- 2017-10-17 03:59:20
- ព័ត៌មាន
ទប់ទឹកភ្នែកមិនបាន ពេលដឹងពីប្រវត្តិដ៏កម្សត់របស់ សាន ស្រីឡៃ
- 2017-10-17 03:59:20
- ចំនួនមតិ 0 | ចំនួនចែករំលែក 0
ទប់ទឹកភ្នែកមិនបាន ពេលដឹងពីប្រវត្តិដ៏កម្សត់របស់ សាន ស្រីឡៃ
ចន្លោះមិនឃើញ
តារាចម្រៀង សាន ស្រីឡៃ ត្រូវបានខ្មាន់កាំភ្លើង ដែលត្រូវជាអតីតស្វាមីរបស់ខ្លួនបាញ់សម្លាប់យ៉ាងសាហាវនៅក្នុងគ្លីនិកកែសម្ផស្សមួយកន្លែង ស្ថិតនៅតាមបណ្តោយផ្លូវ ៣១០ សង្កាត់បឹងកេងកង១ ខណ្ឌចំការមន កាលពីរសៀលម្សិលមិញ។
ថ្ងៃនេះ សូមគាស់កកាយនូវប្រវត្តិកម្សត់កម្រ របស់តារាចម្រៀងវ័យ ២៤ឆ្នាំ សាន ស្រីឡៃ មកបង្ហាញជូនប្រិយមិត្ត។
ស្រីឡៃ គឺជាបេក្ខភាព The Voice Cambodia រដូវកាលទី២ នាងមានស្រុកកំណើត នៅក្រុងតាខ្មៅ ខេត្តកណ្តាល និងបានផ្លាស់ទៅរស់នៅក្រុងប៉ោយប៉ែត ខេត្តបន្ទាយមានជ័យ តាំងពីអាយុ ២ឆ្នាំម្ល៉េះ។
នៅពេលចូលរួមប្រឡងកម្មវិធីខាងលើ ស្រីឡៃ បានរៀបរាប់ថា នាងមានចំណង់ចំណូលចិត្តច្រៀងតាំងពីតូច ពោលគឺតាំងពីមិនទាន់ចូលរៀនម្ល៉េះ មិនថាដើរតាមផ្លូវ ទៅសាលារៀន ឬក៏នៅផ្ទះទេ តែងតែច្រៀងលេងជានិច្ច។ ពេលមានកម្មវិធីអ្វីមួយ អ្នកជិតខាងតែងតែជំរុញឲ្យនាងឡើងច្រៀងមិនដែលខានឡើយ។
ដោយសារតែមានចិត្តស្រលាញ់ មានដុងតាំងពីកំណើត ស្រីឡៃមានក្តីស្រមៃចង់ក្លាយជាតារាចម្រៀងមួយរូប ទើបសម្រេចចូលរួមក្នុងកម្មវិធី The Voice Cambodia រដូវកាលទី២ ដើម្បីបំពេញឲ្យក្តីស្រមៃឲ្យក្លាយជាពិត។
ត្បិតមិនបានជាប់ជយលាភី ស្រីឡៃ បានឈានចូលដល់វគ្គផ្តាច់ព្រ័ត្រ មានឈ្មោះជាតារាចម្រៀង ក្នុងផលិតកម្ម ហង្សមាស។ ទឹកដមសំឡេង និងរូបសម្រស់របស់ស្រីឡៃ បានធ្វើឲ្យមហាជនចាប់ផ្តើមស្គាល់ស្រីឡៃបន្តិចម្តងៗ។ ក្រៅពីច្រៀង បច្ចុប្បន្នស្រីឡៃ កំពុងថតរឿងចំនួន២ឲ្យផលិតកម្ម ខាងលើផងដែរ តែមិនទាន់ចប់នៅឡើយ។
បើតាមការឲ្យដឹងពីអ្នកម្តាយ អ្នកស្រី ឡុង ចន្ធី អាយុ ៤៦ មុខរបរលក់បបរ នៅផ្ទះជួល ក្នុងសង្កាត់ឃ្មួញ ខណ្ឌ សែន សុខ បញ្ជាក់ថា ស្រីឡៃ មានស្វាមី ឈ្មោះ ជ័យ រិន ជាមន្ត្រីគយ ប៉ុន្តែមិនបានរៀបការស្របច្បាប់នោះទេ ពោលគឺសែនព្រេន ដោយមានចាស់ទុំដឹងឮ នៅឯក្រុងប៉ោយប៉ែតឯណោះ ។ អ្នកទាំងពីរមានកូនប្រុស២នាក់ កូនច្បងអាយុ៨ឆ្នាំ និងប្អូនអាយុ៤ឆ្នាំ។
