ក្រឡេកមើល ហង្សឈា អ្វីៗត្រឡប់មកប្រសើរទាំងព្រម ឥឡូវមានដំណឹងល្អថែមទៀត

2021-07-07 03:19:30
ព័ត៌មាន

2021-07-07 03:19:30
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហង្សឈា ដែលកំពុងរស់នៅសហរដ្ឋអាមេរិកជាមួយក្រុមគ្រួសារ បានរងការយាយីរបស់កូវីដ១៩ ដែលលោក និងពលរដ្ឋអាមេរិកទាំងអស់រស់ក្នុងការភ័យខ្លាច។ ប៉ុន្តែអ្វីៗបានត្រឡប់មករកភាពល្អប្រសើរឡើងវិញ ស្របពេលលោកក៏មានដំណឹងល្អថែមទៀត។

នៅមុនអាចវិលមកជីវភាពធម្មតា ហង្សឈា ប្រាប់ថា លោករស់នៅតែក្នុងផ្ទះរាប់ខែ និងព្យាយាមឆ្ពង់តាមរបៀបខ្មែរបុរាណរាល់ថ្ងៃដែរ ដើម្បីទប់ទល់ និងបញ្ចៀសខ្លួនពីជំងឺកូវីដ១៩ដ៏កំណាចនេះ។ តែឥឡូវអ្វីៗត្រឡប់មកដូចដើម ស្រុកទេសក៏ល្អដូចដើម អាជីវកម្មក៏កំពុងដំណើរការល្អ ហើយរឿងផ្សេងទៀតក៏ល្អដូចគ្នាដែរ។

លោក ហង្សឈា បានបើកដំណើរអាជីវកម្មហាកតែគុជ Boba Tea ជាច្រើនខែមកហើយ ស្របពេលលោកថា អ្វីៗប្រសើរឡើងជាលំដាប់ ក្នុងនោះក្រៅពីលក់រាយ ក៏មានអ្នកទំនាក់ទំនងទិញ Franchise បន្តហូរហែទៀត។ ក្រៅពីមានសញ្ញាណល្អប្រសើរក្នុងអាជីវកម្ម ក៏មានដំណឹងថា តារាប្រុសរូបនេះ ទទួលបានចំណងដៃថ្មីមួយទៀត ពោលគឺភរិយាលោកកំពុងគភ៌កូនម្នាក់ទៀតហើយ។

ចំពោះបញ្ហានេះ សាមីខ្លួន អឹមអៀន ប៉ុន្តែបានទទួលស្គាល់ថាជាការពិត។ លោកថា ភរិយា បាន និងកំពុងពពោះកូនទី៣ម្នាក់ទៀតហើយ។ "បាទ...មែនហើយ មួយទៀតហើយ...និយាយទៅកូវីដហ្នឹងធ្វើឲ្យមានកំណើនបង្កកំណើតច្រើនជុំវិញពិភពលោកហើយបងអើយ(សើច)!”។

លោក ហង្សឈា បានលាចាកវិស័យសិល្បៈក្នុងស្រុកទៅរស់នៅជាមួយភរិយានៅឆ្នាំ ២០០៩។ មកទល់បច្ចុប្បន្ន លោកមានកូន២នាក់ជាចំណងដៃអាពាហ៍ពិពាហ៍ ក្នុងនោះ កូនស្រីច្បងមានអាយុ ១២ឆ្នាំ និងកូនប្រុសប្អូនអាយុ ៩ឆ្នាំហើយ។ ចំពោះកូនទី៣ ដែលកំពុងតាំងគភ៌ មិនទាន់ដឹងថា ប្រុសឬស្រីនោះទេ ដោយសារតែនៅខ្ចីខែពេក។

អតីតតារាសម្ដែងរូបសង្ហារូបនេះ ប្រាប់ថា លោករីករាយណាស់ចំពោះដំណឹងនេះ នឹងត្រៀមខ្លួនសម្រាប់ទទួលកូនពៅ និងរឹតតែរីករាយថែមទៀត ដែលកំណើតកូនរបស់លោកនាពេលខាងមុខ ក្រោយពេលដែលសហរដ្ឋអាមេរិកបានថមថយពីការយាយីរបស់កូវីដ១៩ និងសង្ឃឹមថា ដល់ពេលនោះ អ្វីៗល្អប្រសើរ១០០%។

តាមអតីតតារាសម្ដែង បានឲ្យដឹងថា គិតត្រឹមពេលនេះ ពលរដ្ឋអាមេរិកបានវិលត្រឡប់មកជីវភាពធម្មតាវិញ ដោយក្រុមហ៊ុនតូចធំចាប់ផ្ដើមដំណើរការ ប្រជាជនក៏វិលមកប្រកបកិច្ចការងារធម្មតាវិញដែរ និងមិនចាំបាច់ពាក់ម៉ាសទៀតនោះទេ។ យ៉ាងណា លោកថា នៅមានប្រមាណ ១០%ទៀតដែរ ដែលនៅប្រើប្រាស់ម៉ាស់ដើម្បីការពារ តែអ្នកទាំងនោះភាគច្រើន គឺអ្នកដែលមិនបានចាក់វ៉ាក់សាំង ដោយសារស្ថានភាពសុខភាពផ្ទាល់ខ្លួន៕