- 2021-07-09 07:37:10
- ព័ត៌មាន
ម៉ា ច័ន្ទបញ្ញា លម្អិតពីល្បិចលួចចម្លងអរិយធម៌ និងមរតកជាតិខ្មែរពីសំណាក់ប្រទេសជិតខាង រហូតមានបញ្ហា
- 2021-07-09 07:37:10
- ចំនួនមតិ 0 | ចំនួនចែករំលែក 0
ម៉ា ច័ន្ទបញ្ញា លម្អិតពីល្បិចលួចចម្លងអរិយធម៌ និងមរតកជាតិខ្មែរពីសំណាក់ប្រទេសជិតខាង រហូតមានបញ្ហា
ចន្លោះមិនឃើញ
ដោយមានលើកជាឧទាហរណ៍ជាក់ស្ដែងតារាចម្រៀងប្រុស ម៉ា ច័ន្ទបញ្ញា ប្រាប់ពីល្បិចលួចចម្លងអរិយធម៌ ឬមរតកជាតិសាសន៍មួយពីសំណាក់ជាតិសាសន៍មួយ ខណៈដែលសិល្បករ-សិល្បការិនីខ្មែរកាន់តែច្រើនបានយកបណ្ដាញសង្គមរបស់ខ្លួនធ្វើជាវេទិកាបញ្ចេញមតិ និងប្រតិកម្មរឿងសៀមសង់ប្រាសាទមួយដោយចម្លងរចនាបថតាមប្រាសាទអង្គរវត្តខ្មែរ។
នៅក្នុងសំណេរដ៏វែងអន្លាយមួយបង្ហោះនៅលើគណនីFacebook ផ្ទាល់ខ្លួនរបស់លោក ម៉ា ច័ន្ទបញ្ញា នៅថ្ងៃទី៩ ខែកក្កដា ហើយត្រូវបានក្រុមហ៊ុនFacebook block សារនេះភ្លាមៗ និងផ្អាកដំណើរការគណនីរបស់លោករយៈពេល១ថ្ងៃពេញ។ លោកអះអាងថា បញ្ហានេះ គឺកើតចេញពីការនិយាយចំៗ និងជាចំណុចរសើបរបស់ជាតិសាសន៍មួយ។
តារាចម្រៀងរូបនេះនិយាយថា អ្វីដែលយើងគួរធ្វើពីពេលនេះ មិនមែនទាល់តែមានរឿងគឺស្រែកនោះទេ គួរក្រឡេកមើលពីភាពជាម្ចាស់របស់ខ្លួនយើង។ លោករំលឹករឿងមួយថា ប៉ារបស់លោកធ្លាប់រដ្ឋបញ្ជូនធ្វើទស្សនកិច្ចនៅជប៉ុនជាផ្នែកនៃក្រសួងអភិវឌ្ឍន៍ជនបទ។ ប៉ាលោកបានយករឿងTOYOTA មកចែករំលែកលោកថា៖"យើងដឹងថាមានម៉ាករថយន្ដជាច្រើនចង់ចម្លងពីយើង តែគ្មានអ្នកណាអាចចម្លងព្រលឹងរបស់ពួកយើងបានទេ"។
ដោយឡែករឿងប្រាសាទអង្គរនេះវិញ លោក ម៉ា ច័ន្ទបញ្ញា និយាយថា គេដឹងថាគ្រឹះសំខាន់ នៃអរិយធម៌ស្ថាបត្យកម្ម ត្រូវមានយ៉ាងសព្វគ្រប់ទាំងសិល្បៈ ក្បាច់គុន របាំ ល្ខោន ចម្រៀង អក្សរសាស្ត្រ អក្សរសិល្ប៍ ប្រពៃណី ម្ហូបអាហារ។ បើគេចង់បានក្បាច់គុនខ្មែរ ត្រូវយករបាំ និងល្ខោនជាគោលសិន បើចង់បានចម្រៀងខ្មែរ គេត្រូវយកអក្សរជាគោលសិន បើចង់បានម្ហូបអាហារខ្មែរ ត្រូវយកប្រពៃណីជាគោលសិន។
ម៉ា ច័ន្ទបញ្ញា៖"នេះជាក្បួនចម្លងត្រជាក់យ៉ាងស្ងាត់ៗដែលយើងមិនចាប់អារម្មណ៍ ហើយត្រូវបានគេកំពុងតែធ្វើវាឡើងជាប្រព័ន្ធយ៉ាងសស្រាក់សស្រាំ ដោយយកភាពយន្ត ពាណិជ្ជកម្ម កត្តានយោបាយ ធ្វើជាចំណុចរុញទៅកន្លែងដែលម្ចាស់ដើមដូចយើងទៅមិនដល់ ហើយគេយកតារាល្បីៗ ឆាណែលផ្សព្វផ្សាយល្បីៗ វិធីផ្សព្វផ្សាយប្លែកៗ សេដ្ឋកិច្ច កត្តាភូមិសាស្ត្រ យកមករុញយុទ្ធនាការនេះឲ្យទៅដល់គោលដៅរបស់គេ"។
តារាចម្រៀងរូបនេះបន្ថែមថា នៅលើឆាកអន្តរជាតិដែលយើងទៅមិនទាន់ដល់ ហើយគេបង្កើតភាពជាម្ចាស់ នៃគ្រឹះអរិយធម៌ទាំងនេះ ដោយសម្អាងលើការឈានចូលអន្តរជាតិមុនយើង រួចហើយគេនឹងសាកល្បងម្ដងហើយម្ដងទៀត ទាញជាតឹកតាងថាគេជាម្ចាស់ប្រាសាទ ក្បូរក្បាច់ គំនិតគ្រប់យ៉ាងដែលដូនតាយើងបានបង្កើតឲ្យយើងក្លាយទៅជាអ្នកចម្លងគេទៅវិញ៕
