- 2021-08-26 03:12:03
- ព័ត៌មាន
តារាស្រីទាំង២ដួងនេះ មានហេតុផលរៀងខ្លួនក្នុងការលាក់បាំងភាពឡុងចុងលើមុខរបរដែលខ្លួនសង្ឃឹមបំផុត
- 2021-08-26 03:12:03
- ចំនួនមតិ 0 | ចំនួនចែករំលែក 0
តារាស្រីទាំង២ដួងនេះ មានហេតុផលរៀងខ្លួនក្នុងការលាក់បាំងភាពឡុងចុងលើមុខរបរដែលខ្លួនសង្ឃឹមបំផុត
ចន្លោះមិនឃើញ
គិតមកដល់ចុងខែសីហា ឆ្នាំ២០២១ តារាចម្រៀង ខាត់ សុឃីម និងតារាសម្ដែង ស្វែង សុជាតា នៅតែព្យាយាមលាក់បាំងមុខរបររបស់ខ្លួន និងទំហំទឹកប្រាក់ខាតបង់ពិតប្រាកដ ក្រោយពីធ្លាយព័ត៌មានថាតារាស្រីទាំង២ដួងនេះ មានម្នាក់ខាតអស់ជិត១លានដុល្លារ និងម្នាក់ទៀតខាតអស់១៩ម៉ឺនដុល្លារ ទៅលើមុខរបរដែលខ្លួនរំពឹងថាជោគជ័យបំផុតតែបែរជាបរាជ័យទៅវិញកាលពីពាក់កណ្ដាលឆ្នាំនេះ។
ចំពោះតារាចម្រៀងស្រីពហុជំនាញ ខាត់ សុឃីម ធ្លាប់ប្រើពាក្យមួយតាមបណ្ដាញសារព័ត៌មានថា៖"មហាជន នឹងភ្ញាក់ផ្អើលហើយលាន់មាត់មកខ្ញុំថា ចុម...កាដុមឆែប ខាត់ សុឃីម"។ នេះ គឺជាពាក្យដែលនាងប្រើស្របពេលដែលប្រកាសលក់ផ្នួង ឬសម្អាងការរបស់ខ្លួន ដើម្បីផ្សែផ្សំលុយបន្ថែមទៅវិនិយោគលើមុខរបរមួយដែលនាងថាធំសម្បើម ហើយប្លែកពីគេនៅស្រុកខ្មែរ។ ប៉ុន្ដែមុខរបរនេះ ត្រូវបាននាងលាក់មហាជនរហូតមកដល់ពេលនេះ ក្រោយពីនាងបង្ហើបថា បានចាញ់បោកប្រាក់គេអស់ជិត១លានដុល្លារ។
សារព័ត៌មានជាច្រើនបានចុះផ្សាយ ដោយស្រង់សម្ដីរបស់តារាស្រីរូបនេះថា ខាត់ សុឃីម បានចាញ់បោកគេអស់ប្រាក់សរុបជិត១លានដុល្លារ ក្នុងនោះប្រាក់ដែលជាកម្លាំងញើសឈាមរកស៊ីផ្ទាល់ខ្លួនចំនួន៧៩ម៉ឺនដុល្លារ និងប្រាក់រាយរងជាប់ខ្លួនមួយចំនួនទៀត។ បើទោះបីជានាងបានបង្ហាញពីទំហំ នៃការខាតបង់នេះទៅហើយក្ដី តែនាងនៅតែលាក់មុខរបរ និងម្ចាស់ក្រុមហ៊ុនដែលនាងចាញ់បោកនោះដដែល ប៉ុន្ដែគេសង្កេតឃើញនាងចេញមុខតវ៉ាជាមួយបាតុករជាច្រើនប្រឆាំងទៅនឹងអគ្គនាយក្រុមហ៊ុន Enaritaឈ្មោះ ឌឹម សួនណាត។
