ផ្ទះ ហង្ស ឈា បញ្ចប់ការសាងសង់ទាំងស្រុង ខណៈល្បីមានបន្ទប់ពិសេស១ក្រោមដីតម្លៃជាង ១០ម៉ឺនដុល្លារ

2022-10-10 08:13:11
ព័ត៌មាន

2022-10-10 08:13:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្ទះធំមួយនៅលើភ្នំស្ថិតក្នុងទីក្រុង Lynn ជាប្រភេទផ្ទះលំដាប់អភិជនអាមេរិក ត្រូវបានអតីតតារាចម្រៀង និងតារាសម្ដែង លោក ហង្ស ឈា បានកុម្ម៉ង់ការសាងសង់តាមគំនិតផ្ទាល់ខ្លួន ឥឡូវនេះ មានដំណឹងថា បានរួចរាល់ទាំងស្រុង និងល្បីថាមានបន្ទប់ពិសេសនៅក្រោមដីថែមទៀត។

ផ្ទះនៅលើភ្នំនេះ គឺជាផ្ទះទី២ បន្ទាប់ពីលោកបានសម្រេចចិត្តផ្លាស់ទីលំនៅពីជើងភ្នំ មករស់នៅលើភ្នំវិញ ជាទីដែលប្រជុំដោយសំណង់ផ្ទះធំត្រឹមតែ ១១ គម្រោងប៉ុណ្ណោះ។ លោកបាន នាំគ្រួសារមករស់នៅ តាំងតែពីដើមឆ្នាំ ពោលគឺតាំងពីផ្ទះមិនទាន់សាងសង់រួចរាល់១០០%ម្ល៉េះ។ ជារឿយៗ គេលោកបង្ហាញរូបភាពពីទិដ្ឋភាពខាងក្នុងផ្ទះ ដែលមានការរចនា ក៏ដូចជាតាំងលម្អទៅដោយគ្រឿងសង្ហារឹមប្រណិតៗជាច្រើន។

ផ្ទុយទៅវិញ លោកកម្រនឹងបង្ហាញទិដ្ឋភាពខាងក្រៅផ្ទះរបស់លោកណាស់។ ប៉ុន្តែថ្មីៗ គេឃើញលោកបង្ហាញរូបភាពទាំងស្រុងនៅលើបណ្ដាញសង្គម។ តាមម្ចាស់គេហដ្ឋាន បានឲ្យដឹងថា កន្លងមកផ្ទះនៅលើភ្នំរបស់លោកនេះ សាងសង់មិនទាន់ហើយ ពោលគឺនៅសល់ការលាបថ្នាំ រៀបសួនច្បារ ជាដើម ដែលមានភាពមិនរៀបរយច្រើន តែពេលនេះ អ្វីៗគឺបានស្រេចបាច់អស់ហើយ។

ដូច្នេះហើយ គេឃើញលោកផ្ដើមបង្ហាញពីរូបរាងគេដ្ឋានធំរបស់លោកបន្តបន្ទាប់។ តាមរយៈរូបភាពជាច្រើននៅលើបណ្ដាញសង្គម គេឃើញថា ផ្ទះរបស់លោកមានទីធ្លាទូលាយ មានសួនច្បារ មានខ្យល់អាកាសបរិសុទ្ធ។ មិនត្រឹមប៉ុណ្ណឹង តាមរយៈ វីដេអូខ្លី មួយ គេឃើញនៅខាងក្រោយផ្ទះរបស់លោក មានវត្តមានសត្វព្រៃជាច្រើន បានចូលមករកអាស្រ័យផលក្នុងបរិវេណផ្ទះ ដែលមើលទៅគួរជាទីមនោរម្យទាំងមនុស្ស និងសត្វ។

ចាប់តាំងពីបញ្ចប់ការសាងសង់ គេឃើញលោក ហង្ស ឈា បានទទួលស្វាគមន៍ភ្ញៀវមកលេងជាច្រើន។ កាលពីខែមិថុនា ព្រះតេជគុណ គូ សុភាព អ្នកនាង ខាត់ សុឃីម បានទៅលេងផ្ទះ ថៅកែតែគុជ Boba Tea ដែរ។ មិនត្រឹមប៉ុណ្ណឹង សាច់ញាតិ មិត្តភ័ក្តិ សិល្បករនៅអាមេរិកស្រាប់ជាច្រើននាក់ទៀត ក៏បានទៅដូចគ្នា។

