- 2021-09-10 03:21:03
- ព័ត៌មាន
ចម្រៀង១បទនេះហើយ ធ្វើឲ្យ ម៉េង កែវពេជ្ជតា ក្ដៅឆេវនៅមិនសុខកាលពីម្សិលមិញ
- 2021-09-10 03:21:03
- ចំនួនមតិ 0 | ចំនួនចែករំលែក 0
ចម្រៀង១បទនេះហើយ ធ្វើឲ្យ ម៉េង កែវពេជ្ជតា ក្ដៅឆេវនៅមិនសុខកាលពីម្សិលមិញ
ចន្លោះមិនឃើញ
អ្នកនាង ម៉េង កែវពេជ្ជតា ដែលកន្លងមកមិនសូវអើពើនឹងរឿងក្នុងសង្គមសិល្បៈទូទៅនោះ នៅថ្ងៃម្សិលមិញបានចេញមកប្រតិកម្មជុំវិញការប្រើប្រាស់បទចម្រៀងមួយបទរបស់តារាចម្រៀង ឬអ្នកច្រៀងតាមនានា។
បទចម្រៀងមួយបទនោះ មានចំណងជើងថា "ជំនោរដើមខែ"។ តាមតារាចម្រៀងរៀមច្បង ចម្រៀងមួយបទនេះ មានប្រភពពីអ្នកចម្រៀងរៀមច្បងជំនាន់សាធារណៈរដ្ឋប្រជាមានិតកម្ពុជា ( ១៩៧៩-៨៩ ) គឺលោកស្រី ម៉ម សុខា ប្រគំភ្លេងដោយក្រុមតន្ត្រី វិទ្យុជាតិកម្ពុជា ។ ប៉ុន្តែអ្នកនាង បានបានកែសម្រួលជាថ្មីខ្លះដេីម្បីតម្រូវតាមតថភាពសង្គមសម័យព្រះរាជាណាចក្រកម្ពុជា គឺប្តូរពីបទចម្រៀងបែបនយោបាយមកជាបែបជីវភាពរស់នៅប្រចាំថ្ងៃរបស់ប្រជាកសិករខ្មែរទូទៅវិញ។
យ៉ាងណាក៏ដោយ ម៉េង កែវពេជ្ជតា លើកឡើងថា អ្នកនាងបានប្រេីពេលប្រេីគំនិត និងដាក់អារម្មណ៍បញ្ចូលតួខ្លាំងណាស់ ទំរាំបទនេះ ក្លាយជាបទចម្រៀងមានអត្ថន័យសមស្រប និងកាន់តែពេញនិយមសម្រាប់អ្នកស្តាប់គ្រប់ស្រទាប់។ ប៉ុន្តែមកដល់បច្ចុប្បន្ន ចម្រៀងមួយនេះ បានលេចឡើងនៅលើប្រព័ន្ធយូធូបដែលច្រៀងដោយតារាចម្រៀងអាជីព និងមិនអាជីពជាច្រើន ដែលធ្វើឲ្យពួកគេទទួលបានការគាំទ្រពីក្រុមអ្នកគាំទ្ររបស់ពួកគេរៀងៗខ្លួន។
នៅក្នុងសកម្មភាពនោះ មិនឃើញមានការផ្ដល់ការគោរព ឬឲ្យតម្លៃទៅលើអ្នកនាងជាអ្នកដែលបានប្រើគំនិតបញ្ញាកែខៃបទនេះរហូតមានភាពពេញនិយមនោះទេ។ បញ្ហានេះ តារាចម្រៀងសំឡេងផ្អែម សង្កត់ធ្ងន់ថា រាល់ការយកទៅច្រៀងឡើងវិញ គួរតែមានការដាក់បញ្ជាក់ម្ចាស់ដើមច្បាស់លាស់ ក្រៅពីពាក្យថា "មរតកដើម"។
"បេីមិនស្គាល់លោកស្រី ម៉ម សុខា ព្រោះគ្មានសំឡេងគាត់នៅ ក៏គួរតែស្គាល់សំឡេង និងស្គាល់មុខរបស់ពេជ្ជតា ស្គាល់អាខោនពេជ្ជតា ដែរ ម្តេចមិនឆាតសួរ ព្រោះថាពួកគេច្រៀងតាមនាងពេជ្ជតា ក្នុងផលិតកម្មឆ្លងដែនទេតេី…!”។
ម៉េង កែវពេជ្ជតា បានចោទសួរបន្តថា ការដែលមិនដាក់បញ្ជាក់ម្ចាស់បទដើម មានចេតនាផ្សេងឬយ៉ាងណា។ អ្នកនាង ចោទជាសំណួរថា "ខ្លាចម្ចាស់ដេីមល្បីជាង ? ខ្លាចគេថាខ្លួនអន់ ? ចង់បំបាត់ឈ្មោះម្ចាស់ដេីម ? ឬចង់អោយជំនាន់ក្រោយច្រលំ ? តេីវាពិបាកជាងម្ចាស់ស្នាដៃខ្លាំងណាស់មែនទេដែលគ្រាន់តែដាក់ឈ្មោះអោយគេដោយមិនចំណាយលុយមួយជ្រុងសេនផង?”.
បន្ទាប់មានប្រតិកម្មបែបនេះ គេឃើញអ្នកគាំទ្រជាច្រើនបានសាទរ ប៉ុន្តែក្រុមមនុស្សផ្សេងក៏បានវាយប្រហារអ្នកនាងដែរថា ការចេញមុខអ្នកនាងនាពេលនេះ មានចរិតច្រណែន ដោយសារឃើញរលកក្រោយល្បីជាង។
យោងតាមច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល ដែលត្រូវបានរដ្ឋសភាអនុម័តអោយប្រើប្រាស់តាំងពីថ្ងៃទី ៣១ មករា ២០០៣ នោះ ការទាមទាររបស់អ្នកនាង ម៉េង កែវពេជ្ជតា សិ្ថតក្នុងសិទ្ធិសីលធម៌ ដែលជាសិទ្ធិមួយក្នុងចំណោម២ធំៗក្នុងច្បាប់ "សិទ្ធិអ្នកនិពន្ធ និងសិទ្ធិប្រហាក់ប្រហែល។
តាម សិទ្ធិសីលធម៌ បានចែងថា៖ គឺជាសិទ្ធិដែលទាមទារការទទួលស្គាល់របស់ម្ចាស់សិទ្ធិ ឬអ្នកនិពន្ធ មានន័យថា អ្នកប្រើប្រាស់ស្នាដៃនានា នឹងត្រូវតម្រូវឲ្យដាក់ឈ្មោះអ្នកនិពន្ធ ឬម្ចាស់សិទ្ធិជាដើមជាចាំបាច់ ហើយខុសពីសិទ្ធិបេតិកភណ្ឌ សិទ្ធិប្រភេទនេះ មិនមានអាយុកាលនោះទេ៕
