ទម្លាយខ្ទេចអស់ហើយ! HyunA ថាការសម្រកទម្ងន់ វាយប្រហារផ្លូវចិត្តនាងសាហាវណាស់

2021-02-11 04:00:00
ព័ត៌មាន

2021-02-11 04:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបាត់មុខមួយរយៈធំ HyunA តារាស្រីទោលសិចស៊ីប្រចាំពិភព K-Pop ក៏បានវិលមកវិញជាមួយនឹងវីដេអូបទថ្មី «I'm Not Cool» និង «GOOD GIRL» តបតាមការទន្ទឹងរង់ចាំពីសំណាក់អ្នកគាំទ្រជាច្រើននាក់គ្រប់ទីកន្លែង។

អមជាមួយនឹងការវិលត្រឡប់មកវិញជាផ្លូវការនេះ HyunA ក៏បានបង្ហាញមុខក្នុងកម្មវិធីជាច្រើនដែរ ក្នុងនោះមានតាំងពីកម្មវិធី Choi Hwajung’s Power Time របស់វិទ្យុ SBS Power FM ដែលពេលនោះហើយដែលនាងបានទម្លាយរឿងរ៉ាវជាច្រើន ទាក់ទងនឹងស្ទីលស្លៀកពាក់ ក៏ដូចជាបញ្ហាមួយចំនួនដែលជាកង្វល់របស់នាង។

HyunA ចាប់ផ្ដើមសារភាពថា៖ «មួយរយៈនេះ ខ្ញុំខិតខំខ្លាំងណាស់ ដើម្បីថែរក្សាសុខភាពរបស់ខ្ញុំ។ ខ្ញុំពិបាកចិត្ត ដោយសារការសម្រកទម្ងន់ដូច្នេះហើយបានជាខ្ញុំព្យាយាមរក្សាកម្រិតជាតិស្ករ និងភេសជ្ជៈដែលមានសារធាតុអ៊ីយ៉ុងឲ្យបានល្អ ដើម្បីជួយឲ្យរាងកាយដំណើរការបានស្រួល។ ជាពិសេសមនុស្សគ្រប់គ្នាក៏តែងចង់ដឹង និងតាមដានខ្ញុំច្រើនដែរ»។

ជាក់ស្ដែងមុនពេលចេញមុខជាផ្លូវការ HyunA ក៏បានធ្វើឲ្យអ្នកគាំទ្រមានការព្រួយបារម្ភដែរ ដោយសារផ្អាកការ Comeback របស់ខ្លួនសិន អាស្រ័យដោយសុខភាពនាងមិនទាន់ស្រួលពេលនោះ។

តារាស្រីរូបនេះបាននិយាយថា នាងជួបបញ្ហាជាមួយនឹងជំងឺបាក់ទឹកចិត្ត ឆាប់ភ័យស្លន់ស្លោ វង្វេងស្មារតី ពិបាកគ្រប់គ្រងអារម្មណ៍ រហូតពេលខ្លះត្រូវដួលសន្លប់ បណ្ដាលមកពីកត្តាផ្សេងៗគ្នាទៀត។ ហេតុនេះហើយបានជាពេលនោះ នាងសម្រេចផ្អាកការចេញមុខជាផ្លូវការសិន និងរង់ចាំដល់សភាពរបស់នាងប្រសើរឡើងវិញ ហើយរហូតមកដល់ថ្ងៃទី ២៨ ខែមករា ឆ្នាំ២០២១ ទើបនាងសម្រេចចេញមុខពិតប្រាកដជាមួយនឹងបទថ្មី៕