- 2020-11-03 08:52:07
- ព័ត៌មាន
ដើម្បីក្ដីសុខរបស់សមាជិកគ្រួសារ១២នាក់ អ៊ឹម ជីវ៉ា សុខចិត្តនៅលីវ ហើយទទួលអម្រែកដ៏ធ្ងន់ទាំងនេះ
- 2020-11-03 08:52:07
- ចំនួនមតិ 0 | ចំនួនចែករំលែក 0
ដើម្បីក្ដីសុខរបស់សមាជិកគ្រួសារ១២នាក់ អ៊ឹម ជីវ៉ា សុខចិត្តនៅលីវ ហើយទទួលអម្រែកដ៏ធ្ងន់ទាំងនេះ
ចន្លោះមិនឃើញ
តារាសម្ដែង និងជាគ្រូបង្រៀនផ្នែករបាំលោក អ៊ឹម ជីវ៉ា កំពុងរ៉ាប់រង ឬចិញ្ចឹមសាច់ញាតិចំនួន១២នាក់ ក្នុងនោះគឺមានប្អូន ក្មួយៗ និងអ៊ុំស្រីម្នាក់ផង។ បន្ទុកនេះ បានបង្ខំឲ្យលោកត្រូវប្រវេប្រវារកប្រាក់បន្ថែមលើអាជីពសិល្បៈ។
ក្នុងឱកាសដែលតារាសម្ដែងរូបនេះចូលរួមក្នុងពិធីសម្ពោធបើកយានដ្ឋានជួសជុល និងលក់រថយន្តរបស់តារាចម្រៀង អ៊ី ណូ កន្លងទៅ លោក បានប្រាប់ Sabay ថា បច្ចុប្បន្នលោកប្រកបមុខរបរចំនួន៣ ដើម្បីរកប្រាក់ផ្គត់ផ្គង់គ្រួសារ គឺទី១ សម្ដែង ឬធ្វើជាពិធីករ ទី២ លោកមានក្រុមទទួលរៀបចំពិធីកាត់នំខួបកំណើត ឬរៀបចំកម្មវិធីផ្សេងៗ និងទី៣ រកស៊ីលក់ដីឡូត៍ជាមួយគេ។
លោក អ៊ឹម ជីវ៉ា មិនបានបង្ហាញពីទំហំប្រាក់ចំណូល ហើយត្រូវចំណាយអ្វីខ្លះដល់សាច់ញាតិទាំង១២នាក់នោះទេ ប៉ុន្ដែប្រភពចំណូលដែលបានមកពីសិល្បៈ និងរកស៊ីក្រៅសិល្បៈ ត្រូវបានលោកបញ្ជាក់ថា មានទំហំប្រហាក់ប្រហែលគ្នា។ ឈរលើប្រភពចំណូលបានមកពីលោកតែម្នាក់នេះ គឺអាចផ្គត់ផ្គង់ការរស់នៅ និងរៀនសូត្ររបស់គ្រួសារលោកបាន។
អ៊ឹម ជីវ៉ា៖"អីចឹងក្នុង១ខែៗ ខ្ញុំត្រូវរ៉ាប់រងធ្ងន់ជាងអ្នកមានគ្រួសារទៀត ហើយឥឡូវនេះខ្ញុំអត់គិតគូរដល់រឿងមានគ្រួសារអីទេ គឺគិតតែខំធ្វើយ៉ាងណាជ្រោងឲ្យក្រុមគ្រួសារខ្ញុំទាំងអស់នេះមានលំនឹងសិន"។
ក្រៅពីមានអាជីពសម្ដែង លោក អ៊ឹម ជីវ៉ា ក៏មានប្រជាប្រិយភាពខ្លាំងណាស់ដែរនៅលើបណ្ដាញសង្គមតាមរយៈសកម្មភាពកៀរគរប្រភពជំនួយពីសប្បុរសជនទៅជួយដល់ជនរងគ្រោះ ជាពិសេសអ្នកសិល្បៈដែលកំពុងជួបការខ្វះខាត។ ឆ្លងកាត់សកម្មភាព និងទឹកចិត្តសប្បុរសនេះ បានធ្វើឲ្យលោកដក់នៅក្នុងចិត្ត ហើយលោកក៏ហ៊ានលះបង់សេចក្ដីសុខផ្ទាល់ខ្លួនមួយផ្នែកធំដើម្បីគ្រួសារ រហូតមកដល់បច្ចុប្បន្ន៕