តាមម្នាក់ក្នុងចំណោមនោះ បានបង្ហើបថា ផ្ទះលោក ហង្ស ឈា មានបន្ទប់ពិសេស១ នោះគឺសំដៅលើបន្ទប់កម្សាន្តផ្ទាល់ខ្លួន(Entertainment Room) របស់ ហង្ស ឈា ថាកសាងឡើងស្ទើរនឹងបាររាត្រីមួយ ដែលបំពាក់ទៅដោយសម្ភារៈ ឧបករណ៍បំពងសំឡេងទំនើបៗ។ ប្រភពបង្ហើបថា បន្ទប់នោះមានខ្ទង់ចំណាយប្រមាណជាង ១០ម៉ឺនដុល្លារអាមេរិកឯណោះ។

ជុំវិញករណីនេះ សាមីខ្លួនម្ចាស់ផ្ទះ បានទទួលស្គាល់ថា លោកពិតជាបានសាងសង់បន្ទប់ក្រោមដី១ដែលបានចំណាយប្រហាក់ប្រហែលនឹងការលើកឡើងនោះមែន។ លោកថា នោះជាបន្ទប់ពិសេសសម្រាប់ខ្លួនលោកផ្ទាល់ សម្រាប់លំហែរក្រោយបញ្ចប់ការងារទាំងឡាយ ហើយក៏ដើម្បីទទួលបងប្អូនញាតិមិត្តមកលេងផ្ទះផងដែរ។

លោក ហង្ស ឈា បានលេចឡើងភាពហ៊ឺហារខ្លាំង ក្រោយគ្រោះកូវីដ១៩មក ពិសេសចាប់តាំងពីវត្តមានរបស់ ហង្ស ពេជ្រនិលលី កូនស្រីពៅមក ដែលគេមើលឃើញថា អ្វីៗស្រស់បំព្រងដូចផ្កា ពោលគឺកូនស្រី ពៅ ប្រៀបដូចជាទ្រព្យលាភ ទ្រព្យសំណាងរបស់គ្រួសារលោក។ ជាក់ស្ដែង គេឃើញលោកផ្លាស់ប្ដូរផ្ទះថ្មី ដែលល្បីថាមានតម្លៃដល់ទៅជាង ១លានដុល្លារ(ចំណុចនេះ ហង្ស ឈា បដិសេធនិយាយលម្អិត)។ មិនត្រឹមប៉ុណ្ណឹង លោកទិញរថយន្តប្រណិត ម៉េកសឺដេស ម្ដងដល់ទៅ ២គ្រឿង ហើយឥឡូវ លេចដំណឹង លោករៀបចំបន្ទប់ពិសេសចំណាយដល់ទៅជាង ១០ម៉ឺនដុល្លារថែមទៀត។

សាកសួរពីករណីនេះ សាមីខ្លួន បានទទួលស្គាល់ថា ការមកដល់របស់ និលលី ហាក់ជួយចម្រុងចម្រើនគ្រួសារមែន។ “និយាយវាដូចអីចឹងមែន ដូចគេថា កូនខ្លះកើតមកជួយឪពុកម្ដាយឲ្យចម្រុងចម្រើន ហើយតាំងពីមាន និលលី ធ្វើអីចេះទៅត្រូវ ចេះតែទៅមុខ...អីចឹងមិនដឹងម៉េចដែរ គាប់ជួនឬម៉េច ឬក៏ផ្សំនឹងមានគេផង ផ្សំនឹងយើងប្រឹងផង ទើបចេះតែរីកចម្រើនចឹងទៅក៏មិនដឹង!”។

បច្ចុប្បន្ននៅលើទីកដីសហរដ្ឋអាមេរិក ហង្ស ឈា ត្រូវបានគេដឹងថា បាន និងកំពុងគ្រប់គ្រងអាជីវកម្មដល់ទៅ២ ទី១ ជំនួញហាងលក់ភេសជ្ជៈយីហោ Boba Tea ដែលបានលក់ Franchise លើដីអាមេរិកបានជាច្រើនរដ្ឋរួចមកហើយ និងទី២ គឺក្រុមហ៊ុនផ្គត់ផ្គង់បម្រើសេវាកម្មពលកម្មសម្រាប់តម្រូវកិច្ចការងារផ្សេងៗ ដែលលោកមាននិយោជិតប្រមាណជាង ៥០នាក់ទាំងខ្មែរ និងអាមេរិកាំង៕