តាមស្ដាប់ ការងារនេះធំណាស់ តន់ ច័ន្ទសីម៉ា សង្ស័យផ្ទុះទៀតហើយ!

សុក្រ, 4 មីនា 2022 10:22
ព័ត៌មាន

សុក្រ, 4 មីនា 2022 10:22
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង តន់ ច័ន្ទសីម៉ា បានធ្វើឲ្យមានការចាប់អារម្មណ៍មួយឆាវទៀតនៅរសៀលនេះ ក្រោយលេចរូបមួយសន្លឹកស្លៀកឈុតទង់ជាតិកម្ពុជាឈរមុខអង្គរ ឥឡូវនេះដឹងរឿងហើយ។

រូបភាពសន្លឹករបស់ តន់ ច័ន្ទសីម៉ា ដែលស្លៀកឈុតសំលៀកបំពាក់ច្នៃពីរូបទង់ជាតិខ្មែរ ឆ្លុះពណ៌ ខៀវ ក្រហម ជាពណ៌នៃទង់ជាតិខ្មែឬ ត្រូវបានតារាចម្រៀងចែកចាយនៅលើបណ្ដាញសង្គមរបស់នាង ធ្វើឲ្យមានការចាប់អារម្មណ៍។ ក្នុងរូបភាពនោះ មិនត្រឹមតែ សីម៉ា ខ្លួនឯងនោះទេ ប៉ុន្តែគេឃើញមនុស្សជាច្រើនទៀត នៅពីក្រោយនាង សុទ្ធតែស្លៀកឈុតដូចៗគ្នា បង្កើតជាសោភណ្ឌមួយទាក់ភ្នែក។

ភ្លាមៗ គេជឿថា នោះមិនមែនរូបភាពនាង ដើរកម្សាន្ត ហើយថតលេងតាមរបៀបយុវវ័យនោះទេ តែច្បាស់ជាក្នុងកិច្ចការសំខាន់អ្វីមួយមិនខាន។ ប៉ុន្តែគេមិនដឹងថា កិច្ចការនោះជាអ្វីពិតប្រាកដ ខណៈគេមិនបានឃើញតារាចម្រៀងគូសបញ្ជាក់ពីរឿងនេះ។ ជាមួយគ្នា សាមីខ្លួនក៏មិនទាន់អាចសុំការអធិប្បាយបាន។

ប៉ុន្តែលោក យឹម តាស្រង់ នាយកគ្រប់គ្រងផលិតកម្ម Galaxy Navatra បានប្រាប់ថា នោះជាកិច្ចការសំខាន់មួយរបស់ផលិតកម្ម គឺថតវីដេអូចម្រៀងថ្មីមួយបទរបស់តារាចម្រៀងស្រី។ លោកបានបន្តថា វាជាប្រភេទគម្រោងធំមួយរបស់លោក ដែលបទនេះ ចំណាយពេលផលិតច្រើនជាងបទណាៗទាំងអស់ ពោលគឺជាង កន្លះឆ្នាំ។

តាស្រង់ មិនបានអធិប្បាយលម្អិតនោះទេ ថាបទនេះ គ្រោងចេញពេលណា ប្រភេទអ្វី ឬក៏ថាចំណងជើងអ្វី តែលោកបានបង្ហើបចុងក្រោយថា បទនេះ ថតមិនទាន់ចប់នៅឡើយ ពោលគឺត្រូវពេលប្រមាណជា ១សប្ដាហ៍បន្តទៀត។

Galaxy Navatra បានផ្លាស់ប្ដូរពីការផលិតបទលឿនដូចព្យុះកាលពីឆ្នាំមុន មកផលិតមួយៗ ប៉ុន្តែជាប្រភេទបទដែឡមានវិនិយោគច្រើនទាំងថវិកា ពេលវេលា និងចង្វាក់ផលិតកម្ម។ ជាក់ស្ដែងបទ "Lambo Toy” ចេញកាលពីចុងឆ្នាំ ២០២១ បានធ្វើឲ្យកក្រើកទាំងនៅក្នុងស្រុក និងប្រទេសមួយចំនួនទៀតក្នុងតំបន់អាស៊ាន។

ដោយឡែកបទថ្មីនេះ ដែលតាមការបង្ហើបរបស់នាយកគ្រប់គ្រង ថាបានផ្ដើមសង្វាក់ផលិតកម្មតាំងពីជាង កន្លះឆ្នាំមុន អាចនឹងផ្ទុះសារជាថ្មីទៀត។ ដូច្នេះមានតែរង់ចាំតាមដានទាំងអស់គ្នា!