- 2021-08-04 02:50:11
- ព័ត៌មាន
ប៊ិសនឹងស្លាប់២ដងហើយ! ជា សុវណ្ណនរាហ៍ ចាប់ផ្ដើមអល់អែកក្នុងការទទួលថតរឿងថ្មីបន្ថែមទៀត
- 2021-08-04 02:50:11
- ចំនួនមតិ 0 | ចំនួនចែករំលែក 0
ប៊ិសនឹងស្លាប់២ដងហើយ! ជា សុវណ្ណនរាហ៍ ចាប់ផ្ដើមអល់អែកក្នុងការទទួលថតរឿងថ្មីបន្ថែមទៀត
ចន្លោះមិនឃើញ
កុំថាឡើយទទួលរឿងថ្មីៗបន្ថែមទៀតពីផលិតកម្ម ឬក្រុមហ៊ុនផលិតស្ពតនានា នៅពេលនេះតារាសម្ដែងរូបសង្ហារ ជា សុវណ្ណនរាហ៍ ទ្រាំឲ្យតែថតខ្សែភាពយន្តដែលលោកបានទទួលគេរួចមកហើយនោះចប់ នឹងអាលបានសម្រាកមួយរយៈ ព្រោះលោកចេញទៅថតទីកន្លែងណា គឺត្រូវសម្លឹងរកមើលមន្ទីរពេទ្យឲ្យហើយដើម្បីត្រៀមចូលសង្គ្រោះ។
លោក ជា សុណ្ណនរាហ៍ ប្រាប់Sabay នៅថ្ងៃទី៤ ខែសីហា ថា រូបលោកកំពុងមានជំងឺស្រឺត ឈាមសឡើង និងអស់កម្លាំងល្ហិតល្ហៃដែលធ្វើឲ្យលោកមិនអាចស៊ូទ្រាំនឹងការថតយូរៗ ឬយប់ជ្រៅបានទៀត។ លោកថា កាលពីចុងសប្ដាហ៍មុនលោកដួលសន្លប់ជាលើកទី២ ក្នុងពេលថតរឿង"Private Love"ស្ទើរ១យប់ពេញ ព្រោះចង់បង្ហើយប្លង់ដែលនៅសល់តែ២ប្លង់ទៀតប៉ុណ្ណោះ តែលោកទៅលែងរួច ហើយសូម្បីតែបើកឡានមកផ្ទះខ្លួនឯងក៏មិនរួចផង គឺត្រូវគេជូនមកទៀត។
ជា សុវណ្ណនរាហ៍៖"នៅសល់មួយថ្ងៃទៀតត្រូវទៅថតបញ្ចប់ឲ្យគេនៅកំពត តែដោយមានបម្រាមគោចរក៏ផ្អាកទៅវិញ ហើយខ្ញុំនេះក៏ត្រេកអរដែរបានគេលើកថ្ងៃថត...ដំបូងគេថាត្រូវតែថតបញ្ចប់ឲ្យហើយ ហើយខ្ញុំគិតថាបើមានបញ្ហាអីមើលពេទ្យឲ្យហើយនៅនោះហ្មង"។
ជំងឺស្រឺត និងឈាមសឡើងរបស់តារាសម្ដែងរូបនេះ ក៏ធ្លាប់ធ្វើទុក្ខខ្លាំងម្ដងដែរកាលពីឆ្នាំ២០១៧។ កាលណោះលោកកំពុងតែរត់ហាត់ប្រាណស្ដាតអូឡាំពិកក៏ស្រាប់តែដួលសន្លប់តែម្ដង កុំបានបុរសម្នាក់ជួយសម្រួលចលនា និងមានអ្នកនាំយកទៅពេទ្យក៏បានធូរស្បើយទៅវិញ។ ប៉ុន្ដែរយៈពេលចុងក្រោយនេះ ជំងឺប្រចាំកាយរបស់លោកហាក់រើឡើងវិញ ដែលធ្វើឲ្យអាជីពសម្ដែងរបស់លោកជួបនឹងបញ្ហាមួយចំនួន។
បើតាមតារាសម្ដែងរូបនេះ ចាប់តាំងពីលោកប្រឡូកចូលក្នុងអាជីពសម្ដែងលោកបានថតរឿងឲ្យផលិតកម្មអិល ឌី ប្រហែល១០រឿងហើយ។ ប៉ុន្តែបច្ចុប្បន្នមានផលិតកម្មមួយ បានត្រៀមរឿងអប់រំចំនួន៣សម្រាប់លោកថត តែលោកមិនទាន់ឆ្លើយតបយ៉ាងណានៅឡើយ ខណៈផលិតកម្មមានមួយផ្សេងទៀត បានជួបពិភាក្សាជាមួយលោក ហើយលោកក៏ប្រាប់ពីលទ្ធភាព និងពេលវេលាដែលលោកអាចថតឲ្យគេបាន ព្រោះស្ថានភាពសុខភាពរបស់លោកមិនទាន់ប្រសើរ៕
