SM Entertainment ប្រកាសថាខ្លួន នឹងបង្កើតក្រុមចម្រៀងនារី ថ្មីមួយក្រុម នាពេលឆាប់ៗខាងមុខនេះ។ ការប្រកាសនេះ ធ្វើឡើង នៅក្នុងកម្មវិធី ប្រគំតន្រ្តី គម្រប់ខួប ៣០ឆ្នាំ របស់ SM Entertainment ដែលបានប្រព្រឹត្តឡើងនៅក្នុងទីក្រុង សេអ៊ូល កាលពីពេលថ្មីៗនេះ។

ក្រុមចម្រៀងនារីថ្មី បង្កើតឡើងដោយ SM Entertainment មានឈ្មោះថា Hearts2Hearts និង មានសមាជិកចំនួន ៨ នាក់។ Hearts2Hearts នឹងក្លាយជាក្រុមចម្រៀងនារីដំបូងរបស់ Label ដ៏ល្បីល្បាញរបស់វិស័យ K-Pop មួយនេះ បើគិតចាប់តាំងពី ក្រុម Asepa បានបង្កើតឡើង កាលពីឆ្នាំ ២០២០។

SM Entertainment បាននិយាយថា Hearts2Hearts មានគោលដៅ ក្នុងការឆក់យកបេះដូងពីអ្នកគាំទ្រ នៅជុំវិញពិភពលោក តាមរយៈរសនិយមនៃតន្រ្តី ដ៏ពិរោះ របស់ក្រុមចម្រៀងនារីមួយនេះ។ ផលិតកម្មដ៏ធំរបស់កូរ៉េខាងត្បូងនេះ ក៏បានអះអាងផងដែរថា ក្រុមចម្រៀងនារី ដែលខ្លួននឹងបង្ហាញជាផ្លូវការទៅកាន់ ទស្សនិកជន នាអំឡុងខែកុម្ភៈ ឆ្នាំ ២០២៥ ខាងមុខ នឹងទទួលបានការគាំទ្រយ៉ាងច្រើន ដោយសំអាងលើ កត្តាធំៗ ២ នោះគឺ ទេពកោសល្យ និង រូបរាងដ៏មានមុនស្នេហ៍ របស់ សមាជិកក្រុម Hearts2Hearts៕