តារាសម្ដែងល្បីឈ្មោះសិង្ហបុរីលោក Zen Chong បង្ហើបថា ចង់ចាប់ដៃគូសម្ដែង​ជាមួយតារា​ខ្មែរនៅថ្ងៃ​ខាង​មុខ ប្រសិនបើលោកមានឱកាស។

តារាសម្ដែងវ័យ ៣៨ឆ្នាំរូបនេះ ទម្លាយ​យ៉ាងដូច្នេះ បន្ទាប់ពីលោកមកប្រទេសកម្ពុជា ក្នុងនាមជាទូតសុឆន្ទៈ របស់​ផលិតផល Sunny CoCo កាលពីចុងសប្ដាហ៍មុន។

លោកនិយាយថា ប្រជាជនកម្ពុជា និងតារាសម្ដែងខ្មែរ ពិតជាមានភាពរួសរាយរាក់ទាក់ និងផ្ដល់​ស្នាមញញឹម​ជាខ្លាំង​ចំពោះលោក។ ប្រការនេះហើយ ​ទើបលោក​ចង់មានស្នាដៃ​មួយ ជាមួយតារាសម្ដែងកម្ពុជា ដើម្បីផ្ដល់​ជាចំណងដៃ។

យ៉ាងណាក៏ដោយ លោក Zen Chong បញ្ជាក់ថា នេះគ្រាន់​តែ​ជាក្ដីសុបិនរបស់លោកតែប៉ុណ្ណោះ ហើយ​ប្រសិន​​​បើ​​អាចក្លាយជាការពិត គឺជារឿងមួយដ៏ប្រសើរបំផុត។

លោក Zen Chong សង្កត់ធ្ងន់ថា លោកអាចនឹងត្រឡប់មកកម្ពុជាជាថ្មីនាពេលដ៏ខ្លីខាងមុខ ប៉ុន្តែ​លោក​សង្ឃឹម​ថា ការវិលត្រឡប់មកវិញនេះ គឺមិនមែនក្នុងនាមទូតសុឆន្ទៈដូចពេលនេះទេ តែ​អាចជាការចាប់ដៃ​គូសម្ដែង​ជាមួយ​តារាកម្ពុជា។

លោក Zen Chong គឺជាតារាល្បីឈ្មោះមួយរូបប្រចាំប្រទេសសិង្ហបុរី។ លោកកើតនៅឆ្នាំ១៩៧៨។ លោក​បាន​​​ចូល​រួមជាមួយ Mediacorp ក្នុងឆ្នាំ ២០០១ ដែល​ជាក្រុមហ៊ុន​​ប្រព័ន្ធផ្សព្វផ្សាយ​ដ៏ធំ​នាពេល​បច្ចុប្បន្ន ក្នុង​​ប្រទេស​​​សិង្ហបុរី។ លោកធ្លាប់សម្ដែងភាពយន្តច្រើនឱ្យប្រព័ន្ធផ្សព្វផ្សាយ ហើយរឿងដែល​គេស្គាល់​លោក​ច្រើន​​មាន​ដូច Lobang ជារឿងកំប្លែងក្នុងឆ្នាំ ២០០៣ រួមនឹងភាពយន្តជាច្រើនទៀត៕