ហេតុអ្វី បានជាអត់ឃើញ ហ៊ិន លីដា ច្រៀងនៅហង្សមាស?

2017-04-03 02:08:35
ព័ត៌មាន

2017-04-03 02:08:35
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរដូវកាលទី១នៃកម្មវិធី Cambodian Idol បេក្ខជនដែលបានជាប់ដល់វគ្គចុងក្រោយក្នុងកម្មវិធីលំដាប់ពិភពលោក Cambodia Idol សុទ្ធតែបានកុងត្រាចូលផលិតកម្មហង្សមាសយ៉ាងហោចណាស់ក៏មួយឆ្នាំដែរ ប្លែកអីតែ ហ៊ិន លីដា មិនបានជាប់កុងត្រាជាមួយផលិតកម្មទេ។

ជំនួបជាមួយ Sabay ក្នុងពេលថ្មីនេះ លីដា ប្រាប់ថា ខាងក្រុមហ៊ុន ក៏បានទាក់ទងរូបនាងចុះកុងត្រាដែរ តែនាងសុំបដិសេធ ដោយហេតុថា មិនមានពេលគ្រប់គ្រាន់ ត្បិតអីសព្វថ្ងៃនាងកំពុងសិក្សាផង ច្រៀងតាមកម្មវិធីផ្សេងៗទៀត។

“តាមពិតទៅខាងហង្សមាសបានហៅដែរបង តែខ្ញុំមិនមានពេលវេលាគ្រប់គ្រាន់សម្រាប់ចូលផលិតកម្មទេ ព្រោះរវល់ជាមួយការសិក្សា និងការងារច្រៀងនៅភោជនីយដ្ឋាន ក្រៅពីហ្នឹងខ្ញុំនៅត្រូវឡើងកម្មវិធីផ្សេងៗទៀត ទើបម៉ាក់ប្រាប់ថាសម្រាកខ្លះទៅ" សិស្សវិទ្យាល័យថ្នាក់ទី១០រូបនេះថ្លែង។

ករណីរបស់ ហ៊ិន លីដា ត្រូវបានគេមើលឃើញថា ស្រដៀងគ្នានឹងករណីរៀមច្បង ម៉ៅ ហាជី ដែលជាអតីតបេក្ខភាពកម្មវិធីដូចគ្នានេះនារដូវកាលទី១ ដែលបានឆ្លងដល់វគ្គចុងក្រោយដូចគ្នា។ បន្ទាប់ពីចប់កម្មវិធីទៅ ម៉ៅ ហាជី មិនបានចូលច្រៀងនៅផលិតកម្មហង្សមាសទេ។ ប៉ុន្តែជាមួយគ្នានោះ រយៈពេល១ឆ្នាំ លោកក៏មិនអាចទៅច្រៀងឲ្យផលិតកម្មណាមួយដែរ។

ជាក់ស្ដែងពេលមានព័ត៌មានចចាមអារ៉ាមថា តារាប្រុសមកពីបាត់ដំបងរូបនេះទៅច្រៀងឲ្យផលិតកម្ម ថោន ខាង ហង្សមាស បានប្រតិកម្ម និងត្រៀមចំណាត់ការផ្លូវច្បាប់ ដោយសារថា ជាវេលាស្ថិតក្នុងកុងត្រារបស់កម្មវិធី។ លុះក្រោយមក ហាជី ពិតជាបានចេញមុខនៅថោនមែន ក្រោយផុតរយៈពេលកុងត្រាកម្មវិធីរបស់ហង្សមាស។

ដោយឡែក ហ៊ិន លីដា ប្រាប់ថា នាងមិនចូលច្រៀងនៅហង្សមាសមែន ប៉ុន្តែដោយសារនាងជាប់ការសិក្សា និងច្រៀងតាមកម្មវិធីនានាប៉ុណ្ណោះ។

ពាក់ព័ន្ធនឹងការលើកឡើងរបស់អតីតបេក្ខភាព Cambodian Idol រដូវកាលទី២ខាងលើ ខាងហង្សមាស លោក អ៊ឹង សុងលាភ នាយកគ្រប់គ្រងទូទៅ មិនអាចសុំការអធិប្បាយបាននៅព្រឹកនេះ ដោយទូរសព្ទរបស់លោកមិនអាចទំនាក់ទំនងបាន។

ហ៊ិន លីដា ជាបេក្ខជន Top 3 ក្នុងកម្មវិធី Cambodian Idol រដូវកាលទី២ និងជាម្ចាស់ជយលាភី "ផ្កាយរះក្នុងសួន" រដូវកាលដំបូងបំផុត របស់ទូរទស្សន៍អប្សរា៕

អត្ថបទ៖ សុខណា