ឆេះដុំ លាង សុផាឡែន កំពុងមានបញ្ហា រឿងលួចទាក់ទងប្តីគេ

2017-02-13 05:23:56
ជីវិតតារា

2017-02-13 05:23:56
ចំនួនមតិ 0 | ចំនួនចែករំលែក 0

ចន្លោះមិនឃើញ

មានគណនីហ្វេសប៊ុកមួយបានបង្ហោះសារជាច្រើនពាក់ព័ន្ធនឹងតារាចម្រៀងស្រី លាង សុផាឡែន ថាបានលួចទាក់ទងស្វាមីគេ ទាំងពួកគេមិនទាន់បានលែងលះគ្នារួច។

គណនីមួយនោះបានរៀបរាប់ថា ៖"ស្គាល់ស្រី អ្នកចម្រៀងនេះ ដែរទេ? ស្រីអ្នកចម្រៀង ដែលថោកទាប ទាក់ទង ប្តីគេ បើទោះជាដឹងគេ មានប្រពន្ធកូនក៏ដោយចុះ ធ្លាប់តេ ទៅនិយាយគ្នាស្រួលៗ បែបភាសាមនុស្ស ហើយវាថាឈប់តែធាតុពិត វាមិនបានឈប់នោះទេ ថែមទាំង រំអុកប្តីគេ អោយយកវាទៅអនាគតទៀត...គ្មានសមត្ថភាព រកប្រុស បាន អោយតែឃើញប្តី អ្នកណាទាក់ភ្លាម និយាយទៅស្រលាញ់តែប្តីគេមកពីខ្ញុំ និង ក្រុមគ្រួសារ ជាមនុស្សជឿលើបុណ្យបាប បើប៉ះ ចំ គេ ហ៊ាន ប្រហែលជាស្រីហ្នឹងមិនដឹងទៅជា ស្អី ទៅ ហើយទេ"។

សារទាំងស្រុងដែល គណនី មួយបានបង្ហោះក្នុងបណ្តាញសង្គម

រឿងរ៉ាវមួយនេះកំពុងតែមានការ រិះគន់ និងវាយប្រហារខ្លាំងលើតារាចម្រៀង លាង សុផាឡែន មិនត្រឹមតែប៉ុណ្ណោះ ថែមទាំងចែកចាយពេញបណ្តាញសង្គម។ ជុំវិញបញ្ហានេះលាង សុផាឡែន នាងបានទទួលស្គាល់ថាពិតជាបានទាក់ទងជាមួយតារាចម្រៀង T.O មែន ប៉ុន្តែនាងមិនបានដឹងរឿងរ៉ាវរបស់ T.O មានប្រពន្ធពីមុនមកទេ។ ម្ចាស់បទ "សុខចិត្តឈឺកំដរចិត្តល្ងង់" បញ្ជាក់ទៀតថា បើសិនជានាងដឹង នាងមិនទាក់ទងប្តីគេដាច់ខាត ប៉ុន្តែអ្វីដែលសំខាន់ពេលនេះកេរ្តិ៍ឈ្មោះនាងត្រូវបានគេផ្សព្វផ្សាយ ពាសពេញបណ្តាញសង្គមហ្វេសប៊ុក ដូចជាត្រូវដុតកេរ្តិ៍ឈ្មោះនាងទាំងស្រុងតែម្តង។

"ខ្ញុំគ្មានបំណងទាល់តែសោះ ហើយបើដឹងពីដំបូងថា T.O មានប្រពន្ធខ្ញុំមិនទាក់ទងគ្នាទេ។ ការចាប់ផ្តើមទាក់ទងគ្នានេះ ដោយសារចេះតែឃើញគាត់មិនស្រស់ស្រាយ ខ្ញុំគ្រាន់តែជួយជាកម្លាំងចិត្ត ប៉ុន្តែគាត់មិនដែលប្រាប់ខ្ញុំថាមានប្រពន្ធហើយនោះទេ។ ឥឡូវនេះកេរ្តិ៍ឈ្មោះខ្ញុំមិនដឹងជាយ៉ាងណាទេ ច្បាស់ជាមានគេយល់ច្រឡំច្រើនហើយ"។ សុផាឡែន ថ្លែង។

