អ៊ុក សុវណ្ណារី ផ្ដើមវាយលុកហើយ ខណៈបទ “មនុស្សស្មោះ ជួបតែមនុស្សក្បត់!” ចាក់បេះដូងណាស់

2021-06-28 02:34:02
ព័ត៌មាន

2021-06-28 02:34:02
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងតូចរបស់ Galaxy Navatra ហាក់ចាប់ផ្ដើមវាយលុកទីផ្សារឡើងក្រោយស្ងប់ស្ងាត់១រយៈ ដោយគេឃើញនាងមានបទថ្មីចេញច្រើននារយៈកាលចុងក្រោយ ហើយក្នុងនោះបទ "មនុស្សស្មោះ ជួបតែមនុស្សក្បត់" ពីរោះចាក់បេះដូងណាស់។

បទនេះ ទើបត្រូវឃើញផលិតកម្មធំរបស់នាង បញ្ចេញនៅលើយូធូបរបស់ផលិតកម្មកាលពីថ្ងៃម្សិលមិញ និងកំពុងទទួលបានការចាប់អារម្មណ៍។ ប្រិយមិត្តជាច្រើនបានពោលសរសើរថា ពីរោះទាំងភ្លេង ខ្លឹមសារវេញចូលគ្នា ចាក់បេះដូងអ្នកស្ដាប់។ មិនត្រឹមប៉ុណ្ណឹង តាមរយៈបទនេះ ប្រិយមិត្តក៏បានឃើញ អ៊ុក សុវណ្ណារី វិវត្តវ័យកាន់តែជិតពេញក្រមុំ។

ពួកគេលើកឡើងថា តារាចម្រៀងតូច ឥឡូវរឹតតែស្អាត សំឡេងនៅតែពីរោះ បន្ថែមពីលើនេះ ការសម្ដែងក៏សាកសមថែមទៀត ស្របពេលអត្ថន័យ ស៊ីនឹងស្ថានភាពបច្ចុប្បន្ននៃស្នេហាយុវវ័យ។ ដូច្នេះហើយ ទើបឃើញប្រិយមិត្តជាច្រើនបានចូលទៅសរសេរសារ ហើយអ្នកខ្លះ បានលើកពីសាច់រឿងដែលខ្លួនធ្លាប់ជួបមកធៀបនឹងបទនេះទៀតផង។

“មនុស្សស្មោះ ជួបតែមនុស្សក្បត!” គឺជាបទមួយក្នុងចំណោម៣ ដែល Galaxy Navatra បានបញ្ចេញឲ្យ អ៊ុក សុវណ្ណារី ក្នុងរយៈពេលតែ១សប្ដាហ៍។ បទថ្មីចុងក្រោយមួយរបស់នាង គឺបទ "មនុស្សនោះប្ដូរឈាមហើយ" ទើបនឹងចេញនៅថ្ងៃនេះ។

ស្ថានភាពនេះ គេមើលឃើញថា ផលិតកម្មផ្ដើមជ្រោង តារាចម្រៀងតូចវាយលុកទីផ្សារម្ដងទៀតហើយ ក្រោយពីកន្លងមក គេឃើញថា តារាចម្រៀងរៀមច្បងមានដូចជា តន់ ច័ន្ទសីម៉ា ព្រាប សុវត្ថិ ខេម មានសកម្មភាពជាង។ ចំពោះស្ថានភាពនេះ គេមិនដឹងថា យ៉ាងណានោះទេ ខណៈ ថ្នាក់ដឹកនាំផលិតកម្ម នៅមិនទាន់អាចភ្ជាប់ដើម្បីសុំការអធិប្បាយបាន។ យ៉ាងណា តោះ...ស្ដាប់បទ ដែលចាក់បេះដូងមួយនេះសិនទាំងអស់គ្នា៖