កូនលាភ! ចាប់កំណើតភ្លាម ហង្ស ឈា ពង្រីកបានអាជីវកម្ម១ ហើយកំពុងស៊ីញ៉េកុងត្រា១ទៀត!

2022-01-27 07:50:59
ព័ត៌មាន

2022-01-27 07:50:59
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហង្ស ឈា ដែលបច្ចុប្បន្នកំពុងគ្រប់គ្រងអាជីវកម្មមួយចំនួន២ស្រាប់នៅអាមេរិកនោះ ឥឡូវបានពង្រីកឲ្យកាន់តែធំ ក្រោយតែប៉ុន្មានថ្ងៃកូនស្រីពៅរបស់លោកបានចាប់កំណើត។

កូនស្រីពៅលោក ហង្ស ឈា មានឈ្មោះ ហង្ស ពេជ្រនិលលី ប្រសូតនៅថ្ងៃសប្ដាហ៍មុន ស្របពេលញាតិមិត្តជាច្រើនបានអះអាងពីភិតភាគដូចនឹងឪពុកបេះបិត។ ស្ថានភាពនេះ បានធ្វើឲ្យអតីតតារាចម្រៀង និងសម្ដែង លង់ចិត្តជាខ្លាំង។ “និយាយមែនរាល់ថ្ងៃ មកធ្វើការអារម្មណ៍នៅតែនឹងមុខកូន ទៅណាមកណានឹកតែកូន ផុតម៉ោងការងារ ចង់តែធ្វើម៉េចឲ្យតែឆាប់មកដល់ផ្ទះ(សើច!)”។ ហង្ស ឈា ថ្លែង។

ក្រៅពីអំណោយផលមុខមាត់ស្រដៀងខ្លាំងនឹងឪពុក ប៉ុន្តែកូនទី៣នេះ បានផ្ដល់អំណោយផលល្អលើការងារមុខរបររកទទួលទានរបស់លោកផងដែរ។ តាមការបញ្ជាក់របស់សាមីខ្លួន ថា ចាប់តាំងពី និលលី មកតាំងគភ៌ក្នុងពោះម្ដាយ មុខអាជីវកម្មរបស់លោកក៏លេចចេញសញ្ញាល្អបន្តបន្ទាប់ បើទោះកូវីដនៅជាឧបសគ្គខ្លះក៏ដោយ ក្នុងនោះមានការស្នើសុំទិញ Franchise អាជីវកម្មលោកហូរហែ។

ចុងក្រោយនេះ លោកទើបនឹងជោគជ័យក្នុងការដំណើរការអាជីវកម្ម Boba Tea របស់លោកសាខាថ្មី ដែលបានបើកសម្ពោធនៅថ្ងៃម្សិលមិញ គឺក្រោយតែប៉ុន្មានថ្ងៃប៉ុណ្ណោះ និលលី ចាប់កំណើត។ "អាជីវកម្មរបស់យើង រាល់ថ្ងៃដំណើរល្អ ដោយពង្រីកបាន ៣សាខាហើយ ហើយសាខាទី៣ ទើបបានសម្ពោធបើកនៅម្សិលមិញនេះឯង ក្រៅពីហ្នឹងយើងក៏បានលក់ Franchise ឲ្យទៅគេច្រើនដែរ នៅបណ្ដារដ្ឋនៅឆ្ងាយៗ តែយើងមិនបាច់រាប់ទេ រាប់តែរបស់យើង គឺ៣សាខានេះ"។

មិនត្រឹមប៉ុណ្ណឹង តាមការបញ្ជាក់ អាជីវកម្មខាងផ្នែកភេសជ្ជៈមួយនេះ ក៏ត្រៀមនឹងបើកដំណើរសាខាទី៤ថែមទៀត ក្នុងវេលាឆាប់ៗខាងមុខ។ លោក ហង្ស ឈា ជាអតីតសិល្បករម្នាក់ ដែលបច្ចុប្បន្នកំពុងរស់នៅក្នុងនាមជានិយោជកមួយនៅលើដីសហរដ្ឋអាមេរិក ដោយលោកកំពុងគ្រប់គ្រងអាជីវកម្មចំនួន ២ ក្នុងនោះទី១ ជំនួញហាងលក់ភេសជ្ជៈយីហោ Boba Tea និងទី២ គឺក្រុមហ៊ុនផ្គត់ផ្គង់បម្រើសេវាកម្មពលកម្មសម្រាប់តម្រូវកិច្ចការងារផ្សេងៗ។

ទិដ្ឋភាពកាល ហង្ស ឈា សម្ពោធហាងទី១

Boba Tea ហាក់មានសន្ទុះល្អ ជាហេតុធ្វើឲ្យលោកអាចពង្រីកសាខា និងលក់ឲ្យគេយកធ្វើអាជីវកម្មបន្ត បានជាច្រើនកន្លែងទៀត។ ស្ថានភាពនេះ គេមើលឃើញលោក ហង្ស ឈា រស់ក្នុងជីវភាពយ៉ាងសមរម្យនៅលើដីប្រទេសមហាអំណាចសេដ្ឋកិច្ចលេខ១។ ជាមួយគ្នា អាជីវកម្មទាំង២របស់លោក ក៏បានផ្ដល់ការងារដល់និយោជិកជាច្រើននាក់ទៀត ទាំងខ្មែរ និងពលរដ្ឋអាមេរិកាំង៕