ស្ងប់ស្ងាត់ចម្រៀង អាន់ដា ហក់មកចាប់អាជីពសម្ដែង

2016-11-22 04:35:36
ព័ត៌មាន

2016-11-22 04:35:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយស្ងប់ស្ងាត់ក្នុងអាជីពជាអ្នកចម្រៀងមួយរយៈធំចុងក្រោយនេះ អាន់ដា បានចាប់យកអាជីពថ្មីមួយទៀតផ្នែកសម្ដែង ដែលរឿងដំបូងរបស់លោកទើបនឹងក្រុងពាលីកាលពីម្សិលមិញមានចំណងជើងថា "ម្ចាស់គ្រងបេះដូង"របស់ផលិតកម្ម KH Production ក្នុងនោះលោកជាតួអង្គសំខាន់ ហើយសម្តែងជាតួប៉ូលិស។

ពាក់ព័ន្ធនឹងវិស័យចម្រៀងដែល អាន់ដា ប្រឡូកប្រមាណជាង៤ឆ្នាំមកនេះ លោកថាសន្ទុះ នៃការគាំទ្ររបស់ទស្សនិកជននៅមានកម្រិត ប៉ុន្តែការខំប្រឹងប្រែងលោកនៅតែមិនបោះបង់ ដោយក្នុងនោះលោកសង្ឃឹមថាការសម្ដែងរឿងលើកដំបូងនៅក្នុងផលិតកម្ម KH ដែលមានចំណងជើងថា "ម្ចាស់គ្រងបេះដូង" នេះ នឹងទទួលបានការគាំទ្របន្ថែមទៀត។

អាន់ដា រូបខាងស្តាំដៃ

តារាមានស្រុកកំណើតមកពីកណ្ដាលប្រាប់ថា សម្រាប់អាជីពសម្ដែងមួយនេះ លោកមិនដែលស្រមៃពីមុនមកទេ ប៉ុន្តែទន្ទឹមនឹងឱកាសហុចឲ្យ ហើយខាងម្ចាស់ផលិតកម្មបានមើលឃើញពីសមត្ថភាពដែលលោកធ្លាប់បានសម្ដែងកាយវិការខារ៉ាអូខេកន្លងមក និងធ្លាប់បានបណ្ដុះបណ្ដាលផងនោះ ទើបលោកចាប់អាជីពសម្ដែងនេះបន្ថែម។

អាន់ដា ថ្លែង៖ "ការពិតខ្ញុំមិនដែលមានបំណងចង់សម្តែងឡើយ ប៉ុន្តែក្រោយពេលបានទទួលឱកាសពីម្ចាស់ផលិតកម្ម KH ខ្ញុំក៏សម្រេចថានឹងចាប់អាជីពនេះមួយទៀត ម្យ៉ាងអាជីពចម្រៀងខ្ញុំក៏រាងស្ងប់ស្ងាត់ ដូច្នេះសង្ឃឹមថាការសម្តែងរឿងថ្មីនេះ នឹងទទួលបានការគាំទ្របន្ថែមទៀត"។

វិស័យសិល្បៈផ្នែកចម្រៀងនេះ អាន់ដា ប្រឡូកតាំងពីឆ្នាំ ២០០៩ ដែលដំបូងឡើយលោកច្រៀងនៅក្នុងផលិតកម្ម KH និងបន្តធ្វើការរហូតមកដល់បច្ចុប្បន្ន។ ក្នុងនោះបទដែលទទួលបានការគាំទ្រខ្លាំងមាន "សំឡេងសារ" គ្រាន់តែចង់ឲ្យអូនស្តាប់បេះដូងបង" "ស្រលាញ់អ្វីៗដែលអូនមាន" ជាដើម៕

អត្ថបទ៖ ថា ម៉ាលីដា