បទ "ស្ដាយស្នេហ៍អភ័ព្វ" ចេញ MV ថ្មី ផ្ទុះការគាំទ្រនៅ YouTube
បទ "ស្ដាយស្នេហ៍អភ័ព្វ" ដែលជាបទចាស់យកមកច្រៀងឡើងវិញ កំពុងមានប្រជាប្រិយភាពខ្លាំងនៅលើបណ្ដាញ YouTube ក្រោយពីបទនេះ ចេញជា MV ផ្លូវការ កាលពីពេលថ្មីៗនេះ។ នេះបើការប្រាប់ឲ្យដឹងពី លោក សុខ វិសាល ម្ចាស់ផលិតកម្ម KlapYaHandz។
http://youtu.be/vzAGW-OvMFI
KlapYaHandz ដែលនិយមយកបទចាស់ៗ ក្នុងទសវត្ស ៦០-៧០ មក Remix ធ្វើជាបទ Hip Hop បានថត MV បទ "ស្ដាយស្នេហ៍អភ័ព្វ" កាលពី ពីរខែមុន ហើយដាក់ចូលនៅក្នុង YouTube ក្នុងពេលថ្មីៗនេះ គឺមានប្រិយមិត្តអ្នកទស្សនាបានចូលរួមផ្ដល់យោបល់គាំទ្រ និង ពេញចិត្តចំពោះបទនេះខ្លាំង។
“ក្រៅពីអ្នកគាំទ្រនៅខ្មែរ គឺខ្ញុំឃើញអ្នកនៅអាមេរិកចូលរួមគាំទ្របទនេះច្រើនក្រោយពីខ្ញុំបញ្ចូល MV នៅក្នុងYouTube”។ សុខ វិសាល និយាយ។
ទោះបីជាបទនេះ ឃើញមានការគាំទ្រខ្លាំងក្ដី ប៉ុន្តែ "ស្ដាយស្នេហ៍អភ័ព្វ" ច្រៀងដោយលោក AGO ទំនងជាមិនអាចទាញការចាប់អារម្មណ៍ខ្ពស់ដូចបទ "ស្នេហាក្នុងពេលរាត្រី" របស់ លក្ខណ៍ បានទេ។
“ខ្ញុំមិនច្បាស់ថា មកពីមូលហេតុអ្វីទេ គ្រាន់តែគិតថា បទ "ស្នេហាក្នុងពេលរាត្រី" ទំនងជាចង្វាក់រាំកន្ត្រាក់អារម្មណ៍ និង ធ្វើឲ្យមនុស្សគ្រប់គ្នាចង់រាំលេងជាងបទ "ស្ដាយស្នេហ៍អភ័ព្វ"។ សុខ វិសាល និយាយបន្ថែម។
ឆ្លើយតបនឹងការលើកឡើងរបស់មហាជនមួយចំនួនដែលថា KlapYaHandz តែងតែយកបទចាស់មកធ្វើជាបទថ្មីនោះ លោក សុខ វិសាល បានពន្យល់ត្រឡប់វិញថា ជាការពិត KlapYaHandz តែងយកបទទសវត្ស ៦០-៧០ មកធ្វើជាបទថ្មីមែន ប៉ុន្តែ បទទាំងនោះភាគច្រើនយុវវ័យមិនសូវស្គាល់នោះទេ។ ម៉្លោះហើយ ការ Remix បទថ្មី គឺចង់ឲ្យយុវវ័យចាប់អារម្មណ៍ និង ស្ដាប់បទចាស់ៗឡើងវិញ។
លោក សុខ វិសាល បានពន្យល់ទៀតថា នៅប្រទេសជឿនលឿន ជាពិសេស នៅអាមេរិក ក៏ធ្វើបែបនេះដែរ គឺគេតែងតែយកបទចាស់ៗស្ទើរតែបាត់បង់មកធ្វើជាបទថ្មី ហើយយុវវ័យស្ដាប់ហើយក៏ចង់ស្រាវជ្រាវរកម្ចាស់ដើមវិញ។ "ខ្ញុំចង់បញ្ជាក់ថា គ្រប់បទដែលខ្ញុំយកមកពីគេ គឺខ្ញុំប្រាប់ថា បទនេះម្ចាស់ដើមជានរណា យើងរក្សាប្រភពរបស់គេ ប៉ុន្តែ យើងក៏ធ្វើឲ្យពីរោះដែរ"។ វិសាល បញ្ជាក់បន្ថែម។
ទន្ទឹមគ្នានេះ KlapYaHandz នៅមិនទាន់មានថវិកាគ្រប់គ្រាន់ ដើម្បីផលិតបទថ្មីនៅឡើយ ហើយការធ្វើចម្រៀងដាក់តាម YouTube កន្លងមកគ្រាន់តែជាការកម្សាន្ត ប៉ុន្តែ នៅថ្ងៃខាងមុខដ៏ខ្លី KlapYaHandz មានគម្រោងនឹងផលិតបទថ្មីដើម្បីលក់ជា CD & VCD។
លោក សុខ វិសាល មានផលិតកម្មពីរ គឺផលិតកម្ម ៣៩១ និង ផលិតកម្ម KlapYaHandz។ ៣៩១ បានធ្វើឲ្យកក្រើកម្ដងរួចមកហើយតាមរយៈរឿង "គ្រាប់ពេជ្រ" ប៉ុន្តែ KlapYaHandz ល្បីតាមរយៈបទ "ស្នេហាក្នុងពេលរាត្រី"។
ទោះបីជាយ៉ាងណាក៏ដោយ លោក វិសាល សង្ឃឹមថា បទ "ស្ដាយស្នេហ៍អភ័ព្វ" ក៏នឹងទទួលបានការចាប់អារម្មណ៍ខ្លាំងពីមហាជន ហើយក៏សង្ឃឹមថា បទនេះ នឹងលាន់ឮច្រើននៅពិធីរាំរែកនានា នៅក្នុងឱកាសបុណ្យចូលឆ្នាំប្រពៃណីខ្មែរនាពេលខាងមុខនេះ៕
នៅ Platinum Cineplex យប់មិញ ទស្សនិកជនក៏សរសើររឿង “៧ថ្ងៃ” ដែរ
អត់លេងសើចទេ…ម្ដាយ នី មុនីនាថ ជួបខ្មោចមែនទែន ខណៈកូនស្រីកំពុងថតរឿងខ្មោច
មើលចុះ…តារាថ្មីៗភាគច្រើនចូលរួមថតMVចូលឆ្នាំរបស់ រស្មីស្ទឹងសែនម្សិលមិញ
អត្ថបទ៖ ប៊ិន ប៊ុណ្ណា
