នៅចាំតួអង្គ"អាហេង"ក្នុងរឿងជួបស៊យអត់? ឥឡូវ ជា សុវណ្ណនរាហ៍ ធ្លាប់តែជួបហេង បែរជាជួបរឿងស៊យផ្ទួនៗគ្នា

2021-07-19 03:13:08
ព័ត៌មាន

2021-07-19 03:13:08
ចំនួនមតិ 0 | ចំនួនចែករំលែក 0

ចន្លោះមិនឃើញ

និយាយដល់ខ្សែភាពយន្តខ្មែរខ្នាតធំរឿង"ជួបស៊យ" ប្រិយមិត្តប្រាកដជានៅចាំមិនភ្លេចលើតួអង្គសំខាន់២រូប គឺអាស៊យ សម្ដែងដោយនាយគ្រឿន និងអាហេង សម្ដែងដោយ ជា សុវណ្ណនរាហ៍។ រឿងនេះទទួលបានការគាំទ្រយ៉ាងខ្លាំងទាំងនៅក្នុងរោងភាពយន្ត និងតាមបណ្ដាញសង្គមកាលពី៣ឆ្នាំមុន ពោលគឺនៅក្នុងឆ្នាំ២០១៩។

ប៉ុន្តែនៅក្នុងឆ្នាំ២០២០ និងឆ្នាំ២០២១ នេះ ជា សុវណ្ណនរាហ៍ ដែលធ្លាប់ដើរជាតួអង្គហេង ហើយលោកក៏តែងតែជួបរឿងហេងៗនៅក្រៅឆាកផងនោះ ស្រាប់តែជួបរឿងស៊យជាច្រើនក្នុងរឿងសិល្បៈទៅវិញ។ លោក ជា សុវណ្ណនរាហ៍ ប្រាប់Sabay ថា ១ឆ្នាំពេញក្នុងឆ្នាំ២០២០ គឺមិនបានចេញថតរឿងអ្វីទាំងអស់ដោយសារតែបញ្ហាកូវីដ-១៩ ហើយមកដល់ឆ្នាំ២០២១ នេះ លោកទទួលរឿងគេបាន២ដែរ ប៉ុន្តែដល់ថ្ងៃចេញថត ត្រូវផ្អាកទៅវិញភ្លាមៗដោយសារបញ្ហាសុខភាព។

ជា សុវណ្ណនរាហ៍៖"ខ្ញុំឈឺតាំងពីចុងឆ្នាំ២០២០ មកបង ឥឡូវគ្រាន់បើហើយ! រឿងដែលខ្ញុំថតហ្នឹង...មាន៣រឿងក្នុងហ្នឹងមាន២រឿងជារឿងបែបអប់រំ តែបន្ទាប់ពីចេញថតបាន១ថ្ងៃ ខ្ញុំក៏cancelគេវិញ(លប់ចោលវិញ) ដោយសារបញ្ហាកូវីដ ហើយគួបផ្សំនឹងសុខភាពខ្ញុំមិនសូវស្រួលផង"។

ទោះជាយ៉ាងណា តារាសម្ដែងរូបសង្ហា ជា សុណ្ណនរាហ៍ មិនបានប្រាប់ពីប្រភេទជំងឺដែលលោកកំពុងសម្រាក និងព្យាបាលនោះទេ ប៉ុន្តែគាប់ជួននឹងវិបត្តិជំងឺកូវីដ-១៩ ផង រយៈពេល២ឆ្នាំនេះគេកម្រឃើញលោកចេញថតពិតមែន។ បើតាមតារារូបនេះ រឿង២ ក្នុងចំណោម៣ដែលលោកត្រៀមថតនោះ គឺមានមួយពីខាងផលិតកម្មអិល ឌី គឺរឿង”The private love” និងរឿងបែបអប់រំ១ទៀតជាការដឹកនាំសម្ដែងរបស់ផលិតកម្ម អឹម អេស អេ(MSA) គឺរឿង"កម្មផល"៕

អត្ថបទ៖ ជិន សុភ័ក្ដ្រ