តាមការវិភាគ BTS អាចនឹងចូលទាហានជាមួយគ្នា នៅពាក់កណ្ដាលឆ្នាំ ២០២២

2021-04-21 01:23:00
ព័ត៌មាន

2021-04-21 01:23:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមអ្នកវិភាគម្នាក់ពីក្រុមហ៊ុនទីផ្សារមូលធន Leading Investment and Securities ដែលកំពុងព្យាករណ៍ថា សមាជិក BTS នឹងចូលទាហានជាមួយគ្នានៅពាក់កណ្ដាលឆ្នាំ ២០២២។

លោក Yoo Seong Man អ្នកវិភាគម្នាក់ពីក្រុមហ៊ុន Leading Investment and Securities បានបញ្ចេញរបាយការណ៍មួយលើកឡើងពីក្រុមហ៊ុន HYBE និងបានបង្ហាញការជឿជាក់ថា សមាជិក BTS នឹងចូលបម្រើជាតិរួមគ្នាតែម្ដង។

«ខ្ញុំគិតទុកមុនថា សមាជិក BTS នឹងចូលទាហានជាមួយគ្នានៅពាក់កណ្ដាលឆ្នាំ ២០២២។ ដោយសារ អ្វីៗដែលបានរៀបចំមុន (Pre-Production) មានដូចជាអាល់ប៊ុមជាដើម ដែលត្រូវបានត្រៀមទុក មុនថ្ងៃចូលទាហានរបស់ពួកគេ ហើយវានឹងមានចន្លោះពេលត្រឹម ១ឆ្នាំប៉ុណ្ណោះ (ដែលគ្មានអ្វីថ្មីពី BTS)។

BTS គឺជាតារាល្បីប្រចាំពិភពលោកលំដាប់ Michael Jackson ឬ The Beatles ដូច្នេះពួកគេអាចបន្តបង្កើតចំណូលបានដដែល សូម្បីបន្ទាប់ពីពួកគេបញ្ចប់កាតព្វកិច្ចជូនជាតិរួចក៏ដោយ»។ នេះបើតាមការបញ្ជាក់ពីអ្នកវិភាគដដែល។

បន្ថែមពីលើនេះ លោក Yoo Seong Man ក៏បានលើកឡើងដែឬថា HYBE នៅមានតារាល្បីៗរបស់កូរ៉េ និងបរទេសហូរហែ ដែលនៅបំពេញចន្លោះ អំឡុងពេល BTS ជាប់បំពេញកាតព្វកិច្ចក្នុងជួរទាហាន។ តួយ៉ាងដូច SEVENTEEN គឺជាមុខសញ្ញាបន្ទាប់ដែលអាចទាញប្រជាប្រិយភាពខ្លាំង បន្ទាប់ពី BIGBANG-EXO-BTS។ ក្រៅពីនេះក៏នៅមាន NU’EST, TXT, ENHYPEN និង GFRIEND ជាដើម។

បន្ថែមពីលើនេះពួកគេក៏នៅមាន Justin Bieber, Ariana Grande ក៏ដូចជាក្រុមថ្មីៗដែលគ្រោងនឹងចេញមុខឆាប់ខាងមុខ។ មិនត្រឹមតែប៉ុណ្ណោះអ្នកវិភាគ Yoo ថែមទាំងបញ្ជាក់ទៀតពីការបោះជំហានកាន់តែធំរបស់ HYBE តាមរយៈ Weverse ហើយតាមការរំពឹងទុកតារារបស់ YG រួមមាន BLACKPINK ជាដើម ក៏នឹងអាចក្លាយជាមុខសញ្ញាចូលមកកាន់គ្រួសារ Weverse របស់ HYBE ដែរ។

ងាកត្រឡប់ទៅខែធ្នូ ឆ្នាំ ២០២០ ក្រសួងការពារជាតិកូរ៉េ បានអនុម័តការធ្វើវិសោធនកម្មនៃច្បាប់យោធាដែលអនុញ្ញាតឲ្យតារា K-Pop ដែលបានធ្វើឲ្យវប្បធម៌កូរ៉េរះចែងចាំង មានមុខមានមាត់ខ្លាំងលើឆាកអន្តរជាតិ អាចពន្យារចូលទាហានបានរហូតដល់អាយុ ៣០ ឆ្នាំ។ ប្រសិនបើ BTS ត្រូវបានគេចាត់ទុកថាមានសិទ្ធិទទួលនេះ ដូច្នេះសមាជិកអាយុច្រើនជាងគេរបស់ក្រុម នឹងអាចពន្យារពេលចូលទាហានបានរហូតដល់ឆ្នាំ ២០២២។ ជាមួយគ្នានោះ បើការព្យាករណ៍របស់ Yoo Seong Man ពិតជាត្រឹមត្រូវនោះមានន័យថាសមាជិក BTS ផ្សេងទៀតនឹងចូលរួមក្នុងពេលតែមួយជាមួយជិន។