ការចេញមុខតវ៉ា និងបញ្ចេញសកម្មភាពតតាំងនឹងអគ្គនាយកក្រុមហ៊ុនរូបនេះហើយ ដែលធ្វើឲ្យអ្នកគាំទ្រនាងខ្លះយល់ថា ខាត់ សុឃីម អាចនឹងចាញ់បោកក្រុមហ៊ុនវិនិយោគនេះហើយ។ ប៉ុន្ដែខ្លះទៀតសង្ស័យថា ខាត់ សុឃីម អាចចាញ់បោកក្រុមហ៊ុននៅប្រទេសកូរ៉េមួយដែលគ្រោងនាំចូល និងចែកចាយគ្រឿងសម្អាងនៅកម្ពុជា ដោយកន្លងទៅនាងក៏ធ្លាប់បង្ហើបថា នាងមានទំនាក់ទំនងជាមួយក្រុមហ៊ុនមួយ ដើម្បីត្រៀមនាំចូលផលិតសុទ្ធ១០០% ពីប្រទេសកូរ៉េ ដើម្បីមកចែកចាយផ្ដាច់មុខនៅប្រទេសកម្ពុជា។
"ខាត់ សុឃីម ទទួលស្គាល់ខ្លួនឯងថាល្ងង់ ហើយឆាប់ជឿគេ ទើបរបូតប្រាក់អស់មិនចេះតិចនេះ។ ភាពជឿជាក់លើមុខរបរថានឹងដំណើរការ១០០% និងទុកចិត្តគេពេកនេះហើយ ដែលធ្វើឲ្យតារាចម្រៀងស្រីពហុជំនាញរូបនេះ ខ្មាសអៀន ហើយបន្ដលាក់បាំងរឿងនេះរហូតមកដល់បច្ចុប្បន្ន"។
ងាកមករឿងរបស់តារាសម្ដែង ស្វែង សុជាតា វិញ។ នាង បានផ្សែផ្សំប្រាក់ទាំងពីចំណូលសិល្បៈ និងរកស៊ីផ្ទាល់ខ្លួន ដើម្បីសម្ងំរៀបចំដំណើរការរីហ្សតមួយកន្លែងនៅលើដីចម្ការក្បែរជើងភ្នំ ស្ថិតនៅខេត្តជាប់មាត់សមុទ្រមួយចាប់តាំងពីចុងឆ្នាំ២០១៩ រហូតដល់ឆ្នាំ២០២០ ហើយទើបតែមកដល់ពាក់កណ្ដាលឆ្នាំ២០២១ នេះ ស្រាប់តែធ្លាយព័ត៌មានថា ស្វែង សុជាតា បានបរាជ័យលើមុខរបរនោះហើយ ហើយរបូតទាំងប្រាក់អស់ចំនួន១៩ម៉ឺនដុល្លារថែមទៀតផង។
ស្វែង សុជាតា៖"ការដែលលាក់លៀមមិនចង់ឲ្យមហាជន ជាពិសេសអ្នកគាំទ្រដឹងពីស្ថានភាពរស់នៅ និងការខាតបង់នេះ ក៏ដោយសារតែនាងមិនចង់ឲ្យគេឯងដឹងថានាងមានដីចម្ការមួយកន្លែងដែលអាចរៀបចំជារីហ្សតយ៉ាងប្រណីតមួយបាននៅខេត្តជាប់មាត់សមុទ្រ"។
ក្រោយពីខាតបង់លើមុខរបររៀបចំកន្លែងសម្រាប់អ្នកទេសចរណ៍ទៅកម្សាន្ត ដោយមានបញ្ហាជំងឺកូវីដ-១៩ តារាសម្ដែងវ័យជ្រេ ស្វែង សុជាតា បានប្រកាសលក់ផ្ទះ១ល្វែងបន្ទាន់ ក្នុងតម្លៃ៦ម៉ឺនដុល្លារ ដើម្បីធ្វើដើមរកស៊ីមុខរបរផ្សេងវិញ។ កាលណោះនាងប្រាប់Sabay ថា លុយដែលលក់បាននាងនឹងយកទៅធ្វើបញ្ចូលជាភាគហ៊ុនជាមួយមិត្តភ័ក្ដិរកស៊ីខាងនាំចូលផលិតផលពីប្រទេសថៃមកលក់នៅស្រុកខ្មែរវិញម្ដង ប៉ុន្ដែនាងនៅតែចិញ្ចឹមចិត្ដថានឹងរៀបចំដំណើរការរីហ្សតនេះដដែលនៅថ្ងៃណាមួយមិនខាន៕
