បើមិនបែករឿងនេះ មិនដឹងថា តម្លៃខ្លួន អ៊ីណូ គិតជាឆ្នាំ ច្រើនដល់ម្ល៉ឹងនោះទេ

2023-12-11 07:47:58
ព័ត៌មាន

2023-12-11 07:47:58
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅរយៈកាលចុងក្រោយនេះ គេកត់សម្គាល់ឃើញថា តារាចម្រៀងសំឡេងខ្លាគ្រហឹម អ៊ីណូ ហាក់មានភាពកាក់បខ្លាំងក្នុងមុខជំនួញ តែបែរជាមិនសូវសមប្រកបក្នុងអាជីពសិល្បៈ ដោយថ្មីៗនេះមានរឿងរ៉ាវជាមួយក្រុមហ៊ុនអនឡាញមួយរឿងថ្លៃឈ្នួលពលកម្ម ដែលតារាចម្រៀងលើកឡើងថា លោកត្រូវគេបោកប្រាស់។

អ៊ីណូ បានបើកកកាយរឿងនេះនៅលើបណ្ដាញសង្គមរបស់លោក ដែលក្រោយពីបែករឿងទើបគេដឹងថា ម្ចាស់បទ "ម៉ោងបាយនឹកអូន" រូបនេះមានតម្លៃពលកម្មខ្ពស់សម្បើមណាស់ គឺដល់ទៅជិត ១០ម៉ឺនដុល្លារអាមេរិកឯណោះក្នុង១ឆ្នាំ។

តាមសាច់រឿង លោក សាន សុភារិទ្ធ ហៅ អ៊ីណូ បានចុះកិច្ចព្រមព្រៀងធ្វើកិច្ចសហការជាមួយក្រុមហ៊ុនភ្នាល់លើអនឡាញមួយឈ្មោះថា ហ្វាហ្វា គ្រុប កាលដើមឆ្នាំ ២០២២ ដោយលោកព្រមព្រៀងធ្វើជាទូតសុច្ឆន្ទៈ ឬប៊ីអេ ឲ្យក្រុមហ៊ុននេះរយៈពេល១ឆ្នាំ ក្នុងតម្លៃព្រមព្រៀងគ្នា គឺ ៨ម៉ឺនដុល្លារអាមេរិក។

តាមកិច្ចសន្យាការងារនេះ ភាគីខាងក្រុមហ៊ុន បានព្រមព្រៀងប្រគល់ប្រាក់ ៤ម៉ឺនដុល្លារជាមុនទៅភាគីលោក អ៊ីណូ។ ចំនួនដែលនៅសល់ គឺក្រុមហ៊ុននឹងបើកជូនតាមខែរហូតដល់បញ្ចប់កិច្ចសន្យាជាមួយគ្នា។

លុះមកដល់ខែសីហា ក្រុមហ៊ុន ហ្វាហ្វា បានប្រគល់ប្រាក់ចំនួន ៦ពាន់៦រយហុកសិប៦ចុចហុកសិបប្រាំមួយដុល្លារ បន្ថែមទៀតពីលើប្រាក់ ៤ម៉ឺនដុល្លារដែលបានប្រគល់ជូនតារាចម្រៀងតាំងពីគ្រាដំបូង។

ដោយឡែកប្រាក់ដែលនៅសល់ជាង ៣ម៉ឺនដុល្លារទៀតនោះ តាមការបញ្ជាក់នៅក្នុងសេចក្ដីជូនដំណឹងរបស់ មេធាវី គឺក្រុមហ៊ុនមិនបានបំពេញកាតព្វកិច្ចរបស់ខ្លួនរហូតមកដល់បច្ចុប្បន្ន។

លោក អ៊ីណូ បានសរសេរថា ក្រុមហ៊ុន FAFA GROUP សូមបញ្ឈប់ការបោ..កប្រាស់ ខ្ញុំបន្តទៀត តម្លៃខ្លួន ប្រាំបីម៉ឺនដុល្លារ ក្នុង1ឆ្នាំ បើកអោយបានតែ ៤ម៉ឺន៦ពាន់៦រយហុកសិប៦ចុចហុកសិបប្រាំមួយទេ ចាប់ពីខែកញ្ញា រហូតដល់ឥឡូវ មេមេរត់ចេញពីគ្រុបសាហាវណាស់ ហើយលែងបើកប្រាក់ខែអោយខ្ញុំដែលជា ប៊ីអេទៀត សរុបសល់4ខែ...បើចូលដល់ខែ 1 ថ្ងៃទី 5 សរុប5ខែហើយ!

"បោកខ្ញុំយ៉ាងនេះសុំផ្តាច់កុងត្រា ដូច្នេះសូមបញ្ឈប់ការផុសរូបខ្ញុំ នៅលើផេក ហ្វាហ្វា បន្តទៀត បើមិនគោរពតាមគោលការណ៍កុងត្រា បែបនេះខ្ញុំដាក់ពាក្យបណ្តឹង សូមអរគុណ បញ្ជាក់ខ្ញុំត្រឹមជាប៊ីអេ"។

តាមរយៈលិខិតរបស់មេធាវី ខុម ឌីណា ជាសមាជិកគណៈមេធាវីនៃព្រះរាជាណាចក្រកម្ពុជា និងជាមេធាវីនៃក្រុមហ៊ុនមេធាវី ហនុមាន និងសហការី បានបញ្ជាក់ពីការរំលាយកិច្ចសន្យាការងាររវាងភាគីទាំងពីរ និងបង្គាប់ឲ្យក្រុមហ៊ុន ហ្វាហ្វា គ្រុប បញ្ឈប់សកម្មភាពបង្ហោះរបស់ អ៊ីណូ ដែលជាកូនក្ដីរបស់លោក ដោយគ្មានការអនុញ្ញាតិបន្តទៀត។

ករណីភាគីក្រុមហ៊ុននៅតែមិនបញ្ឈប់ កូនក្ដីរបស់លោកនឹងដាក់ពាក្យប្ដឹងទៅស្ថាប័នពាក់ព័ន្ធ ដើម្បីស្វែងរកបុគ្គលពាក់ព័ន្ធនឹងការបង្ហោះទាំងនោះ រួចធ្វើនីតិវិធីតាមផ្លូវច្បាប់មកកាន់ស្ថាប័នមានសមត្តកិច្ច។

ជុំវិញករណីនេះគេមិនទាន់ឃើញមានការឆ្លើយតបយ៉ាងណា ពីភាគីក្រុមហ៊ុនភ្នាល់លើអនឡាញដ៏មួយនេះនៅឡើយទេ៕