សុផាឡែន បន្តឲ្យដឹងទៀតថា ចាប់តាំងពី ប្រពន្ធតារាចម្រៀងក្នុងផលិតកម្មថោន T.O ទាក់ទងតាមទូរសព្ទឈប់ឲ្យទាក់ទង តារាចម្រៀងរូបនេះរួចមក នាងអះអាងថាបានផ្តាច់ទំនាក់ទំនងពី T.O ហើយ។ យ៉ាងណាមិញរឿងរ៉ាវនៅតែមិនទាន់បញ្ចប់ សោយសារកាលពី ម្សិលមិញមានគណនីមួយ បានសរសេររៀបរាប់ហែកកេរ្តិ៍ឈ្មោះតារាចម្រៀង លាង សុផាឡែន ជាមួយ T.O បន្តទៀត។

ត្រឡប់មកតារាចម្រៀងក្នុងផលិតកម្មថោន T.O វិញលោកមិនបានបដិសេធអ្វីទាំងអស់ពីទំនាក់ទំនងជាមួយ លាង សុផាឡែន ក៏ដូចជារឿងរ៉ាវដែលលោកមានប្រពន្ធនិងកូនរួចមកហើយនោះ។

"កំហុសខ្ញុំដែល ទាក់ទង សុផាឡែន មិនបានប្រាប់គាត់មុនថា ខ្ញុំមានប្រពន្ធរួច។ ខ្ញុំនិងគ្រួសារមានបញ្ហា និងរកាំរកូសគ្នាយូរហើយ រឿងស្កុគស្មាញមានច្រើន ហើយពេលស្គាល់ សុផាឡែន បានគាត់ជួយលើកទឹកចិត្ត ហើយគាត់ជាមនុស្សស្រីល្អ ទើបមិនអាចខ្វះគាត់បាន ក៏បន្តទាក់ទងគាត់ តែខ្ញុំខុស ដែលមិនបានប្រាប់គាត់ថា ខ្ញុំមានប្រពន្ធរួច"។

ពេលនេះទាំងតារាចម្រៀង លាង សុផាឡែន និង T.O អះអាងថាលែងទាក់ទងគ្នាហើយ ក្នុងនោះ T.Oថានឹងទៅដោះស្រាយជាមួយក្រុមគ្រួសារឲ្យបានចប់រួចរាល់ ដើម្បីកុំឲ្យអ្នកគាំទ្រ មានការយល់ច្រឡំធ្ងន់ធ្ងរ លើ លាង សុផាឡែន តទៅទៀត។

T.O ប្រាប់ថាលោករៀបការរួច ប្រហែលជាង៦ឆ្នាំតាំងពីមុនចូលសិល្បៈ និងមានកូនប្រុសម្នាក់ជាចំណងដៃ។ ហើយលោកជាមួយប្រពន្ធមានបញ្ហារកាំរកូសយូរណាស់មកហើយ គ្រាន់តែយើងមិនទាន់បានលែងលះគ្នាដាច់ស្រេច។ តារាចម្រៀងរូបនេះ បញ្ជាក់ថារឿងរ៉ាវលោកមានប្រពន្ធលោកមិនដែលបានបង្ហើបប្រាប់អ្នកសិល្បៈឡើយ រហូតមកទាក់ទងជាមួយ លាង សុផាឡែន ទើបរឿងរ៉ាវផ្ទុះចេញបែបនេះ។ ចុងក្រោយលោកបានធ្វើការសុំទោសទៅដល់ លាង សុផាឡែន ដែលធ្វើឲ្យនាងមកពាក់ព័ន្ធនឹងបញ្ហាមួយនេះ៕

អត្ថបទ៖ ថា ម៉ាលីដា