- 2018-09-20 02:20:34
- ស្ទីលតារា
តារាល្បីណាខ្លះ មានឱកាសបានរួមការងារជាមួយតារាបរទេស ?
- 2018-09-20 02:20:34
- ចំនួនមតិ 0 | ចំនួនចែករំលែក 0
តារាល្បីណាខ្លះ មានឱកាសបានរួមការងារជាមួយតារាបរទេស ?
ចន្លោះមិនឃើញ
ថ្ងៃនេះ Sabay សូមលើកយកតារាខ្មែរ ដែលធ្លាប់រួមការងារជាមួយតារាបរទេស នៅក្នុងការថតស្ប៉ត សម្ដែងរឿង និង ច្រៀងរួមគ្នាផងដែរ។ ក្នុងនោះមានដូចជា៖
តូតា
តារាសម្ដែងរូបនេះ បានហោះឆ្លងប្រទេសទៅប្រទេសថៃ ដើម្បីថតស្ប៉តពាណិជ្ជកម្មស្បែកជើង ជាមួយតារាល្បីជួរមុខ Mark Prink ព្រមទាំងតារាស្រីថៃ Cchannatt និង Mmuaykel ។ ក្នុងនោះ គេឃើញតារាខ្មែរមានតែកញ្ញា តូតា ម្នាក់គត់ ហើយទីតាំងថត បានជ្រើសរើសយកតំបន់ទេសចរណ៍ល្បីមួយនៅថៃ ដែលមានទេសភាពស្រស់ស្អាតទាក់ភ្នែក។
ខេមរៈ សិរីមន្ត
តារាចម្រៀងនៅផលិតកម្មធំរូបនេះ បានច្រៀងរួមគ្នាជាមួយតារាថៃ Tik shiro ក្នុងបទចម្រៀង " Sad Man” ដោយមួយបទនេះ មានភាសាថៃផង ខ្មែរផង ហើយថត MV នៅស្រុកខ្មែរ។ លោក Tik shiro ប្រាប់ថា លោកចង់ច្រៀងរួមគ្នាបែបនេះជាមួយកំពូលតារាចម្រៀង ខេមរៈ សិរីមន្ត យូរណាស់ហើយ តែចេះតែគ្មានឱកាស។
អ៊ុន សិទ្ធា
លើកទីមួយ ដែលតារាសម្បុរស្រអែមរូបនេះ សហការថតស្ប៉តពាណិជ្ជកម្មស្រាបៀរជាមួយតារាថៃ ឆុំភូ។ ចំពោះតម្លៃវិញ លោកទទួលបានថ្លៃខ្ពស់ គុណនឹង៥ បើធៀបនឹងតម្លៃថតស្ប៉តនៅប្រទេសកម្ពុជា។ ប៉ុន្តែលោក សទ្ធា អះអាងថា តម្លៃនេះ មិនទាន់ស្មើពាក់កណ្ដាលសម្រាប់តួថៃ ដែលថតនោះផងទេ។
ឌុច លីដា
តារាសម្ដែងមានផ្ទៃមុខសិចស៊ីរូបនេះ ធ្លាប់ថតខ្សែរឿងចំណងជើងថា "អណ្ដាតភ្លើងនៅរដូវក្ដៅ" ឲ្យផលិតកម្មចិន ដោយថតនៅទឹកដីខេត្តសៀមរាប។ បន្ទាប់មក រូបនាងត្រូវបានស្ថានីយទូរទស្សន៍ CTN ផ្ដល់ឱកាសឲ្យថតខ្សែភាពយន្តខ្លីខ្នាតធំ ជាមួយតារាប្រុសសិង្ហបុរី គឺលោក Elvin Ng ដែលថតនៅប្រទេសសិង្ហបុរី ព្រមទាំងនៅខេត្តសៀមរាប ខេត្តកំពង់ធំ និងទីក្រុងភ្នំពេញផងដែរ។
ផាត់ ផាន់ណា
តារារូបនេះ មានឱកាសរួមសម្ដែងជាតួឯកជាមួយតារាចិន Sunxu Bo ក្នុងរឿង "ពន្លកស្នេហ៍រីកលើដីកម្ពុជា" ដែលតួខ្មែរ មានតែកញ្ញាម្នាក់គត់។ នេះជាលើកទីពីរសម្រាប់ស្រីស្អាតរូបនេះ ក្នុងការសម្ដែងជាមួយតារាចិន ប៉ុន្តែជារឿងទីមួយ ដែល ផាន់ណា ជាតួឯក។
យុគ ចិន្ដា
ពិធីករចាស់វស្សារូបនេះ បានក្ដាប់តំណែងដោយថតស្ប៉តទឹកដោះគោខាប់ នៅទីក្រុងបាងកក ជាមួយតារាប្រុសថៃមុខស្រស់ Shakrit ។ ថ្វីត្បិតអាយុជ្រេបន្តិច តែអ្នកនាង យុគ ចិន្ដា ប្រាប់ថា អស់ពេល៥ឆ្នាំហើយ ដែលក្រុមហ៊ុនថៃផ្ដល់ឱកាសឲ្យអ្នកនាងឈរឈ្មោះជាអ្នកតំណាងឲ្យផលិតផលនេះ។
វុទ្ធា
វុទ្ធា តារាចម្រៀងមកពីផលិតកម្ម KlapYaHandz បានច្រៀងរួមគ្នាជាមួយតារាចម្រៀងរ៉េបស្បែកខ្មៅ ឈ្មោះ Victor Siva ក្នុងបទចម្រៀងមានចំណងជើងថា "អូនសាសន៍អី" ដែលទើបចេញកាលពីថ្មីៗនេះ។ បទចម្រៀងនេះ បានថតលើទឹកដីឯនាយសមុទ្រ ក្នុងព្រះរាជាណាចក្រកម្ពុជា៕
