ហង្ស ឈា យកធាតុម្ដាយមកដល់ស្រុក ធ្វើបុណ្យចែកទានដល់យាយតា និងក្មេងៗក្នុងភូមិ

សុក្រ, 31 មីនា 2023 03:30
ព័ត៌មាន

សុក្រ, 31 មីនា 2023 03:30
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហង្ស ឈា បំពេញកិច្ចជូនអ្នកម្ដាយ ដោយនាំអ្នកមានគុណត្រឡប់មកស្រុកកំណើតវិញ និងបានធ្វើបុណ្យតាមប្រពៃណីរួចរាល់ ដោយនៅក្នុងពេលវេលាជាមួយគ្នា លោកបានចែកទានដល់លោកយាយលោកតា កុមារាកុមារីជាច្រើននាក់ថែមទៀត។

ពិធីបុណ្យគម្រប់ខួប ៧ថ្ងៃ របស់ឧបាសិកា តាំង សុខគៀង ម្ដាយបង្កើត ហង្ស ឈា ត្រូវបានធ្វើនៅវត្តអង្គខ្វាវ ស្ថិតក្នុងភូមិកាប់នឹម ឃុំខ្វាវ ស្រុកសំរោង ខេត្តតាកែវ។ នេះជាការវិលត្រឡប់មកទីឋានកំណើតរបស់ឧបាសិកា តាំង សុខគៀង ក្រោយពីបានចាកចេញទៅរស់នៅសហរដ្ឋអាមេរិកជាមួយកូនប្រុស ហង្ស ឈា កាលពី៦ឆ្នាំមុន។

យ៉ាងណា ក្រោយពីបានរួមរស់ជាមួយកូនប្រុស កូនប្រសារស្រីបានប៉ុន្មានឆ្នាំ ឧបាសិកា តាំង សុខគៀង ក៏ធ្លាក់ខ្លួនឈឺ ដោយដំបូងឡើយឈឺដៃ ក្រោយពីពិនិត្យបានរកឃើញថា ឧបាសិកាមានជំងឺរបេង និងក្រោយមកបានលេចចេញនូវជំងឺជាច្រើនមុខទៀត។ ហង្ស ឈា ប្រាប់ថា ម្ដាយលោកសម្រាកព្យាបាលនៅមន្ទីរពេទ្យនៅទីក្រុងបូស្តុនអស់រយៈពេល ៣ឆ្នាំមកហើយ។

លុះដោយវ័យ និងការទន្ទ្រានមិនឈប់នៃជំងឺជាច្រើនមុខ ម្ដាយលោកក៏អស់បុណ្យក្នុងជន្មាយុ ៧៧ឆ្នាំ កាលពីថ្ងៃទី ២២ មីនា ២០២៣ បន្សល់នូវការសោកស្ដាយ និងអាឡោះអាល័យពីសំណាក់កូនៗ ក៏ដូចជាក្រុមគ្រួសារទាំងមូល។ យ៉ាងណា កាលនៅមានជីវិតនៅឡើយ ឧបាសិកា តាំង សុខគៀង បានផ្ដាំឲ្យយកធាតុវិលត្រឡប់ស្រុកកំណើតវិញកុំខាន។

ដូច្នេះហើយ ហង្ស ឈា ក៏បានធ្វើតាមបណ្ដាំម្ដាយ ដោយបានមកដល់ប្រទេសកម្ពុជា កាលពីថ្ងៃពុធ ២៩ មីនា និងបានធ្វើបុណ្យគម្រប់ ៧ថ្ងៃ តាមទំនៀមរួចរាល់នាថ្ងៃម្សិលមិញ និងបន្តមកព្រឹកនេះមួយព្រឹកទៀត។ បន្ទាប់ពីបំពេញជូនវិញ្ញាក្ខន្ធអ្នកមានគុណរួចរាល់ ហង្ស ឈា នឹងត្រូវត្រឡប់ទៅសហរដ្ឋអាមេរិកវិញនៅដើមសប្ដាហ៍ក្រោយ ដើម្បីមើលការខុសត្រូវមុខជំនួញតែគុជ យីហៅ "Boba Tea” ដែលកំពុងពេញនិយមនៅសហរដ្ឋអាមេរិកបន្តទៀត៕