- 2018-10-12 07:28:30
- ជីវិតតារា
អីយ៉ា! តារាចម្រៀងពលករម្នាក់កំពុងដើរតាមគន្លងឧកញ៉ាល្បីឈ្មោះមួយរូប
- 2018-10-12 07:28:30
- ចំនួនមតិ 0 | ចំនួនចែករំលែក 0
អីយ៉ា! តារាចម្រៀងពលករម្នាក់កំពុងដើរតាមគន្លងឧកញ៉ាល្បីឈ្មោះមួយរូប
ចន្លោះមិនឃើញ
ប្រសិនបើនិយាយពីតារាចម្រៀងពលករធ្វើការនៅក្រៅប្រទេស សម្រាប់ទីផ្សារ ក្នុងស្រុកទស្សនិកជនប្រហែលជាស្គាល់មិនសូវច្រើនឡើយ ប៉ុន្តែសម្រាប់ទីផ្សារខ្មែរនៅក្រៅស្រុកអាចមានអ្នកស្គាល់ច្រើន ត្បិតអីបទចម្រៀងរបស់ពួកគេភាគច្រើនរៀបរាប់ពីជីវិតពិតពលករ ដែលធ្វើឲ្យពលករដូចគ្នានិយមស្ដាប់។
ថ្ងៃនេះSabay សូមនាំប្រិយមិត្តទៅស្គាល់តារាចម្រៀងម្នាក់ គឺលោក សុខ សៀងឌី ដែលជាតារាចម្រៀងពលករខ្មែរម្នាក់មានបទចម្រៀងជាច្រើន ហើយកំពុងធ្វើការនៅប្រទេសកូរ៉េ។ ក្រៅពីធ្វើតារាចម្រៀង លោកកំពុងតែបោះទុនរកស៊ីជំនួញធំមួយ ស្រដៀងនឹងឧកញ៉ាល្បីឈ្មោះ ឡេង ណាវ៉ាត់ត្រា ដែលមានប្រវត្តិជាពលករខ្មែរធ្វើការនៅប្រទេសកូរ៉េដូចគ្នា។
ដោយមានបញ្ហាសេដ្ឋកិច្ចគ្រួសារ ក្រោយពីបញ្ចប់បាក់ឌុបនៅឆ្នាំ២០០៤ លោកសុខ សៀងឌី បានសម្រេចចិត្តចេញពីស្រុកកំណើតនៅ ស្រុកកំពង់ត្របែក ខេត្តព្រៃវែង មកធ្វើជាកម្មករគេ ដើម្បីរកប្រាក់ផ្គត់ផ្គង់គ្រួសារ។ ដំបូងលោកបានទៅធ្វើជាកម្មករធ្វើចម្ការនៅប្រទេសថៃ ធ្វើបាន២ឆ្នាំ ក៏សម្រេចចិត្តមកភ្នំពេញវិញ ចូលរៀនភាសាកូរ៉េ ហើយនៅដើមឆ្នាំ២០០៩ ក៏បានប្រឡងជាប់ទៅធ្វើការនៅប្រទេសកូរ៉េដូចបំណង។
យុវជនវ័យ២៩ឆ្នាំរូបនេះបានបន្តឲ្យដឹងថា ជីវិតជាពលករគឺអផ្សុកខ្លាំងណាស់ ហើយដោយនិស្ស័យចូលចិត្តចម្រៀង ពេលទំនេរ តែងជុំគ្នាច្រៀងលេងជាមួយពលករដូចគ្នា ដើម្បីរំសាយការនឹកស្រុកកំណើត។ មិត្តភក្តិឃើញសំឡេងល្អ ក៏សាកល្បងសរសេរបទចម្រៀងរៀបរាប់ពីជីវិតពិតរបស់ពលករម្នាក់ ឲ្យច្រៀងលេង។ ចម្រៀង១បទដំបូងដែលមានការគាំទ្ររហូតមកដល់បច្ចុប្បន្ននោះមានចំណងជើងថា"ខ្មាសមិត្តកូរ៉េ" ជាបទចម្រៀងរៀបរាប់ពីពលករម្នាក់ចាញ់បោកស្រីស្នេហ៍ ដែលខិតខំសន្សំប្រាក់ធ្វើការលើទឹកដីកូរ៉េយ៉ាងលំបាកផ្ញើមកឲ្យ ហើយត្រូវស្រីនោះបោកប្រាស់។
លោកសុខ សៀងឌី បានបន្តឲ្យដឹងបន្ថែមថា ក្រោយពីបទចម្រៀង១បទដំបូង ឃើញថាមានអ្នកគាំទ្រច្រើនជាពិសេសពលករដូចគ្នានោះ លោកបានធ្វើបទចម្រៀងបន្តបន្ទាប់ ព្រមទាំងទៅរៀនជំនាញធ្វើភ្លេង និងបច្ចេកទេសសំឡេងបន្ថែម។
