីដែលលោកបានបន់ស្រន់ហើយបានលទ្ធផលល្អដូចការចង់បាន។ ទី២ទៀត គឺបួសដើម្បីតបគុណរបស់មាតា បិតា។ ប៉ុន្តែអ្វីៗ មិនអាចធ្វើទៅតាមរយៈពេលដែលបានគ្រោងនោះទេ។ "ដំបូងខ្ញុំគិតថា នឹងបួសចំនួន ២១ ថ្ងៃ ប៉ុន្តែជាក់ស្ដែងបានតែ ១០ថ្ងៃទេ ក៏សឹងវិញ...ចំពោះហេតុផលនោះ គឺថា ខ្ញុំមានកិច្ចការច្រើន និងត្រូវប្រញាប់ធ្វើឲ្យហើយ...ទើបមិនអាចបួសយូរទៀត ក៏សម្រេចសឹកវិញទៅ!”។

ការងារសំខាន់មួយ ដែលលោកត្រូវប្រញាប់នោះ គឺការងារផ្នែកអចលនទ្រព្យដែលលោកបានគិតជាយូរហើយ ហើយក៏ទើបនឹងសម្រេចចិត្តនាពេលថ្មីៗនេះ។ លោក ជា វិបុល បង្ហើបថា កាលពីមួយឆ្នាំមុន លោកធ្លាប់បានធ្វើការឲ្យលោក ឡេង និមល ប្អូនប្រុសឧកញ៉ា ឡេង ណាវ៉ាត្រា ដោយធ្វើជាអ្នកសម្របសម្រួលក្នុងពិធីបើកសម្ពោធគម្រោងដីឡូតិ៍មួយកន្លែងនៅម្ដុំវត្តជន្លង់ម្លូ។

បន្ទាប់ពីនោះមកលោកក៏ចាប់ផ្ដើមយល់ខ្លះៗពីការងារអចលនទ្រព្យ ព្រមទាំងបានឃើញឱកាសល្អមួយចំនួនក្នុងវិស័យនេះផង។ដូច្នេះហើយ ក៏បានពិភាក្សាជាមួយភរិយាអំពីការផែនការវិនិយោគនាពេលអនាគត។ ជាលទ្ធផល លោក និងភរិយា ក៏បានឯកភាពគ្នាសាកល្បងជាលើកដំបូង ដើម្បីស្ទង់ទីផ្សារ និងចង់បន្ថែមពិសោធន៍ផង ខណៈ ២០ឆ្នាំកន្លងមក ពួកលោក ធ្លាប់ធ្វើតែការងារសិល្បៈ។

ក្រោយសម្រេចចិត្តលើការងារនេះ ដោយធ្លាប់ធ្វើការងារជាមួយគ្នាស្រាប់ ជា វិបុល និង គង់ សុជាតិ ក៏បានសម្រេចសហការវិនិយោគជាមួយលោក ឡេង និមល ដែលលោកធ្លាប់ធ្វើការឲ្យតែម្ដង។ ភាគីទាំងពីរ បានសម្រេចផ្លែផ្ការួមគ្នា ដោយបានបើកសម្ពោធគម្រោងដីឡូតិ៍ជាផលនៃកិច្ចសហការគ្នាលើកដំបូងម្សិលមិញនេះ នៅភូមិ ព្រៃទទឹង ឃុំ ព្រះនិព្វាន ស្រុកគង ពិសី ខេត្ត កំពង់ស្ពឺ។ ដែលមានចម្ងាយប្រមាណជាង ១០គីឡូម៉ែត្រប៉ុណ្ណោះពីរាជធានី។

លោក ជា វិបុល បានគូសបញ្ជាក់ថា ការងារនេះ គឺលោកមិនមែនធ្វើទទួលកម្រៃពីលោក ឡេង និមល នោះទេ ប៉ុន្តែលោក គឺជាម្ចាស់ភាគហ៊ុនពិតប្រាកដ ដែលបានសហការវិនិយោគ ៥០% ម្នាក់ជាមួយ ប្អូនប្រុសឧកញ៉ា ឡេង ណាវ៉ាត្រា។ ជាមួយគ្នាដៃគូវិនិយោគរបស់លោក ជា វិបុល ក៏បានអះអាងដូចគ្នាថា គូស្វាមី ភរិយា សិល្បៈគូនេះ គឺជាដៃគូវិនិយោគរបស់លោកពិតប្រាកដ។

ភាគីទាំងពីរ បានសម្រេចវិនិយោគរួមគ្នា ៥០% ម្នាក់លើទំហំដីវិនិយោគសរុបចំនួន ១០ ហិកតា ស្មើនឹងជាង ១០០០ឡូតិ៍ ជាមួយនឹងតម្លៃចាប់ពីជាង ៣០០០ដុល្លារឡើងទៅ។ លោក ឡេង និមល បញ្ជាក់ថា នេះជាជំហានដំបូង ប៉ុណ្ណោះ ប្រសិនបើគម្រោងទី១ដែលលោកបានអះអាងពីសក្ដានុពលសេដ្ឋកិច្ចនេះជោគជ័យ ភាគីទាំងពីរនឹងវិនិយោគរួមគ្នាបន្តបន្ទាប់ទៀត៕