ប្លង់រឿង១ ភុល សុវណ្ណដានីន សម្លាប់មនុស្សអស់១ភូមិ
តារាសម្ដែង ភុល សុវណ្ណដានីន បានថ្លែងឲ្យ Sabay ដឹងថា ខ្លួនទើបតែបញ្ចប់ការថតខ្សែភាពយន្តខ្នាតធំមួយ ដោយក្នុងរឿងនោះ លោកគឺជាតួឯកមានចិត្តសាហាវយង់ឃ្នងម្នាក់ រហូតដល់ហ៊ានសម្លាប់អស់ប្រជាជន១ភូមិ។
ខ្សែភាពយន្តដែលតារាសម្ដែង ភុល សុវណ្ណដានីន បានថតនោះ មានចំណងជើងថា "ទង់ព្រលឹង" ដែលជាវណ្ណកម្មរបស់ផលិតកម្ម "រេដ ភីកឈ័រ "។ លោក ដានីន បានឲ្យដឹងថា ក្នុងខ្សែភាពយន្តនោះ លោកគឺជាតួឯកកាចម្នាក់ មានឈ្មោះថា "អាបុត្រ" ដែលត្រូវជាកូន របស់តារាសម្ដែង ទេព រិនដារ៉ូ។
លោកបានរៀបរាប់ត្រួសៗឲ្យដឹងថា ដោយសារតែខ្លួន ត្រូវបានប្រជាការងារភូមិធ្វើបាបខ្លាំងពេក ថ្ងៃមួយ លោកបានទៅរៀន មន្តអាគម រួចក៏បានក្លាយជាគ្រូធ្មប់ រួចហើយបាន ចេញសម្លាប់នាអ្នកភូមិតែម្ដង។ ការសម្លាប់នោះ ដានីន មិនបានទៅដោយខ្លួនឯងឡើយ គឺលោកបានបញ្ជាខ្មោចឲ្យទៅសម្លាប់។ ដោយសារតែចង់ឲ្យភូមិមួយនោះ ក្លាយជាភូមិអត់មនុស្សរស់នៅ ក្នុងប្លង់ធំនោះ លោកបានសម្លាប់ នាក់ភូមិចោលទាំងអស់តែម្ដង។
ដានីន សូមមិនអធិប្បាយច្រើនជាងនេះឡើយ ព្រោះខ្លាចប៉ះពាល់ដល់ផ្ទៃរឿងទាំងមូល។តាមការឲ្យដឹងរឿង"ទង់ព្រលឹង" បានថតបញ្ចប់រួចរាល់ហើយនៅយប់មិញនេះនៅភ្នំបាសិត បន្ទាប់ពីដំណើរការថតប្រហែល១ខែមក។
ដានីន សង្ឃឹមថា តាមរយៈខ្សែភាពយន្តខាងលើនឹងជួយឲ្យប្រជាប្រិយភាពរបស់ខ្លួនងើបឡើងវិញជាក់ជាមិនខាន បន្ទាប់ពីខ្លួនបានអាក់ខានមួយរយៈ ដោយសារតែជាប់រវល់ជាមួយការងារជាមន្ត្រីប៉ូលិស។
កន្លងមក លោក ភុល សុវណ្ណដានីន ធ្លាប់បានថតខ្សែភាពយន្តជាង១០រឿងមកហើយ បន្ទាប់ពីតារារូបនេះ បានបោះជំហានចូលសិល្បៈកាលពីឆ្នាំ ២០០៧ មក។ ឆាប់ៗខាងមុខនេះ លោកបានបង្ហើបថា គ្រោងថតខ្សែភាពយន្តថ្មីមួយទៀតតែសូមលាក់សិន ព្រោះខាងផលិតកម្មមិនទាន់ឲ្យប្រកាស ដោយរង់ចាំធ្វើពិធីក្រុងពាលីរួចសិន៕
អត្ថបទ៖ ខុត សីហា
រូបថត៖ ផ្ដល់ឲ្យ
