- 2018-09-24 03:46:07
- ជីវិតតារា
ជានារីរបាំល្វត់ល្វន់ កែ មុនីរត្នទិកា ចង់ក្លាយជាទាហាន
- 2018-09-24 03:46:07
- ចំនួនមតិ 0 | ចំនួនចែករំលែក 0
ជានារីរបាំល្វត់ល្វន់ កែ មុនីរត្នទិកា ចង់ក្លាយជាទាហាន
ចន្លោះមិនឃើញ
នាដការាងតូចច្រលឹង កែ មុន្នីរត្នទិកា ប្រាប់ថា បំណងប្រាថ្នារបស់នាងហាក់ខុសប្លែកពីនារីទូទៅ ដោយចង់ក្លាយជាទាហានម្នាក់ ។ ទោះជាយ៉ាងណា ក្ដីស្រមៃនេះហាក់មិនសូវមានការគាំទ្រពីក្រុមគ្រួសារឡើយ ដោយម្ដាយឪពុករបស់ ទិកា ចង់ឲ្យនាងធ្វើការនៅក្នុងក្រុមហ៊ុនមានម៉ាស៊ីនត្រជាក់ច្រើនជាង។
កូនពៅក្នុងចំណោមបងប្អូន២នាក់រូបនេះ ប្រាប់ថា អ្នកខ្លះចូលចិត្តនិយាយ មនុស្សស្រីមុជមិនជ្រៅទៅមិនឆ្ងាយ ឬ ស្រ្តីបង្វិលចង្រ្កានមិនជុំ ហើយគិតថាស្ត្រីទន់ខ្សោយ។ ប៉ុន្តែសម្រាប់នាង យល់ថា សម័យនេះគួរឲ្យតម្លៃយេនឌ័រ ជាជាងបន្ទាបតម្លៃម្ខាងៗ។
សិស្សទើបបញ្ចប់ការប្រឡងបាក់ឌុបរូបនេះ បន្ថែមថា តាមពិតទៅ មិនមែនតែរឿងចង់ធ្វើទាហានទេ ដែលម្ដាយឪពុកនាងហាមឃាត់ សូម្បីរៀនរបាំ ក៏រូបនាងលួចមកហាត់មិនឲ្យអ្នកផ្ទះដឹងដែរ។ ដោយសារតែក្ដីស្រលាញ់តាំងពីតូច និងចង់ថែរក្សារបាំខ្មែរផង ទើបទិកា តែងជម្នះរាល់ការលំបាក និងការមិនសូវផ្ដល់តម្លៃពីមជ្ឈដ្ឋានទូទៅ។ ការប្រឹងប្រែងទាំងអស់នេះ ធ្វើឲ្យយុវតី ទិកា មុតមាំ និងរឹងមាំកាន់តែខ្លាំង។
ចំពោះការហាត់រៀនសិល្បៈបុរាណវិញ នារីរបាំមានកំណើតនៅក្រុងភ្នំពេញ បានរៀនតាមសមាគមសិល្បៈអស់ពេលជាង២ឆ្នាំ ព្រមទាំងចេះរបាំជាច្រើនដូចជា របាំបួងសួង របាំជូនពរ របាំអប្សរា របាំព្រាបស និងរបាំគោះត្រលោក ជាដើម រួមទាំងទម្រង់សិល្បៈជាច្រើន។ សម្រាប់ យុវតី កែ មុន្នីរត្នទិកា ប្រាប់ថា បើសិនថ្ងៃណាមួយ មានគេប្រកាសជ្រើសរើសទាហានស្រី នាងមានចំណាប់អារម្មណ៍ប្រឡងចូល តែយ៉ាងណាក៏ត្រូវនិយាយជាមួយឪពុកម្ដាយ សុំកាអនុញ្ញាតពីលោកទាំងពីរដែរ។ ចំពោះការសម្ដែងរបាំវិញ ទិកា នៅតែស្រលាញ់ និងគ្មានថ្ងៃបោះបង់ចោលចោលឡើយ៕