គិតមកដល់បច្ចុប្បន្នលោកសុខ សៀងឌី បានផលិតបទចម្រៀងជាង២០បទរួចហើយ ក្នុងនោះលោកបានចេញជា២អ៊ាល់ប៊ុម។ អ៊ាល់ប៊ុមទី១ មានឈ្មោះថា "ជីវិតស្នេហាពលករកូរ៉េ" និងអ៊ាល់ប៊ុមទី២ មានឈ្មោះថា "ជីវិតស្នេហាពលករឆ្លងដែន" ដែលគ្រប់បទចម្រៀងទាំងអស់ភាគច្រើន និយាយពីជីវិតជាពលករ និងស្នេហាព្រាត់ប្រាសជាដើម។
លោក សៀងឌី បានលើកឡើងថា បទចម្រៀងរបស់លោកភាគច្រើនត្រូវពលករគាំទ្រ មិនថាតែនៅប្រទេសកូរ៉េឡើយ ទាំងនៅជប៉ុន ម៉ាឡេស៊ី ថៃ ជាដើម សុទ្ធតែស្គាល់បទចម្រៀងរបស់លោក។ ទន្ទឹមគ្នានោះដែរ សមាគមខ្មែរជាច្រើននៅប្រទេសកូរ៉េគាំទ្រលោកខ្លាំង ហើយនៅពេលមានការប្រគំតន្ត្រីធំ តែងអញ្ជើញលោកទៅច្រៀងញឹកញាប់។
ងាកមកវិស័យជំនួញវិញ តារាចម្រៀងពលករមានកំណើតមកពីរខេត្តព្រវែងរូបនេះ ទើបតែបោះទុនលើជំនួញអចលនទ្រព្យមួយដោយប្រើទុនខ្ទង់៥០ម៉ឺនដុល្លារ ជាមួយមិត្តភ័ក្ដិ៣នាក់ផ្សេងទៀត។ ក្រុមហ៊ុនដែលលោកទើបតែសម្ពោធនោះមានឈ្មោះថា"ភូមិឋានសួស្ដី" ជាក្រុមហ៊ុនពុះដីឡូតិ៍លក់ នៅតំបន់ជាយក្រុង ក្នុងទឹកដីខេត្តកំពង់ស្ពឺ។
មូលហេតុដែលនាំឲ្យតារាចម្រៀងរូបនេះ សម្រេចបោះទុនដើមទុនជាច្រើនសន្ធឹកសន្ធាប់ជាមួយដៃគូ ក៏ព្រោះតែកន្លងមកពួកគេធ្លាប់មានបទពិសោធន៍ផ្នែកអចលនទ្រព្យខ្លះៗ ដោយមានក្រុមហ៊ុនអចនទ្រព្យនៅកម្ពុជាធ្លាប់ ទាក់ទងឲ្យធ្វើជាបុគ្គលិកលក់ដីឲ្យគេនៅកូរ៉េ។
សៀងឌី បានបញ្ជាក់ឲ្យដឹងថា ដើមទុនខាងលើ ក្រុមរបស់ខ្លួនបានមកពីការសន្សំប្រាក់ខែ ដែលធ្វើការជាពលករនៅកូរ៉េផង និងបានមកពីការលក់ដី ដែលបានទិញទុកក្នុងគម្រោងកាលពីមិនទាន់ចប់អណ្តតិនៅកូរ៉េ និងការរួមគ្នាបណ្តាក់ទុនពីពលករនៅប្រទេសកូរ៉េ ដែលស្រលាញ់វិស័យអចលនទ្រព្យនេះដូចគ្នា។
បច្ចុប្បន្នលោក សៀងឌី មិនទាន់បញ្ចប់អាណត្តិធ្វើការនៅប្រទេសកូរ៉េនៅឡើយទេ ជំនួញដែលលោកបើកនោះ គឺប្រគល់ឲ្យដៃគូរបស់លោកជាអ្នកមើលការខុសត្រូវដោយផ្ទាល់ ចំណែករូបលោកមើលដោយប្រយោលពីប្រទេសកូរ៉េ និងគៀងគរអតិថិជនដែលជាពលករខ្មែរដូចគ្នានៅទីនោះ។
ដោយមាននិស្ស័យលើវិស័យចម្រៀង គួបផ្សំមានទស្សនិកជនស្គាល់មួយចំនួនធំ បំណងទៅថ្ងៃអនាគតក្រៅពី ពង្រីកមុខជំនួញលើវិស័យអចលនទ្រព្យ លោក សៀងឌី និយាយថា ខ្លួនក៏មានបំណង ចង់ផលិតបទចម្រៀងឲ្យបានច្រើនជាបន្តបន្ទាប់ហើយអាចនិងឈានដល់ការផលិតជាភាពយន្តថែមទៀតផង៕
