- 2021-06-15 03:31:10
- ព័ត៌មាន
មិនដឹងមានមូលហេតុអី? ដេននី ក្វាន់ ប្រកាសចេញថតរឿងឡើងវិញ តែបដិសេធការថតម៉ូត
- 2021-06-15 03:31:10
- ចំនួនមតិ 0 | ចំនួនចែករំលែក 0
មិនដឹងមានមូលហេតុអី? ដេននី ក្វាន់ ប្រកាសចេញថតរឿងឡើងវិញ តែបដិសេធការថតម៉ូត
ចន្លោះមិនឃើញ
តារាស្រីស៊ិចស៊ី ដេននី ក្វាន់ ដែលទើបផ្ទុះចាប់អារម្មណ៍ជាថ្មីក្រោយមានក្ដីក្ដាំជាមួយម្ចាស់សណ្ឋាគារមួយនៅខេត្តព្រះសីហនុ បានបង្ហើបថានាងនឹងប្រឡូកក្នុងអាជីពសិល្បៈឡើងវិញក្នុងពេលឆាប់ៗនេះ។ នាងថាថតភាពយន្តខ្នាតធំ ឬរឿងភាគ ប៉ុន្តែនាងបដិសេធមិនទទួលសម្រាប់ការថតម៉ូត ឬស្ពតពាណិជ្ជកម្មឡើយ។
កន្លងទៅនាងធ្លាប់ប្រាប់បណ្ដាញសារព័ត៌មានក្នុងស្រុកថា នាងអាចនឹងប្រឡូកក្នុងអាជីពសិល្បៈពេញលេញចាប់ពីខែកុម្ភៈ ឆ្នាំ២០២១ ប៉ុន្តែគិតមកដល់ខែមិថុនា នេះ គេមិនទាន់ឃើញនាងចេញថត ឬបង្ហាញរឿងដំបូងដែលនាងចាប់ផ្ដើមថតឡើងវិញនោះនៅឡើយទេ។ ជុំវិញបញ្ហានេះ ដេននី ក្វាន់ បានបញ្ជាក់ប្រាប់ Sabay យ៉ាងខ្លីថា"ខ្ញុំនឹងចាប់ផ្ដើមថតឆាប់ៗនេះហើយ តែខ្ញុំអត់ថតខាងដើរម៉ូតទេ"។
បញ្ជាក់បានត្រឹមនេះ ប្រព័ន្ធទូរស័ព្ទក៏រអាក់រអួលដាច់បាត់ទៅ ហើយទូរស័ព្ទទៅម្ដងទៀតក៏លែងចូល។ ក្រោយមកទៀត Sabay បានព្យាយាមទាក់ទងទៅកាន់តារាស្រីរូបនេះជាច្រើនដង តែនាងលែងទទួល។ គិតត្រឹមថ្ងៃទី១៥ ខែមិថុនា Sabay មិនទាន់អាចទាក់ទងកញ្ញា ដេននី ក្វាន់ ដើម្បីសួរលម្អិតថាពេលនេះមានក្រុមហ៊ុន ឬផលិតកម្មណាមួយមកទាក់ទងនាងថត ឬនៅ? ហើយរឿងដំបូងដែលនាងត្រូវថតក្នុងឆ្នាំ២០២១ នេះ គឺជារឿងអ្វីនៅឡើយទេ។
ដេននី ក្វាន់ បានឃ្លាតឆ្ងាយពីសិល្បៈ ហើយងាកទៅចាប់យកអាជីពលក់គ្រឿងសម្អាង និងលក់គ្រឿងសង្ហារឹមដែលចំណាយទុនរាប់ម៉ឺនដុល្លារអស់រយៈពេលប្រហែល១ឆ្នាំ។ ការផ្អាករបស់នាង ក្រោយពីរងការព្រមានធ្ងន់ៗលើរូបនាង ក្រោយពីនាងបញ្ចេញរូបថតស៊ិចស៊ីហួសហេតុដែលធ្វើឲ្យមហាជនផ្ទុះការរិះគន់ ហើយក្រសួងវប្បធម៌ និងវិចិត្រសិល្បៈក៏ចាត់ទុកថាវាជារូបភាពដែលធ្វើឲ្យប៉ះពាល់ដល់តម្លៃនារីខ្មែរ៕
