តារាចម្រៀងលំដាប់ Legend របស់កូរ៉េគឺ PSY បាន​ប្រកាសពីគម្រោងវិល​មកវិស័យបទ​ចម្រៀងថ្មីផ្ទាល់ខ្លួន​វិញ​នៅឆ្នាំក្រោយនេះ។

អ្នកណា​ក៏បាន​ជ្រាប​ដែរថា ឥទ្ធិពល​នាមជាតារាទោលរបស់ PSY ធំធេង​​ល្បីសុសសាយយ៉ាងណាទាំងក្នុងប្រទេស និង​ពិភពលោក។ នៅ​ឆ្នាំនេះ​ PSY មិន​បាន​ចេញ​អាល់ប៊ុម​សម្រាប់ខ្លួនឯងទេ ក៏ព្រោះ​តែលោកមានអារម្មណ៍ថា វាហាក់បីដូចជាអត់ន័យ បើ​ចេញតែបទ​ចម្រៀង ហើយមិនបាន​សម្ដែង​លើឆាកឲ្យបាន​ស្រួលបួល។

«ប៉ុន្តែ​ទោះជាស្ថិតក្នុងកាលៈទេសៈណាក៏ដោយ ខ្ញុំ​នឹង​ចេញអាល់ប៊ុមទី ៩របស់ខ្ញុំនៅ​ឆ្នាំក្រោយ។ វា​មាន​រយៈពេល​ ២ឆ្នាំហើយ ដែលពួកយើងមានអារម្មណ៍ថាជីវិតប្រចាំថ្ងៃរបស់យើងប្រែប្រួលយ៉ាងណា។ ខ្ញុំ​សង្ឃឹម​ថា​ឆ្នាំក្រោយ យើងអាច​ទទួល​បាន​មក​វិញ​នូវអ្វី​ដែល​យើង​បាន​បាត់បង់ ក្នុងរយៈពេល​ ២ឆ្នាំកន្លងទៅ»។ នេះជាការលើកឡើងរបស់ PSY។

តារាប្រុសរូបនេះ​ត្រូវ​បាន​គេ​ស្គាល់​តាម​រយៈ​បទ​ល្បី​ៗ​ដូចជា​​បទ “New Face”, “Gentleman”, “Gangnam Style”, “Daddy” និង​បទជាច្រើន​ទៀត។ ជាមួយគ្នានោះលោកក៏ត្រូវបានគេស្គាល់​ថា​ជា​ស្តេចប្រចាំព្រឹត្តិការប្រគំតន្ត្រី ហើយ​អ្នកគាំទ្រ​ជាច្រើន​ក៏​កំពុង​ទន្ទឹងរង់​ចាំ​ថ្ងៃ​ ដែល​ការប្រគំ​តន្ត្រី​បើក​ដំណើរការ​ជា​សាធារណៈម្តងទៀតដែរ៕