លម្អិតជុំវិញមូលហេតុអតីតស្វាមី សាន ស្រីឡៃ សម្រេចចិត្តជ្រើសរើសវិធីស្លាប់ទាំង២នាក់

2017-10-17 02:41:44
ជីវិតតារា

2017-10-17 02:41:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងពិធីតម្កល់សពរបស់អតីតតារាចម្រៀងប្រចាំផលិតកម្មហង្សមាស សាន ស្រីឡៃ ម្ដាយរបស់នាងបានបញ្ជាក់ពីរឿងរ៉ាវនៅពីក្រោយដែលនាំឲ្យបុរសជាអតីតស្វាមី សម្រេចចិត្តជ្រើសរើសវិធីស្លាប់ទាំង២នាក់ដើម្បីបញ្ចប់រឿងរ៉ាវស្នេហាដ៏រកាំរកូសនេះ។

ក្នុងនោះ អ្នកស្រី ឡុង ចាន់ធី ដែលត្រូវជាម្ដាយរបស់សពបានប្រាប់ Sabay នាព្រឹកនេះថា មុនពេលដែលហេតុការណ៍បាញ់សម្លាប់បានកើតឡើងអតីតស្វាមីបានទៅសុំជានាគ្នាវិញក្រោយពីបែកគ្នាជិត១ឆ្នាំមកហើយ តែ ស្រីឡៃ មិនព្រម ត្បិតខាងប្រុសមានប្រពន្ធ និងកូនហើយ។ ម្យ៉ាងនាងមិនចង់ជាប់ឈ្មោះជាស្រីដណ្ដើមប្ដីគេតទៅទៀតទេ។ អ្នកស្រីបញ្ជាក់ថា មួយរយៈដែលបែកគ្នានេះ អ្នកទាំង២មិនទាន់លែងលះគ្នាដាច់ស្រេចនៅឡើយទេ គ្រាន់តែសម្រេចចិត្តចែកផ្លូវគ្នារស់នៅរៀងៗខ្លួន។

ផ្ទុយទៅវិញ អតីតស្វាមីបែរជាគំរាមថា "បើមិនជានាគ្នាវិញទេ គឺស្លាប់ទាំង២នាក់"។ បុរសរូបនេះបានបន្ថែមថា លោកមិនអាចទៅរកប្រពន្ធកូនដើមវិញទេ បើឲ្យទៅវិញលោកសុខចិត្តស្លាប់ ហើយបើលោកស្លាប់ ស្រីឡៃ ក៏ត្រូវស្លាប់តាមនោះដែរ។ នេះបើតាមការបញ្ជាក់ពីម្ដាយជនរងគ្រោះ។

សពរបស់ សាន ស្រីឡៃ កំពុងតម្កល់ធ្វើបុណ្យនៅវត្តសែនសុខ រង់ចាំបូជានៅម៉ោង៩ព្រឹកស្អែក។ ឯសពជនល្មើស បានដឹកយកទៅតម្កល់នៅខេត្តព្រៃវែង ដើម្បីធ្វើបុណ្យ។ ក្នុងនោះប្រភពព័ត៌មានពីសមត្ថកិច្ចបានឲ្យដឹងថា ជនល្មើសគឺជាមន្ត្រីគយ មានឈ្មោះ ជ័យ រិន និងមានស្រុកកំណើត នៅខេត្តព្រៃវែង៕

អត្ថបទ៖ សុខណា

រាយការណ៍៖ ឆុង ស៊ីណាន