ដឹងរឿងរបស់ សេង រដ្ឋា លោក រិទ្ធិ អូមេហ្គា សម្រេចធ្វើរឿងមួយឲ្យ សេង រដ្ឋា ដើរតួឯកភ្លាមៗ

2021-02-19 02:36:53
ព័ត៌មាន

2021-02-19 02:36:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតករវ័យក្មេង លោក រិទ្ធិ អូមេហ្គា បានសម្រេចនិពន្ធភាពយន្តអប់រំខ្នាតខ្លីមួយភ្លាម ដើម្បីផ្តល់ឱកាសឲ្យអតីតកញ្ញាឯក Miss Grand Cambodia 2020កញ្ញា សេង រដ្ឋា សម្តែងជាតួឯក រួមគ្នាជាមួយតារាប្រុសស្រស់សង្ហា លោក តុងលី។

រឿងនេះ លោកកំពុងស្វែងរកដៃគូសហការឧបត្ថម្ភការផលិតផងដែរ។ លោក រិទ្ធិ អូមេហ្គា បានបញ្ជាក់ប្រាប់ថា លោកសម្រេចធ្វើរឿងនេះ ផ្តល់ឱកាសឲ្យកញ្ញា សេង រដ្ឋា ដើម្បីបង្ហាញសមត្ថភាព ក្រោយពីកន្លងទៅមានពាក្យចចាមអារ៉ាមថា នាងអាចនឹងជាប់ក្នុងបញ្ជីខ្មៅរបស់ក្រុមផលិតករនោះ។

តាមផលិតករដដែល តួអង្គស្រីក្នុងរឿង គឺមានបុគ្គលិកលក្ខណៈសមទៅនឹងកញ្ញា សេង រដ្ឋា តែម្ដង ហើយថា ភាពយន្តនេះ លោកទើបនឹងនិពន្ធ ហើយចេញថតភ្លាម ដែលអាចនឹងចាប់ផ្តើមផលិតដោយផលិតកម្ម One Shot Media របស់លោក តែម្តង។ សកម្មភាពថត គ្រោងនឹងចាប់ផ្ដើមនៅចុងខែកុម្ភៈនេះ ដោយចំណាយការថតខ្ទង់ប្រមាណ៣ថ្ងៃខណៈទីតាំងគឺនៅរាជធាភ្នំពេញ។

លោកបញ្ជាក់ដែរថា ខ្លឹមសារអប់រំសំខាន់នៅក្នុងភាពយន្តខ្លីនេះ គឺការបណ្តុះគំនិតតស៊ូព្យាយាមក្នុងជីវិត បើទោះបីជាកើតមកជាជនពិការក៏ដោយ ការលើកទឹកចិត្តជនពិការ និងបញ្ចប់ការរើសអើងទោលើជនពិការ។ ក្រៅពី សេង រដ្ឋា និងតារាមួយចំនួនទៀត ភាពយន្តខ្លីនេះ ក៏នឹងចូលរួមសម្តែងដោយតារាជើងចាស់ សាវីន ហ្វីលីពផងដែរ ដែលលោករំពឹងថាភាពយន្តនេះនឹងទទួលបានការពេញចិត្តពីទស្សនិកជន ដែលមិនត្រឹមតែផ្តល់ឱកាសសម្រាប់សិល្បករកញ្ញា សេង រដ្ឋា នោះទេ ក៏នឹងរួមចំណែកលើកកម្ពស់សីលធម៌សង្គមផងដែរ។

ទោះជាយ៉ាងណាលោកក៏កំពុងតែស្វែងរកដៃសប្បុរសជនដែលអាចជួយឧបត្ថម្ភសម្រាប់ភាពយន្តខ្លីនេះផងដែរ។ រិទ្ធិ អូមេហ្គា លើកឡើងថា លោកមិនចង់យកចំណេញអ្វីពីភាពយន្តនេះទេ ពិសេសរទេះជនពិការ១គ្រឿងដែលប្រើដោយប្រព័ន្ធបច្ចេកវិទ្យាថ្មី តម្លៃ១ពាន់ដុល្លារដែលប្រើប្រាស់សម្រាប់ថតភាពយន្តខ្លីនេះ ក៏នឹងត្រូវប្រគល់ជូនទៅជនពិការណាម្នាក់ដែលមានជីវភាពខ្វះខាត នៅពេលដែលថតភាពយន្តនេះចប់ដែរ។

តាមគម្រោង ភាពយន្តអប់រំខ្លីមានរយៈពេលប្រមាណ១០នាទីនេះ នឹងត្រូវបញ្ចេញក្នុងអំឡុងថ្ងៃ ៨ ខែមីនា ឆ្នាំ២០២១នេះចំថ្ងៃនៃទិវានារីអន្តរជាតិ។ ភាពយន្តនេះក៏អមដោយការបញ្ចូលនូវបទចម្រៀងសំខាន់មួយបទច្រៀងដោយកញ្ញា ចេនី គឺបទ "ពួកយើងមិនគួរស្គាល់គ្នាពីដំបូង" ដែលនិពន្ធទំនុកច្រៀង និងបទភ្លេងដោយលោក រិទ្ធិ ប្រុសពៅ ថែមទៀត៕