ភាពជោគជ័យនៃការក្លាយជាម្ចាស់ពានកម្មវិធីលំដាប់ពិភពលោក Beat The Best រដូវកាលទី២ របស់ លីន សោម៉ា បានធ្វើឱ្យបវរកញ្ញារាងខ្ពស់ស្រឡះ ពេជ្រ វត្តីសារ៉ាវឌ្ឍី រំជួលចិត្តជាខ្លាំង រហូតបង្ហោះ status ខ្លីមួយបង្ហាញពីការយល់ឃើញរបស់នាងចំពោះភាពជោគជ័យនៃម្ចាស់ពាន Beat The Best រដូវកាលទី២។

ក្រៅពីការអបអរសាទរដល់ម្ចាស់ជយលាភី ម្ចាស់តំណែង 5th Runner up Miss Grand International 2022 ពេជ្រ វត្តីសារ៉ាវឌ្ឍី បានយកភាពជោគជ័យរបស់ លីន សោម៉ា ជាបទពិសោធន៍ឱ្យអ្នកដ៏ទៃ ដោយនាងបានលើកឡើងថា «អ្វីដែរគួររៀនសូត្រពីបទពិសោធន៍របស់អ្នកដទៃ អំនួតមិនបានធ្វើអោយអ្នកឈ្នះទេតែភាពអត់ធ្មត់និងការតស៊ូទៅវិញទេដែរនិងធ្វើអោយអ្នកឈ្នះ Congratulations sister»។

ការបង្ហោះរបស់ វត្តី ហាក់បីដូចជាការដាស់តឿនស្មារតីដល់អ្នកជុំវិញខ្លួន និងលើកទឹកចិត្តឱ្យគ្រប់គ្នាមានការអត់ធ្មត់តស៊ូ ដើម្បីទទួលបានភាពជោគជ័យនូវថ្ងៃណាមួយ។ ទាំងនេះ គឺដោយសារតែ សោម៉ា ជាក្មេងស្រីម្នាក់ដែលមិនព្រមបោះបង់ចោលក្តីស្រមៃរបស់ខ្លួនឯង ទោះបីត្រូវបរាជ័យប៉ុន្មានដង ក៏នាងនៅតែតស៊ូជម្នះមិនខ្លាចលំបាករហូតដណ្តើមបានជយលាភី Beat The Best រដូវកាលទី២។

គួររំឮកផងដែរថា មុនក្លាយជាម្ចាស់ជយលាភី Beat The Best រដូវកាលទី២ លីន សោម៉ា ជាម្ចាស់ពានកម្មវិធីទូរទស្សន៍បុស្កិ៍អប្បរា «ផ្កាយរះក្នុងសួន» តាំងពីនៅវ័យជំទង់មកម្លេះ។ មិនទាន់អស់នៅឡើយទេ នាងក៏ធ្លាប់ចូលប្រកួតប្រជែងក្នុងកម្មវិធីប្រឡងចម្រៀងរបស់ទូរទស្សន៍ហង្សមាសចំនួន ២ ដងរួចមកហើយ រួមមាន៖ កម្មវិធី Cambodian Idol រដូវកាលទី៣ (ធ្លាក់នៅត្រឹមវគ្គពាក់កណ្តាលផ្តាច់ព្រ័ត្រ) និងបានបន្តប្រឡងកម្មវិធី The Mask Singer Cambodia រដូវកាលទី១ ដោយកាលនោះ នាងបានទទួលចំណាត់ថ្នាក់លេខ២។

មិនបោះបង់ក្តីស្រមៃ សោភារូបស្រស់ លីន សោម៉ា បន្តចូលរួមប្រកតកម្មវិធី Beat The Best រដូវកាលទី២ តែលើកនេះនាងមិនធ្វើឱ្យហ្វេនខកបំណងឡើយ ដោយបានពង្រឹងសមត្ថភាព និងទឹកដមសំឡេងរហូតក្លាយជាម្ចាស់ពាន និងទទួលបានប្រាក់រង្វាន់ ២៤ ០០០ ដុល្លារសហរដ្ឋអាមេរិក ជាមួយការក្លាយជាអ្នកចម្រៀងកុងត្រាក្នុងផលិតកម្មរស្មីហង្សមាស៕