អាល់ប៊ុមទោលដំបូងរបស់តារា Blackpink កញ្ញា Jennie នឹងមានការច្រៀងរួមគ្នាជាមួយ Dua Lipa, Doechii និង Childish Gambino ។ Dominic Fike, FKJ និង Kali Uchis ក៏ស្ថិតក្នុងចំណោមអ្នក ដែលត្រូវច្រៀងរួមគ្នា ជាមួយ Jennie ផងដែរ។

តារាវ័យ ២៩ឆ្នាំរូបនេះ នឹងចេញអាលប៊ុមចម្រៀងទោល ក្រោមផលិតកម្មផ្ទាល់ខ្លួនរបស់នាង ដែលផលិតកម្មនោះ មានឈ្មោះថា Odd Atelier តាមរយៈភាពជាដៃគូជាមួយ Columbia Records។ ទោះជាយ៉ាងណាក៏ដោយ នាងបានសារភាពថា បទចម្រៀងនីមួយៗស្តាប់ទៅ "ខុសគ្នា"។

នៅក្នុងវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គម Jennie បានពន្យល់ថា "អាល់ប៊ុមរបស់ខ្ញុំ នឹងមានសំឡេងខុសប្លែកពីគេខ្លាំងណាស់។ បទចម្រៀងបន្ទាប់របស់ខ្ញុំ គឺ ខ្ញុំមានអារម្មណ៍ថា គ្រប់ជំហាននឹងខុសគ្នា”។

"ក្តីសង្ឃឹមរបស់ខ្ញុំជាមួយនឹងអាល់ប៊ុមរបស់ខ្ញុំ គឺថា ពិភពលោកនឹងឃើញ Jennie និងតន្ត្រីរបស់នាងដូចដែលអ្នករាល់គ្នា គួរតែឃើញ។ នៅក្នុងអាល់ប៊ុម ចម្រៀងថ្មីនេះ នឹងមានអ្វីគ្រប់បែបយ៉ាងសម្រាប់អ្នករាល់គ្នា។ វាប្រៀបដូចជាអាហារប៊ូហ្វេ ដែលមានរសជាតិសម្បូរបែប សម្រាប់អ្នកទាំងអស់គ្នា ជ្រើសរើស” ។ Jennie បានបន្ថែម។

នៅក្នុងបទសម្ភាសន៍នាពេលថ្មីៗនេះជាមួយ Billboard តារា K-Pop Jennie បានសារភាពថា ដំបូងឡើយ នាងពិបាកថតអាល់ប៊ុមនៅទីក្រុង Los Angeles ដោយសារតែនាងត្រូវបានគេ ឱ្យធ្វើការជាមួយមនុស្សថ្មីៗជាច្រើន ក្នុងបរិយាកាសមិនស្គាល់មុខគ្នា និង មិនជិតស្និទ្ធ។

នាងបាននិយាយថា "ខ្ញុំបានតស៊ូជាច្រើននៅដើមដំបូង។ ប៉ុន្មានខែមកនេះ ខ្ញុំចង់និយាយថា ខ្ញុំ បានសម្របខ្លួននៅទីនោះ ដោយដើរចូលទៅក្នុងបន្ទប់ដែលពោរពេញទៅដោយមនុស្សថ្មី ។ ខ្ញុំគ្រាន់តែត្រូវបន្តគោះទ្វារគ្រប់បន្ទប់ ហើយសួរនាំគេ ហើយបន្ទាប់មក នៅទីបំផុត យើងបានឈានដល់ចំណុចមួយ ដែលខ្ញុំបានរកឃើញក្រុមមនុស្សដ៏ល្អ ដែលខ្ញុំមានទំនាក់ទំនងជាមួយដោយស្មោះត្រង់ និងជាមិត្តភក្តិ។

គួរឱ្យដឹងថា អាល់ប៊ុមចម្រៀងទោល Ruby របស់ Jennie នឹងចេញនៅអំឡុង ខែមិនា ឆ្នាំ ២០២៥ ខាងមុខនេះ៕