ទទួលពាន៣ ប៉ុន្មានថ្ងៃមុន ឥឡូវធ្លាយរឿង តន់ ច័ន្ទសីម៉ា តម្លៃខ្លួនឡើងដល់ទៅជិត ២០ម៉ឺនដុល្លារ!

ច័ន្ទ, 28 មីនា 2022 03:57
ព័ត៌មាន

ច័ន្ទ, 28 មីនា 2022 03:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងតូចច្រឡឹងរបស់ Galaxy Navatra បានសម្រេចសមិទ្ធផលយ៉ាងអស្ចារ្យដោយទទួលបានពានដល់ទៅ ៣ ពីកម្មវិធី Pleng Music Awards 2022 ហើយមិនប៉ុន្មានថ្ងៃកន្លងមក ក៏លេចដំណឹងពីរឿង តារាស្រីមានតម្លៃពលកម្មខ្ពស់ខ្លាំងថែមទៀតមិនធ្លាប់មាន។

នេះជាដំណឹងថ្មីទៀត ដែលបានលេចឡើងតាមរយៈប្រភពនៅមិនឆ្ងាយពីតារាចម្រៀង។ ដំណឹងអំពីតម្លៃពលកម្មរបស់តារាចម្រៀងមកពីខេត្តតាកែវ បានលេចឡើងជាហូរហែតាំងពី២ឆ្នាំមុន ដែលកាលនោះ ដំណឹងដែលធ្វើឲ្យប្រិយមិត្តបើកភ្នែកធំៗនោះ គឺថា សីម៉ា មានថ្លៃហត់នឿយសម្រាប់ការចេញច្រៀងតាមកម្មវិធីប្រគំតន្ត្រីធំដល់ទៅជិត ២ម៉ឺនដុល្លារអាមេរិក។

តួលេខនោះ គឺខ្ពស់ខ្លាំងសម្រាប់តារាចម្រៀងក្នុងស្រុក ដែលកន្លងមកតារាជួរមុខដែលរៀមច្បងមួយចំនួនមានតម្លៃនៃការហត់នឿយ ត្រឹមជាង ៣ ០០០-៤០០០ដុល្លារតែប៉ុណ្ណោះ។ ប៉ុន្តែនៅឆ្នាំ ២០២២ មានតម្រុយមួយផ្សេងទៀតថា ម្ចាស់បទ "Lambo Toy” ត្រូវបានឡើងតម្លៃខ្លួនដល់ទៅជិត ២០ម៉ឺនដុល្លារអាមេរិកទៅហើយ។

រូបភាព៖ហ្វេសប៊ុក សីម៉ា

តាមប្រភពសុំមិនបញ្ចេញឈ្មោះ បញ្ជាក់ថា តម្លៃពលកម្មខាងលើ គឺជាតម្លៃសម្រាប់ការងារជាតារាតំណាងផលិតផល ឬហៅម្យ៉ាងទៀតថា "ទូតសុច្ឆន្ទៈ"។ "សីម៉ា ឥឡូវអ្ហី តម្លៃខ្លួនកាន់តែឡើងទៀតហើយ ដាច់គេហើយ លឺថា ជិត ២០ម៉ឺនហើយ...សម្រាប់ការងារធ្វើជា Brand Ambassador”។

រូបភាព៖ ហ្វេសប៊ុក សីម៉ា

ប្រភពបន្តថា សម្រាប់ការងារខាងលើ តាមដែលគេទទួលបានពីមិត្តភ័ក្តិធ្វើការក្នុងក្រុមហ៊ុនមួយដែលសីម៉ា បានព្រមព្រៀងធ្វើជាទូតសុច្ឆន្ទៈ គឺប្រមាណ ១៧-១៨ម៉ឺនដុល្លារឯណោះក្នុង១ឆ្នាំ។ តួលេខនេះខ្ពស់ខ្លាំង បើធៀបនឹងការងារដូចគ្នារបស់តារាក្នុងស្រុកផ្សេងទៀត ដែលជាមធ្យមមានចំនួនប្រមាណ ៥ម៉ឺនដុល្លារក្នុង១ឆ្នាំ។ ដោយឡែកការងារឡើងឆាកតន្ត្រី បញ្ជាក់ថាគេមិនដឹងទេថា ប្រែប្រួលឬអត់។

ជុំវិញបញ្ហានេះ សាមីខ្លួន នៅមិនទាន់អាចភ្ជាប់ទំនាក់ទំនងបានដើម្បីសុំការស្រាយបញ្ជាក់។ ងាកមកលោក យឹម តាស្រង់ ដែលជាមេកើយរបស់តារាចម្រៀងវិញ ក៏មិនទាន់សុំការអធិប្បាយបានដូចគ្នា។ តន់ ច័ន្ទសីម៉ា ទើបទទួលបានពានដល់ទៅ ៣ ពីកម្មវិធី Pleng Music Awards 2022 មានពាន «សិល្បការិនីប្រចាំឆ្នាំ» «វីដេអូបទចម្រៀងដំបូងគេដែលមានការមើល 100លានដងក្នុង YouTube» និងពាន «សិល្បការិនីស្ដាប់ច្រើនជាងគេ»។ មិនប៉ុន្មានថ្ងៃបន្ទាប់ពីក៏ធ្លាយដំណឺងខាងលើ ប៉ុន្តែជាមួយគ្នាប្រភពដដែលបញ្ជាក់ថា សីម៉ា មិនទើបឡើងតម្លៃខ្លួនក្រោយទទួលបានពាននោះទេ គឺតម្លៃខាងលើរូបគេទទួលបានទាំងពីមុននេះទៅទៀត៕

អត្ថបទ៖ ទារិកា