គួរឱ្យស្ញប់ស្ញែងខ្លាំងមែនទែន រយៈពេលមិនដល់១ឆ្នាំផង កុមារីដ៏ឆ្លាតវ័យ ថៃ ដារ៉ូត ឈ្នះជយលាភីពីកម្មវិធីអន្តរជាតិ ៣ ផ្ទួនៗ ធ្វើឱ្យកេរ្តិ៍ឈ្មោះប្រទេសកម្ពុជារីកសាយភាយកាន់តែខ្លាំងឡើង។

គិតមកទល់ពេលនេះ រយៈពេលទើបតែជាង ៨ខែប៉ុណ្ណោះ តែកុមារីពោរពេញដោយសមត្ថភាពរូបនេះ បានឈ្នះជយលាភីលើឆាកអន្តរជាតដល់ទៅ ៣ ផ្សេងគ្នា រួមមាន៖

ទី១. ជយលាភី 2nd Runner up ក្នុងការប្រកួត I Am Model Search International 2024 ក្នុងវិញ្ញាសារផ្នែកកុមារ (Kids Category) ប្រារព្ធឡើងនៅប្រទេសម៉ាឡេស៊ី ចាប់ពីថ្ងៃទី១០-១៤ ខែមករា ឆ្នាំ២០២៤។

ទី២. ដណ្តើមបានមេដាយមាស និងសំរិទ្ធចំនួន ៦ ពីការប្រកួតសិល្បៈលំដាប់ពិភពលោក WCOPA (World Championship of Performing Arts) នៅក្រុងឡងប៊ិច រដ្ឋកាលីហ្វ័ញ៉ា សហរដ្ឋអាមេរិក កាលពីដើមខែកក្កដា ឆ្នាំ២០២៤។ មេដាយមាស និងសំរិទ្ធចំនួន ៦ មានដូចជា Gold Medal in the Final Round , Gold Medal in the Spirit Team , Gold Medal in the Pageant Category , Plaque Award for Division , Bronze Medal in the Casual Wear Category និង Bronze Medal in the Formal Wear Category។

ទី៣. ដណ្តើមបានជយលាភី World Junoir Tourisum Ambassdor និងពានរង្វាន់ពិសេសចំនួន ២ គឺ Best in Custom និង 1st Runner up Best in Video Tourisum ពីការប្រកួត World Junior Tourism Ambassador 2024 នៅប្រទេសម៉ាឡេស៊ី កាលពីថ្ងៃទី១២ ខែសីហា ឆ្នាំ២០២៤។

កុមារី ថៃ ដារ៉ូត មានមោទនភាពខ្លាំងណាស់ ដែលអាចនាំយកភាពជោគជ័យពីឆាកអន្តរជាតិជូនប្រទេសកំណើត ហើយនាងប្តេជ្ញាបន្តខិតខំពង្រឹងសមត្ថភាពបន្ថែមទៀត ដើម្បីបំពេញក្តីស្រម៉ៃដែលចង់ក្លាយជាតារាម៉ូដែលល្បីឈ្មោះជុំវិញពិភពលោក។

ឱ្យស័ក្កសមតំណែងម្ចាស់មកុដ World Junoir Tourisum Ambassdor កុមារីវ័យ ១០ឆ្នាំនេះ នឹងបន្តផលិតវីដេអូផ្សព្វផ្សាយពីតំបន់ទេសចរណ៍នានាក្នុងប្រទេសកម្ពុជា ក៏ដូចជាផ្តោតលើការសិក្សាផងដែរ។ ប៉ុន្តែ ប្រសិនបើក្រុមហ៊ុន ឬផលិតករចាប់អារម្មណ៍ទេពកោសល្យសមត្ថភាពរបស់នាង អាចទំនាក់ទំនងបាន ព្រោះកុមារីរូបនេះក៏ចង់សាកល្បងធ្វើការងារផ្សេងៗ ដើម្បីទទួលបទពិសោធន៍ថ្មីៗជាទុនសម្រាប់បំពេញក្តីស្រមៃទៅនៅថ្ងៃអនាគត៕