- 2021-06-28 06:20:00
- ព័ត៌មាន
នេះជាមូលហេតុធំនាំឲ្យ Big Hit រាងចាលមិនចង់បង្កើតក្រុមនារីយ៉ាងយូររាប់ឆ្នាំកន្លងមកនេះ
- 2021-06-28 06:20:00
- ចំនួនមតិ 0 | ចំនួនចែករំលែក 0
នេះជាមូលហេតុធំនាំឲ្យ Big Hit រាងចាលមិនចង់បង្កើតក្រុមនារីយ៉ាងយូររាប់ឆ្នាំកន្លងមកនេះ
ចន្លោះមិនឃើញ
ផលិតកម្ម Big Hit បានប្រកាសជ្រើសរើសច្បាស់ៗ តែចំពោះបេក្ខភាពជាបុរសប៉ុណ្ណោះ កន្លងមកច្រើនឆ្នាំមកនេះ។ ទោះបីលោក Bang Shi Hyuk មិនដែលបង្ហើបពីមូលហេតុពីក្រោយ ក៏ប៉ុន្តែមានមតិជាច្រើនលើកឡើងថា ទំនងដោយសារមេរៀនដែលលោកជួបប្រទះនៃការបរាជ័យរបស់ក្រុមនារីមានឈ្មោះថា GLAM (ក្រុមនារីដំបូងរបស់ Big Hit)។
មុន BTS បង្កើត លោក Bang Shi Hyuk បានចាប់ដៃគូសហការជាមួយនឹងផលិតកម្ម Source Music ដោយបានសម្រេចបង្កើតក្រុមចម្រៀងនារីមួយក្រុម។ នៅខែកក្កដា ឆ្នាំ២០១២ ក្រុមចម្រៀង GLAM ក៏ត្រូវបានបង្កើតពិតមែន។
ក្រុមនេះមានសមាជិកទាំងអស់ ៥នាក់ ហើយបង្ហាញមុខជាមួយនឹងបទថ្មី ដែលលោក Bang Shi Hyuk និង Pdogg ជាអ្នកសម្រិតសម្រាំងឲ្យមានចំណងជើងថា «Party (XXO)»។
ប៉ុន្តែក្រោយមក សមាជិកម្នាក់ដែលមានឈ្មោះថា TRINITY ក៏បានចាកចេញពីក្រុមនៅឆ្នាំ ២០១២ ហើយផលិតកម្ម Source Music បានប្រកាសថានាងមានបញ្ហាផ្ទាល់ខ្លួន ដោយក្រោយមកស្រាប់តែអ្នកគាំទ្រដឹងថា សមាជិករូបនេះធ្លាប់ជា “Sasaeng Fan” ឬអ្នកគាំទ្រជ្រុលនិយម ដែលតែងតាមស្អិត និងធ្វើរឿងគួរឲ្យខ្មាសជាច្រើនដាក់ Lee Teuk (Super Junior) តាំងពីមុននាងចេញមុខទៅទៀត។
បន្ទាប់មកសមាជិកក៏នៅសល់ត្រឹម ៤នាក់ ដោយវិលមកវិញនៅឆ្នាំ ២០១៣ ជាមួយនឹងបទ «I Like That» បទដែលរួមគ្នាផលិតដោយ Bang Shi Hyuk, Pdogg និង RM (BTS)។ ប៉ុន្តែលទ្ធផលពីការ Promote ដូចជាមិនចេញមកល្អសោះ ជាហេតុត្រូវបរាជ័យ។
រហូតដល់ខែ កុម្ភៈ ឆ្នាំ ២០១៤ GLAM បានចេញបទថ្មីមួយមានចំណងជើងថា «Special Gift [Give It 2 U]» ដែលជាបទចុងក្រោយបង្អស់របស់ពួកគេ។
ដោយសារលទ្ធផលដូចជាមិនហុចផ្លែផ្កាមកដូចចិត្ត សមាជិកក៏ពិបាកក្នុងការនៅជុំគ្នា។ ក្រោយមក វាកាន់តែមានរឿងធំ ពេលសមាជិកម្នាក់ទៀតឈ្មោះ Dahee ត្រូវគេរកឃើញថា មានជាប់ពាក់ព័ន្ធក្នុងរឿងអាស្រូវនឹងតារាប្រុសដែលមានប្រពន្ធហើយ គឺ Lee Byung Hyun។
