ឆ្នាំ ២០២២ Galaxy Navatra យកបានតារាចម្រៀងជាច្រើននាក់ហើយ តែមិនទាន់គ្រប់ផែនការទៀត

2022-12-31 01:01:00
ព័ត៌មាន

2022-12-31 01:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងផែនការពង្រឹង ពង្រីកសក្ដានុពលរបស់ខ្លួនក្នុងឧស្សាហកម្មតន្រី្ត គេមើលឃើញថា ផលិតកម្ម Galaxy Navatra របស់អ្នកឧកញ៉ា ឡេង ណាវ៉ាត្រា បានវិនិយោគយ៉ាងច្រើននៅក្នុងឆ្នាំនេះ ដោយមាននាំចូលតារាចម្រៀងជាច្រើននាក់ ប៉ុន្តែក្បាលម៉ាស៊ីននៅអះអាងថា មិនទាន់គ្រប់ផែនការនៅឡើយ។

អ្នកនាង យឹម សុជាតា នាយកគ្រប់គ្រងថ្មីដែលចូលមកជំនួសឧកញ៉ា យឹម តាស្រង់ អ្នកគ្រប់គ្រងចាស់ដែលសុំដកខ្លួនទៅធ្វើជំនួញវិញ បានប្រាប់ឲ្យដឹងថា ឆ្នាំ ២០២២នេះ Galaxy Navatra បានបន្ថែមសមាជិកតារាចម្រៀងយុវវ័យ និងអ្នកនិពន្ធចំនួន ៤នាក់បន្ថែមទៀត ក្នុងនោះមាន កញ្ញា ហ៊ិន លីដា Nak Fake លោក សង្ហា ជាអ្នកនិពន្ធ និង K-LA។

វត្តមានរបស់តារាចម្រៀង និងអ្នកនិពន្ធ ដែលសុទ្ធជាអ្នកមានសក្ដានុពល ធ្វើឲ្យ Galaxy Navatra មានរសជាតិបទចម្រៀង កាន់តែសម្បូរបែប ក្នុងនោះមានទាំង បទប្រជាប្រិយ បទមនោសញ្ចេតនា រ៉េប Hip Hop ដែលសរុប បច្ចុប្បន្នផលិតកម្មមួយនេះមាន តារាចម្រៀងចំនួន ១១នាក់ហើយ។ ត្បិតយ៉ាងនេះ អ្នកនាង យឹម សុជាតា បញ្ជាក់ថា មិនទាន់គ្រប់ផែនការទេ។

សង្ហា

Nak Fake

ហ៊ិន លីដា

នាយកគ្រប់គ្រងរូបនេះ មិនបានបញ្ចេញឲ្យច្បាស់ទេថា Galaxy Navatra ត្រូវតារាចម្រៀង ក៏ដូចជាអ្នកនិពន្ធប៉ុន្មានទើបគ្រប់ ប៉ុន្តែច្បាស់ណាស់ នឹងមានសមាជិកថ្មីបន្តបន្ទាប់ទៀត។ បច្ចុប្បន្ន ផលិតកម្មរបស់អ្នកឧកញ៉ា ឡេង ណាវ៉ាត្រា ក៏ត្រៀមនឹងបំពេញនូវចន្លោះខ្វះខាតមួយរបស់ខ្លួនដែរ នោះគឺតារាចម្រៀងច្រៀងជាភាសាអង់គ្លេស។អ្នកនាង យឹម សុជាតា បង្ហើបថា សព្វថ្ងៃ Galaxy Navatra កំពុងចម្រាញ់យកតារាចម្រៀងភាសាអន្តរជាតិម្នាក់។

ហ៊ិន លីដា តន់ ច័ន្ទសីម៉ា និង K-LA

ក្នុងផែនការលើកកម្ពស់គុណសម្បត្តិរបស់ខ្លួន ក្នុងឧស្សាហកម្មតន្ត្រីក្នុងស្រុក Galaxy Navatra មិនមែនវិនិយោគតែលើធនធានមនុស្សនោះទេ ប៉ុន្តែក៏បានបោះទុនទិញរ៉ូបូតពីបរទេសយកមកបម្រើក្នុងសង្វាក់ផលិតកម្មរបស់ខ្លួនដែរ។ ទាំងនេះ ស្ថិតក្នុងផែនការ ដែលអ្នកឧកញ៉ា ឡេង ណាវ៉ាត្រា បានប្រាប់សារព័ត៌មានថា នឹងនាំផលិតកម្មមួយនេះឆ្ពោះទៅកម្រិតស្តង់ដារពិភពលោកឲ្យខាងតែបាន។ តាមព័ត៌មានថ្មីមួយដែល Sabay ទទួលបាន នៅដើមឆ្នាំ ២០២៣ នេះ Galaxy នឹងទទួលសមាជិកថ្មីម្នាក់ទៀត ដែលជាតារាចម្រៀងដ៏មានកេរ្តិ៍ឈ្មោះបោះសំឡេង១រូប។ យ៉ាងណា អ្នកនាង យឹម សុជាតា សុំមិនអធិប្បាយលើករណីនេះ ដោយស្នើឲ្យប្រិយមិត្តរង់ចាំតាមដានទាំងអស់គ្នា៕

អត្ថបទ៖ ទារិកា