ជារឿងនឹកស្មានមិនដល់ ស្វាមីស្រីឡៃ ធ្លាប់មានប្រពន្ធ និងកូនដល់ទៅ៤នាក់ តែរឿងនេះទើបបែកធ្លាយក្រោយនាងរៀបការ ដូច្នេះមានតែស៊ូទ្រាំ។ បើតាមការបន្តឲ្យដឹងពីម្តាយរបស់ស្រីឡៃ ជីវិតប្តីប្រពន្ធនេះរកាំរកូសតាំងពីមានកូន១មកម្ល៉េះ ដោយសារតែស្រីឡៃធ្លាប់ទទួលរងអំពើហិង្សាពីសំណាក់ប្តីញឹកញាប់ ហើយណាមួយមិនចង់មានឈ្មោះជាស្រីដណ្តើមប្តីគេ នាងក៏បានអង្វរសុំស្វាមីចែកផ្លូវគ្នាច្រើនដង តែប្តីមិនព្រម។
ទើបតែនៅដើមឆ្នាំ២០១៧នេះ អ្នកទាំងពីរក៏បានចែកផ្លូវគ្នារស់នៅរៀងខ្លួន តែមិនមានលិខិតស្នាមអ្វីនោះទេ។
ងាកមកជីវិតគ្រួសារវិញស្រីឡៃ មានបងប្អូន៤នាក់ ស្រីទាំងអស់ នាងគឺជាកូនច្បងក្នុងគ្រួសារ។ក្រោយពីប្រឡង The Voice ចប់ នាង និងក្រុមគ្រួសារបានសម្រេចចិត្ត ផ្លាស់ប្តូរទីលំនៅមកនៅភ្នំពេញ ដោយបានផ្សែផ្សំប្រាក់ខ្លះទិញផ្ទះមួយ នៅខណ្ឌសែនសុខ។
ក្នុងនាមជាកូនច្បងក្នុងគ្រួសារ នាងត្រូវរ៉ាប់រង និងរែកពន់អម្រែកយ៉ាងធ្ងន់ ដោយត្រូវរកប្រាក់មកផ្គត់ផ្គង់គ្រួសារទាំងមូល ដែលមានម្តាយ ប្អូនៗ រួមទាំងកូនប្រុសទាំងពីរ។
ត្បិតប្រាក់ចំណូលដែលបានមកពីវិស័យសិល្បៈ មិនអាចរ៉ាប់រងការចំណាយដ៏ធំធេងនេះបាន ស្រីឡៃ ក៏បង្ខំចិត្តលក់ផ្ទះដែលទើបនឹងទិញនោះវិញ ហើយមកនៅផ្ទះជួល នៅខណ្ឌសែនសុខដដែល។
មុនពេលដែលហេតុការណ៍បាញ់សម្លាប់បានកើតឡើងអតីតស្វាមីបានទៅសុំជានាគ្នាវិញក្រោយពីបែកគ្នាជិត១ឆ្នាំមកហើយ តែ ស្រីឡៃ មិនព្រម ត្បិតខាងប្រុសមានប្រពន្ធ និងកូនហើយ។ ផ្ទុយទៅវិញ អតីតស្វាមីបែរជាគំរាមថា បើមិនជានាគ្នាវិញទេ គឺស្លាប់ទាំង២នាក់។ នេះបើតាមការបញ្ជាក់ពីម្ដាយជនរងគ្រោះ។
មរណភាពរបស់ សាន ស្រីឡៃ បង្កការភ្ញាក់ផ្អើល និងសោកស្តាយយ៉ាងខ្លាំងពីសំណាក់ក្រុមគ្រួសារ មិត្តរួមអាជីព និងមហាជនទាំងអស់។ សព សាន ស្រីឡៃ តម្កល់នៅវត្តសែនសុខ សង្កាត់ឃ្មួញ ខណ្ឌសែនសុខ ពិធីបូជាសព នឹងប្រព្រឹត្តទៅនៅថ្ងៃពុធស្អែកនេះ វេលាម៉ោង៩ព្រឹក៕