នៅខែកញ្ញា ឆ្នាំ២០១៤ Dahee ដែលមានឈ្មោះពិត Kim Si Won ត្រូវបានចាប់ខ្លួនពីបទគំរាមកំហែងតារាសម្ដែង Lee Byung Hun។ នាងបានរួមគំនិតជាមួយនឹងតារាម៉ូដែល Lee Ji Yeon ស្នើឲ្យ Lee Byung Hun បង់ប្រាក់ចំនួន ៤,៥លានដុល្លារ ជាការដោះដូរជាមួយនឹងវីដេអូដែលលួចថតជាសម្ងាត់។ វីដេអូនេះដែរ មានការឲ្យដឹងថា Lee Byung Hun បានប្រើសម្ដីខ្លះដែលមិនគួរឲ្យស្ដាប់ និងមិនសមរម្យ។
ពេល Lee Byung Hun ដាក់ពាក្យប្ដឹង Dahee ក៏ស្រាប់តែប្រញ៉ាប់ទិញសំបុត្រយន្តហោះ ដើម្បីគេចពីការស៊ើបអង្កេត ប៉ុន្តែក្រុមប៉ូលីសមានសមត្ថកិច្ចមិនឲ្យនាងទៅណាទាន់ទេ ដោយចាប់បានជាស្ថាពរនៅថ្ងៃទី០៣ ខែកញ្ញា ឆ្នាំ២០១៤។ ពីពេលនោះមក Dahee ក៏បានទទួលកំហុស និងស្នើសុំឲ្យមានការយោគយល់ និងអនុគ្រោះដោយកាយវិការទន់ភ្លន់។
ឈានដល់ខែមករា ឆ្នាំ២០១៥ ករណីរបស់អតីតតារាស្រីរូបនេះ បញ្ជាក់ចេញមកថា នាងពិតជាមានកំហុស ពីបទគំរាមកំហែង។ ក្នុងពេលជំនុំជម្រះក្ដីដំបូង នាងត្រូវបានតុលាការកាត់ទោសឲ្យជាប់ពន្ធនាគារ ១ឆ្នាំ។ នៅពេលនាងប្ដឹងតប តុលាការក៏កាត់ទោសជាថ្មី ដោយឲ្យជាប់ពន្ធនាគារ ១ឆ្នាំ និងព្យួរទោស ២ឆ្នាំ។ នាងក៏បានបញ្ចប់ការដោយបងពិន័យ ២០ ០០០ដុល្លារ ដោយសារខាង Lee Byung Hun ក៏មិនចង់ឲ្យអ្នកណារងទោសធ្ងន់ធ្ងរអ្វីពេកដែរ។
ដោយសារមានរឿងច្រើនបែបនេះហើយទើប Big Hit សម្រេចបំបែកក្រុមនេះចោល ព្រោះក្រុមហ៊ុនបញ្ជាក់ថា គ្មានសមត្ថភាពក្នុងការរក្សាក្រុមនេះឲ្យដើរទៅមុខតទេ។
ក្រុមអ្នកគាំទ្រផលិតកម្មទាំងអស់ក៏បានលើកឡើងដូចៗគ្នាដែរថា ក្រៅពីករណីល្អក់កកររបស់ក្រុម GLAM វាដូចជាគ្មានបញ្ហាអ្វីផ្សេងរហូតធ្វើឲ្យក្រុមហ៊ុនរាងចាលលែងចង់បង្កើតក្រុមនារីជាយូរឆ្នាំមកនេះទេ។
ទោះជាយ៉ាងណាក៏នៅមានព័ត៌មានជាច្រើនដែរកន្លងមកថ្មីៗ ថាក្រុមហ៊ុននេះក៏មានបំណងចង់បើកទ្វារសម្រាប់ចំណូលថ្មីប៉ែកខាងនារីៗដែរ ដោយពួកគេបានចាប់គូសហការជាមួយនឹងផលិតកម្ម Source Music ជាថ្មីម្ដងទៀត ក្នុងការបង្កើតក្រុមនារីថ្មី ហើយគ្រោងនឹងបង្ហាញមុខក្រុមថ្មីនេះនៅឆ្នាំ ២០២១៕
